សំបុត្ររៀបរាប់ពីអារម្មណ៍ដែលអតីតអ្នកអនុវត្តទោសប្រហារជីវិតជប៉ុនត្រូវឆ្លងកាត់

ឆ្មាំពន្ធនាគារដែលចូល​និវត្តន៍​មួយរូប​បាន​សរសេរ​សំបុត្រ ១២ ទំព័រផ្ញើទៅកាន់កាសែតជប៉ុន ដោយនិយាយអំពីអំឡុង​ពេល​ជិតស្លាប់របស់អ្នកទោស ក៏ដូចជាអារម្មណ៍របស់អ្នកអនុវត្តទោសប្រហារជីវិត។

អ្នកអនុវត្តទោសបានសរសេរសំបុត្រចំនួន ១២ ទំព័រ។ រូបភាព៖ Asahi Shimbun

កាលពីថ្ងៃទី ១៤ ខែវិច្ឆិកា កាសែត Asahi Shimbun បានចុះផ្សាយសំបុត្ររបស់អ្នកយាមគុកដែលចូលនិវត្តន៍អាយុ ៨៩ ឆ្នាំម្នាក់ នៅតំបន់ Kanto ប្រទេសជប៉ុន។ បុរសចូលនិវត្តន៍ម្នាក់ដែលមិនបញ្ចេញអត្តសញ្ញាណបានចែករំលែករយៈពេល​ដ៏​ឈឺ​ចាប់ មិន​រីករាយពេលប្រឈមនឹងអ្នកទោសអំឡុង​ពេល​ចុង​ក្រោយ​នៃ​ជីវិត។

ប្រហែលចន្លោះពីឆ្នាំ ១៩៧៥-១៩៧៧ ប្រធានពន្ធនាគារបានប្រាប់អ្នកយាមគុកចំពោះកាលបរិច្ឆេទប្រហារជីវិតអ្នកទោស​​ត្រូវ​បានកំណត់។

“ខ្ញុំគិតថាខ្ញុំបាន​ត្រៀម​ខ្លួនរួចជាស្រេចសម្រាប់ថ្ងៃនោះ ប៉ុន្តែជាក់ស្តែង ខ្ញុំចាប់ផ្តើមមានអារម្មណ៍តានតឹង។ មួយសន្ទុះក្រោយមក ខ្ញុំមានអារម្មណ៍ថាព្រឺឆ្អឹងខ្នង” អតីតអ្នកយាមគុកបានសរសេរក្នុងសំបុត្រ។

ក្នុងអំឡុងពេលគាត់ធ្វើការនៅពន្ធនាគារ Osaka អ្នកទោស ៣ នាក់ដែលចោទប្រកាន់ពីបទឃាតកម្ម និងប្លន់ត្រូវទទួលទោសប្រហារជីវិត។ ប្រហែល ៥ ថ្ងៃមុនថ្ងៃប្រហារជីវិត អតីត​ឆ្មាំ​ដែល​ចូលរួម​ក្នុង​ការ​អនុវត្ត​ទោស​នឹង​ទទួល​បាន​ដីកា​ប្រហារ​ជីវិតពី​រដ្ឋមន្ត្រី​ក្រសួង​យុត្តិធម៌។

យោងទៅតាមច្បាប់ជប៉ុនចាប់ពីឆ្នាំ ១៨៧៣ ការព្យួរកជាទម្រង់សម្រាប់អ្នកទោសប្រហារជីវិត។ អ្នកអនុវត្តទោសត្រូវកំណត់ប្រវែងខ្សែពួរទៅតាមកម្ពស់ និងទម្ងន់របស់អ្នកទោស ហើយពួកគេមានពេលប្រហែល ៥ ថ្ងៃសម្រាប់ត្រៀមស្មារតី។

អារម្មណ៍របស់អ្នកអនុវត្តទោសប្រហារជីវិត

អតីត​អ្នក​យាមគុកបាននិយាយថាលោកតែងតែដកដង្ហើមវែងពេលនៅម្នាក់ឯង និងរំងាប់អារម្មណ៍ខ្លួនអោយស្ងប់។ មិត្តរួមការងាររបស់លោកបានដាក់រហស្សនាមឱ្យគាត់ថា Kshitigarbha មានន័យថា “ព្រះពោធិសត្វ​ដែលឃ្លាំមើល​ពិភព​ងងឹត” ។

“ខ្ញុំ និង​អ្នក​ទោសសុទ្ធតែជាមនុស្ស ដូច្នេះយើងមានទំនាក់ទំនងក្នុងកម្រិតមួយ។ ប្រសិនបើខ្ញុំមើលទៅខុសធម្មតាសូម្បីតែបន្តិច ពួកគេនឹងដឹងថាថ្ងៃប្រហារជីវិតរបស់ខ្លួនជិតមកដល់ហើយ។ នៅពេលនោះស្ថានភាពមិននឹកស្មានអាចនឹងកើតឡើង ដូច្នេះហើយខ្ញុំត្រូវព្យាយាមធ្វើធម្មតា” ។

ប្រធាន​ពន្ធនាគារ​នឹង​ជូន​ដំណឹង​ដល់​អ្នកទោសចំពោះពេលវេលាប្រហារជីវិតមុន ២៤ ម៉ោង។ អតីតអ្នកយាមគុកនឹងរៀបចំឱ្យ​អ្នក​ទោសប្រហារជីវិតជួបអ្នករាល់គ្នាលើកចុងក្រោយ។ ពួកគេក៏ទទួលបានពិធីជប់លៀងលាអ្នកទោស​ជាប់​ឃុំ​ឃាំង​ផ្សេង​ទៀត និងបំពេញតាមបំណងអាហារលើកចុងក្រោយ។

បន្ទប់ដែលអ្នកទោសជួបអ្នកប្រឹក្សាសាសនាមុនពេលប្រហារជីវិតនៅពន្ធនាគារតូក្យូ។ រូបភាព៖ Reuters

អតីតអ្នកយាមគុកជាអ្នកដែលរួមដំណើរជាមួយអ្នកទោសប្រហារជីវិតលើកចុងក្រោយ “យើងយកប្រាក់រៃអង្គាស​បាន​​ទិញ​អាហារ​លើក​ចុង​ក្រោយ​ដែល​ពួក​គេ​ចង់​ហូប ដូច​ជា sushi ឬមី soba ។ បុគ្គលិក​ពន្ធនាគារ​នឹង​បង្កើន​ការ​ល្បាត​ដើម្បី​​ការ​ពារ​​ករណី​ធ្វើ​អត្តឃាត ពួក​គេ​ចាត់​វេន​ត្រួត​ពិនិត្យ​អ្នក​ទោស” ។ 

អ្នកទោសប្រហារជីវិតមួយចំនួននឹងសម្អាតកន្លែងរបស់ពួកគេ ហើយសរសេរបណ្តាំប៉ុន្មានម៉ោងមុនពេលស្លាប់។ អតីត​អ្នក​យាមបានប្រាប់ថា អ្នកទោសប្រហារជីវិតច្រើនតែគេងមិនលក់ ហើយបន្តសរសេរបណ្តាំរហូត​ដល់​ព្រឹក។

ថ្ងៃអនុវត្តទោសប្រហារជីវិត

នៅ​ថ្ងៃ​ប្រហារ​ជីវិត អ្នកយាមគុកនឹងនាំអ្នកទោសទៅកាន់បន្ទប់ប្រហារជីវិត។ អ្នកទោសប្រហារជីវិតបីនាក់ដែលគាត់បានចូលរួមអនុវត្តទោសជាមនុស្សក្លាហាន។ លោក​សរសេរ​ថា “ពួក​គេ​ស្ងប់​អារម្មណ៍ ហើយ​ដើរ​ចូល​បន្ទប់​ដោយមិន​ត្រូវ​ការ​ជំនួយ ម្នាក់​​ក្នុង​ចំណោម​ពួក​គេ​សុំ​ចាប់​ដៃ​ខ្ញុំ” ។

“ដៃគាត់ត្រជាក់ដូចទឹកកក ទឹកមុខមើលទៅស្លេកស្លាំង” អ្នកយាមគុករៀបរាប់ឡើងវិញ។ គាត់មើលឃើញការអនុវត្តទោសប្រហារជីវិតក្នុងបន្ទប់មួយ “ខ្ញុំ​មិន​ចង់​និយាយ​លម្អិត​ទេ ព្រោះ​វា​ដូច​ជារំលឹកដល់ទុក្ខសោករបស់អ្នកស្លាប់” ។

បើតាម Mirror ភាគច្រើនអ្នកទោសប្រហារជីវិតត្រូវរង់ចាំយ៉ាងហោចណាស់ ៥ ឆ្នាំទើបដល់វេនអនុវត្តទោស អ្នកខ្លះ​​ត្រូវ​​រង់​​ចាំ​​ជា​ច្រើន​ឆ្នាំ។ ជាទូទៅអ្នកចូលរួមអនុវត្តទោសត្រូវបានអនុញ្ញាតឱ្យត្រឡប់ទៅផ្ទះមុនម៉ោង។ ប្រសិនបើ​អតីត​ឆ្មាំ​ត្រឡប់​មក​ផ្ទះ​ពេល​ថ្ងៃ គ្រួសារគាត់នឹងដឹងថាមានអ្នកណាម្នាក់ត្រូវព្យួរក ដូច្នេះគាត់តែងតែចេញទៅក្រៅមិន​ត្រឡប់​មក​ផ្ទះ​មុន​ម៉ោងទេ។

អ្នកទោសត្រូវព្យួរកត្រង់កន្លែងពណ៌ក្រហម នៅពេលប្រអប់បើក អ្នកទោសនឹងធ្លាក់ចុះ។ រូបភាព៖ Reuters

អតីត​ឆ្មាំគុកបាន​និយាយ​ថាគាត់​មិន​ដែល​ប្រាប់​នរណា​ម្នាក់ឡើយ រួមទាំងគ្រួសារចំពោះអ្វីដែលគាត់បានសរសេរ។ គាត់បានសម្រេចចិត្តធ្វើដូច្នេះ បន្ទាប់ពីបានអានកាសែតរបស់ Asahi Shimbun កាលពីខែកញ្ញា និយាយពីការសន្ទនាចុងក្រោយរបស់អ្នកទោសប្រហារជីវិត។ បច្ចុប្បន្នរហូត​ដល់​ព្រឹក​ថ្ងៃ​ប្រហារ​ជីវិតទើបអ្នកទោសទទួលបានដំណឹង។

អតីតឆ្មាំគុកសរសេរ​ក្នុង​សំបុត្រ​ “យើង​បាន​ត្រៀម​ខ្លួន​ធ្វើជា​ឆ្មាំ​ពន្ធនាគារ ប៉ុន្តែភាគច្រើនអ្នកទាំងអស់គ្នាចង់ចូល​រួម​ក្នុង​ការ​អប់​រំ​អ្នក​ទោស។ គ្មាននរណាម្នាក់សប្បាយចិត្តពេលអនុវត្តទោសប្រហារជីវិតនោះទេ។ យើងគ្រាន់តែគិត​ថា​នោះ​ជា​តួនាទី​ដែល​ត្រូវ​បំពេញ​ប៉ុណ្ណោះ” ។

អតីតឆ្មាំគុកដែលចូលនិវត្តន៍បានបន្តថា គាត់តែងតែបន់ស្រន់អោយអ្នកទោសប្រហារជីវិតរាល់ពេលទៅប្រាសាទ ឬវត្ត។ លោកនិយាយថា ឆ្មាំគុកម្នាក់ដែលចូលរួមការអនុវត្តទោសប្រហារជីវិតធ្លាប់ទៅប្រាសាទ​ព្រះ​ពុទ្ធសាសនា Shikoku ចំនួន ៨៨ ដង។

“ខ្ញុំចង់អោយសាធារណជន​ដឹង​កាន់តែច្រើនចំពោះការអនុវត្តទោសប្រហារជីវិត។ ប្រសិនបើអ្នកដឹងរឿងនេះ អ្នករាល់គ្នាប្រាកដជាមិននិយាយពាក្យ​មិន​ល្អ​បែប​នេះ​ទេ” ។ អតីត​អ្នក​យាមរំលឹកដល់​អតីត​រដ្ឋមន្ត្រី​ក្រសួង​យុត្តិធម៌​ជប៉ុន Yasuhiro Hanashi ដែលទើបតែត្រូវបណ្តេញកាលពីថ្ងៃទី ១ ខែវិច្ឆិកា បន្ទាប់ពីសេចក្តីថ្លែងការណ៍បង្កចម្រូង​ចម្រាស​ទាក់​ទង​នឹង​ការ​អនុវត្ត​ទោស។

លោកនិយាយថា “ខ្ញុំ​គិត​ថា​ឥឡូវ​នេះ ឬខ្ញុំមិនបានចូលរួមចំណែកពិភាក្សាចំពោះការអនុវត្តទោសប្រហារជីវិត ខ្ញុំចង់​អោយ​អ្នក​រាល់​គ្នា​យល់​នូវ​អ្វី​​ដែល​​បុគ្គលិក​​អនុវត្ត​ទោស​ត្រូវ​ឆ្លង​កាត់” ។

ប្រភព៖ Skydoor