ក្មេងស្រីអាយុ ២ ឆ្នាំម្នាក់ស្លាប់ដោយសារឪពុកភ្លេច​ទុក​ចោល​លើ​ឡាន​រយៈពេល ៩ ម៉ោង

បុរសជាឪពុកម្នាក់អាយុ ៣៣ ឆ្នាំ ទទួលបន្ទុកជូនទៅសាលាខុសៗគ្នានៅ Kishiwada ប្រទេសជប៉ុន ដោយបានភ្លេចទុកចោលកូនស្រីអាយុ ២ ឆ្នាំរបស់ខ្លួនលើឡានរយៈពេល ៩ ម៉ោងបណ្តាលអោយកូនស្លាប់។

ក្មេងស្រីជនរងគ្រោះអាយុ​ ២ ឆ្នាំ មានឈ្មោះថា Seira Fuchigami ត្រូវទុកចោលក្នុងឡាន បន្ទាប់ពីបុរសជាឪពុកគិតថាបានយកកូនទៅដាក់សាលាមត្តេយ្យពេលព្រឹក។

ឪពុករបស់ Seira Fuchigami បានប្រាប់ប៉ូលិសខេត្ត Osaka ថា លោកបើករថយន្តចេញពីផ្ទះនៅម៉ោង ៨ ព្រឹក ថ្ងៃទី ១២ ខែវិច្ឆិកា ជាមួយកូនស្រីទាំងបីនាក់។ ក្រោយពេលបញ្ជូនកូនពីរក្នុងចំណោមបីនាក់ទៅសាលាផ្សេងៗគ្នានៅទីក្រុង Kishiwada គាត់ទៅកន្លែងធ្វើការដោយមិនចាំថា Seira កំពុងនៅខាងក្រោយឡានឡើយ។

លោកឪពុកចាក់សោ​ឡាន កញ្ចក់បង្អួចបិទជិត រួចដើរចូលការិយាល័យធ្វើការ។ រហូតដល់ម៉ោង ៥ ល្ងាចគាត់ទៅទទួលកូនៗ ទើបខាងសាលាត្តេយ្យប្រាប់ថាមិនឃើញប្អូន Seira មករៀនទេ។

ឪពុក​ប្រទះ​ឃើញ​កូន​ស្រី​ដេក​សន្លប់​នៅ​ខាង​ក្រោយ​រថយន្ត។ រូបភាព៖ Newsflash

បើតាមសមត្ថកិច្ច​បាន​អោយដឹងថា នៅពេលបុរសជាឪពុកត្រួតពិនិត្យរថយន្តរបស់ខ្លួនឡើងវិញ គាត់មើលឃើញកូន​ស្រី​ដេក​​សន្លប់​នៅ​​ខាង​ក្រោយ។

ថ្វីត្បិតតែត្រូវបានបញ្ជូនទៅ​មន្ទីរ​ពេទ្យ​ ប៉ុន្តែ Seira ឆ្លងមិនផុតឡើយ។ គ្រូពេទ្យបាននិយាយថា ក្មេងស្រីស្លាប់ដោយ​សារ​រង​កម្តៅ​បន្ទាប់​ពី​ត្រូវ​ទុកចោលក្នុងឡាន ដោយបន្ថែមថាពួកគេមិនបានមើលឃើញរបួសខាងក្រៅទេ។

យោងទៅតាមទីភ្នាក់ងារឧតុនិយមជប៉ុន សីតុណ្ហភាពកើនឡើងជាង ២០ អង្សាសេតាមតំបន់ខុសគ្នានៅ Osaka កាល​ពី​ថ្ងៃ​ទី ១២ ខែវិច្ឆិកា។ ទីក្រុង Sakai ដែលនៅជិតនោះបានកត់សម្គាល់សីតុណ្ហភាព ២៤,១ អង្សាសេ។

បច្ចុប្បន្ន​ប៉ូលិស​កំពុង​ធ្វើ​កោសល្យ​វិច័យ​ដើម្បី​កំណត់​មូលហេតុ​ស្លាប់​របស់​ក្មេង​ស្រី។

អាជ្ញាធរ​បានអោយដឹងថា ការ​បញ្ជូន​កូន​ទៅ​សាលា​ខុសៗគ្នាអាចជាមូលហេតុ​បណ្តាលអោយបុរសជាឪពុកភ័ន្តច្រឡំ។

ក្រៅពីនេះ សាលាមត្តេយ្យដែលប្អូន Seira ទៅរៀនក៏មានកំហុសដែរ ព្រោះមិនបានទាក់ទង​ទៅ​កាន់គ្រួសារដើម្បី​ជូន​ដំណឹង​ថា​ប្អូនមិនបានទៅសាលានៅ​ថ្ងៃ​នោះ។ ទន្ទឹមនឹងនេះ បើ​តាម​បទ​ប្បញ្ញត្តិ​របស់​ទីក្រុង Kishiwada សាលារៀន​ត្រូវ​ទាក់​ទង​ទៅ​ឪពុកម្តាយប្រសិនបើកូនរបស់ពួកគេអវត្តមានដោយមិនទាន់សុំច្បាប់។

ទោះជាយ៉ាងណា បុរសជាឪពុកមានកំហុសធ្ងន់ដែល​មិន​ដឹង​ថា​កូន​ស្រី​អាយុ​ ២ ឆ្នាំកំពុងនៅក្នុងឡាន បណ្តាលអោយ​ប្អូន​ត្រូវ​ទុក​ចោល​រយៈពេល ៩ ម៉ោង ការស៊ើបអង្កេតនៅតែបន្ត។

ប្រភព៖ Mirror

មើលបន្ថែម: