រង់ចាំរយៈពេល ៣០ ឆ្នាំសម្រាប់ការកុម្មង់ទិញនំ Croquette សាច់​គោ Kobe ជប៉ុន ដំណើររឿង និងគំនិតផ្តួចផ្តើមអាជីវកម្មនេះ

ប្រសិនបើអ្នកបញ្ជាទិញនំ Croquette សាច់គោ Kobe ក្លាសេមួយប្រអប់ពីហាង Asahiya ដែលជាហាងលក់សាច់លក្ខណៈគ្រួសារនៅទីក្រុង Takasago ខេត្ត Hyogo អ្នកប្រហែលជាត្រូវរង់ចាំ​ ៣០ ឆ្នាំទើបអាចទទួលបានទំនិញ។

ចាំរយៈពេល ៣០ ឆ្នាំសម្រាប់សាច់គោមួយប្រអប់ ពិតជាយូរពេកហើយ

Asahiya ត្រូវបានបង្កើតឡើងក្នុងឆ្នាំ ១៩២៦ មានលក់ផលិតផលសាច់ពី Hyogo រួមទាំងសាច់គោ Kobe ជាច្រើនទសវត្សរ៍មកហើយ។ ក្រោយសង្គ្រាមលោកលើកទី ២ ហាងបន្ថែមនំ croquette សាច់គោក្នុងម៉ឺនុយលក់។ រហូតដល់ដើម​ឆ្នាំ ២០០០ នំទាំងនេះចាប់ផ្តើម​ល្បី​លើ​បណ្តាញ​សង្គម ដោយចំនួនអ្នកបញ្ជា​ទិញ​អនឡាញ​ច្រើន​រហូត​ដល់​ថ្នាក់​ត្រូវ​​រង់​ចាំ​​រាប់​​ទសវត្សរ៍។

ដោយផ្តើមគំនិតពីអាជីវកម្មមិនរកប្រាក់ចំណេញ

បង Shigeru Nitta ម្ចាស់ហាង Asahiya ជំនាន់ទី ៣ បានអោយដឹងថា​ “យើងចាប់ផ្តើមលក់ផលិតផលអនឡាញតាំងពីឆ្នាំ ១៩៩៩ នៅ​ពេល​នោះ​ហាង​ដាក់​​លក់នំ Croquette សាកល្បង” ។

បង Nitta ទៅដល់កសិដ្ឋានចិញ្ចឹមសត្វមូលដ្ឋានក៏ដូចជាកន្លែងដេញថ្លៃសាច់គោជាមួយនឹងឪពុកតាំងពីក្មេង។ គាត់ទទួលគ្រប់គ្រងហាងក្នុងឆ្នាំ ១៩៩៤ កាលអាយុ ៣០ ឆ្នាំ។ ក្រោយពេលសាកល្បងពាណិជ្ជកម្មអេឡិចត្រូនិចបានប៉ុន្មានឆ្នាំ គាត់កត់សម្គាល់ឃើញថា អតិថិជនមានទំនោរស្ទាក់ស្ទើរចំពោះចំណាយប្រាក់ច្រើនដើម្បីទិញសាច់គោលំដាប់ខ្ពស់តាមទម្រង់អនឡាញ។

នោះហើយជាពេលដែលគាត់​សម្រេច​ចិត្ត​បង្កើត​គំនិត​មួយថ្មី។

“យើងលក់នំ Croquette ពិសេសក្នុងតម្លៃ ២៧៩ យ៉េនក្នុងមួយនំ ដោយឡែកសាច់គោក្នុងនំមានតម្លៃ ៤០០ យ៉េនក្នុងមួយចំណែក។ នំរបស់យើងមានរសជាតិឆ្ងាញ់ ហើយតម្លៃសមរម្យ ដោយសង្ឃឹមថាអតិថិជនអាចរីករាយជាមួយនឹងនំឆ្ងាញ់ៗ ហើយទិញសាច់គោ Kobe បន្ទាប់ពីភ្លក់លើកដំបូង” ។

ដើម្បីកាត់បន្ថយការខាតបង់ផ្នែកហិរញ្ញវត្ថុរយៈពេលដំបូង ហាង Asahiya ផលិត Croquette ត្រឹម​ ២០០ នំក្នុងមួយសប្តាហ៍ប៉ុណ្ណោះ។

បង Nitta បានអោយដឹងបន្ថែមថា ហាងរបស់គាត់មានទំនាក់ទំនងល្អជាមួយអ្នកផលិតសាច់គោក្នុងស្រុក ដូច្នេះគាត់ប្រើតែសាច់គោនៅតំបន់ Hyogo ប៉ុណ្ណោះ។

នំល្បីលើសការរំពឹងទុក

នំ Croquette កាន់តែមានប្រជាប្រិយភាពព្រោះតែគុណភាពលើសការរំពឹងទុក។ សាច់ស្រស់ប្រចាំថ្ងៃគ្មានសារធាតុរក្សាទុក ដំឡូងបារាំងដែលប្រើសម្រាប់ធ្វើនំក៏ត្រូវបានដាំក្នុងកសិដ្ឋានដូចគ្នាដែរ។ បង Nitta លើកទឹកចិត្តឱ្យកសិដ្ឋានប្រើលាមកគោដើម្បីដាំដំឡូង បន្ទាប់មកមើមដំឡូងប្រើជាចំណីសម្រាប់គោ បង្កើតបានជាវដ្តផលិតកម្ម។

គំនិតរបស់បងបានទាក់ទាញទាំងអ្នកស្រុក និងប្រព័ន្ធផ្សព្វផ្សាយ។ អត្ថបទកាសែតនិយាយអំពីនំ Croquette នៃ​ហាង Asahiya ចេញផ្សាយនៅឆ្នាំ ២០០០ ហើយជម្រុញអោយប្រជាប្រិយភាពនំកើនឡើងយ៉ាងខ្លាំង។

បង Nitta បាន​និយាយ​ថា​ “យើងផ្អាកទទួល​ការ​កុម្ម៉ង់​នំ​មួយ​រយៈពេល ព្រោះ​មាន​ការ​បញ្ជា​ទិញ​ច្រើនពេក យើងមិនអាចឆ្លើយតបបាន។ ការបញ្ជាទិញជាច្រើនត្រូវរង់ចាំរហូតដល់ ១៤ ឆ្នាំទើបអាចដឹកជញ្ជូន។ យើងមានបំណងផ្អាក ប៉ុន្តែបែរជាទទួលបានការហៅទូរស័ព្ទ​ស្នើ​ឱ្យ​បន្ត​​ផ្គត់ផ្គង់​ផលិតផលយ៉ាងច្រើន” ។

មានប្រជាប្រិយភាពមិនមានន័យថាជោគជ័យនោះទេ

ហាង Asahiya បន្តទទួលការបញ្ជាទិញនៅឆ្នាំ ២០១៧ ប៉ុន្តែបានសម្រេចចិត្តដំឡើងថ្លៃ។

“នៅពេលនោះ យើងបានដំឡើងតម្លៃ ៥០០ ទៅ ៥៤០ យ៉េនរួមទាំងពន្ធលើការប្រើប្រាស់។ ប៉ុន្តែដោយសារឥទ្ធិពលនៃការនាំចេញសាច់គោ Kobe តម្លៃ​សាច់គោ​នាំចូល​កើនឡើងទ្វេដង ជាក់ស្តែងនំ Croquette នៅតែជាទំនិញដែល​ខាត​បង់” ។

ថ្វីត្បិតតែខាត ប៉ុន្តែចំនួននៃការបញ្ជា​ទិញ​តែងតែលើសបន្ទុក រហូតដល់ថ្នាក់បង Nitta ត្រូវសើចចំអក​ចំពោះ​គំនិត​អាជីវកម្ម​របស់ខ្លួនថា “នំនេះបែរជាមានប្រជាប្រិយភាពជាជាងផលិតផលជាច្រើនផ្សេងទៀត” ។

បង Nitta បានជម្រុញការផលិតពី ២០០ នំក្នុងមួយសប្តាហ៍ ទៅជា ២០០ នំក្នុងមួយថ្ងៃ ប៉ុន្តែគាត់មិនអាចចំណាយប្រាក់បន្ថែមសម្រាប់ជួលអ្នកធ្វើនោះទេ ព្រោះអាចបណ្តាលអោយខាត។

“ខ្ញុំពិតជាមាន​អារម្មណ៍​សោកស្ដាយណាស់ដែល​ទុក​ឱ្យ​អតិថិជន​រង់ចាំ ខ្ញុំក៏ចង់ផ្គត់ផ្គង់នំជូនអតិថិជន​លឿន​ដែរ ប៉ុន្តែបើធ្វើដូច្នេះ ហាងរបស់ខ្ញុំនឹង​ក្ស័យ​ធន” ។

សំណាងអតិថិជន​ប្រហែល​ពាក់​កណ្តាល​ដែល​កុម្ម៉ង់​នំ croquette យល់​ព្រម​កុម្ម៉ង់​សាច់ Kobe។ នេះជាចំណុចវិជ្ជមានសម្រាប់​យុទ្ធសាស្ត្រ​ទីផ្សាររបស់គាត់។

ការខិតខំប្រឹងប្រែង

បង Niita មិនបានបោះបង់គោលបំណងដំបូងឡើយ ដោយលើកទឹកចិត្តមនុស្សជាច្រើនឱ្យទិញសាច់គោ Kobe ។

បច្ចុប្បន្ននេះនំ Croquette មួយប្រអប់ (មាន ៥ នំ) ត្រូវបានលក់ក្នុងតម្លៃ ២៧០០ យ៉េន។ មិនច្បាស់ថាត្រូវចំណាយពេលប៉ុន្មានទើបអាចទទួល​បាន​ការ​បញ្ជា​ទិញនោះទេ ប៉ុន្តែដើម្បីកុំឱ្យអតិថិជនភ្លេចការបញ្ជាទិញ មួយសប្តាហ៍មុនពេល​ដឹក​ជញ្ជូន​ហាង​នឹង​បញ្ជាក់​ការ​បញ្ជាទិញជាមួយអតិថិជន។

“អតិថិជនមួយចំនួនក្រោយពេលរង់ចាំរយៈពេលយូរប្តូរអុីម៉ែល យើងត្រូវទូរស័ព្ទទៅដោយផ្ទាល់ដើម្បីបញ្ជាក់អាសយ​ដ្ឋាន​ដឹក​ជញ្ជូន​ឡើង​វិញ” ។

ក្នុងបរិបទតម្លៃសាច់គោ Kobe កាន់តែឡើងថ្លៃ ប្រាក់ខែបុគ្គលិកក៏កើនឡើងផងដែរ។ បង Nitta អាចនឹងយល់​ថា​មាន​សម្ពាធ​កាន់​តែ​ខ្លាំង​ចំពោះ​បញ្ជី​រង់​ចាំ​រាប់សិបឆ្នាំ សង្ឃឹមថាគាត់នៅតែបន្តព្យាយាមទិសដៅដំបូងរបស់ខ្លួន។

Sacchan

មើលបន្ថែម: