ប្រភេពដើមសំឡេងព្រឺសម្បុរ “Hyuu Dorodorodorodoro” ពេលខ្មោចជប៉ុនបង្ហាញខ្លួន

ថ្ងៃព្រហស្បតិ៍ 03/11/2022 | 11:36 ព្រឹក

តើអ្នកធ្លាប់ឃើញខ្មោចទេ?

ខ្ញុំមិនដែលឃើញខ្មោចទេ ប៉ុន្តែមានអារម្មណ៍ថាខ្លួនធ្លាប់ឃើញប៉ុន្មានដងដែរ។ សរុបទៅគ្មានអ្នកណាចង់មើលឃើញខ្មោចនោះទេ។

នៅប្រទេសណាក៏មានខ្មោចដែរ ប៉ុន្តែខ្មោចនៅជប៉ុនមានលក្ខណៈដោយឡែក។

ប្រិយមិត្តដែលចូលចិត្តមើលរឿងខ្មោច ភាពយន្តភ័យរន្ធត់ តើអ្នកដឹងទេថាខ្មោចជប៉ុនមានលក្ខណៈបែបណា?

នោះគឺគ្មានជើង។

សូមក្រឡេកមើលរូបភាពខ្មោចជប៉ុនដើម្បីវិភាគលក្ខណៈពិសេសនេះ។

ស្ត្រីក្នុងរូបគំនូរស្លៀករ៉ូបពណ៌សសម្រាប់អ្នកស្លាប់ ទោះបីជាមិនបានបង្ហាញក្នុងរូបគំនូរនេះ ជាទូទៅពួកគេពាក់ក្រណាត់រាងត្រីកោណលើក្បាល។

ផ្នែកខាងក្រោមជើងរបស់នាងមើលមិនឃើញនោះទេ ព្រោះតែនាងគ្មានជើង។

នេះជារូបគំនូរមួយផ្សេងទៀត ខ្មោចស្រីនៅក្រោមដើមសូល។

នៅប្រទេសជប៉ុនមានស្នាដៃសិល្បៈជាច្រើនដែលបង្ហាញពីស្រមោលខ្មោចក្រោមដើមសូល។ ដើមសូលមានរាងស្តើង ទន់ខ្សោយ មែកឈើបក់បោកតាមខ្សល់។

ទិដ្ឋភាពដើមសូលរំលឹកដល់ព្រលឹងខ្មោចដើរតែលតោល ដូច្នេះហើយ ប្រធានបទស្រមោលខ្មោចក្រោមដើមសូលត្រូវបានគេប្រើច្រើនក្នុងសិល្បៈជប៉ុន។

ម្យ៉ាងវិញទៀត នៅពេលដែលខ្មោចជប៉ុនបង្ហាញខ្លួនក្នុងឈុតឆាកភាពយន្តនឹងមានសំឡេងដោយឡែក។ សរុបទៅ បើស្តាប់លឺសំឡេងនេះពេលមើលរឿងជប៉ុនច្បាស់ជា… មានខ្មោច។

សំឡេងនោះត្រូវបានបង្ហាញតាមរយៈតម្រាប់សូរជប៉ុនដូចខាងក្រោម៖

Hyuu Dorodorodorodoro ។

សព្វថ្ងៃនេះយុវជនជប៉ុនប្រហែលជាមិនដឹងទេ ប៉ុន្តែមនុស្សវ័យកណ្តាលប្រាកដជាចាប់អារម្មណ៍នឹងសំឡេងនេះ។ ប្រភពដើមរបស់វាមកពីល្ខោន Kabuki ។

ខ្មោចបង្ហាញខ្លួនច្រើនក្នុងល្ខោន Kabuki រាល់ពេលដែលទស្សនិកជនបានឮសំឡេងនេះ ខ្មោចនឹងបង្ហាញខ្លួន។ កំណែទី ១ ត្រូវបានបង្កើតឡើងដោយប្រើប្រភេទខ្លុយ ឬស្សីហៅថា Noukan (能管) ។ សំឡេងនេះប្រៀបដូចជាសំឡេងខ្យល់បក់កាត់តាមចន្លោះទ្វារ ពេលស្តាប់ទៅមានអារម្មណ៍ព្រឺសម្បុរ បែកញើស។ ទន្ទឹមនឹងនេះមានសម្លេងវាយស្គរ “dorodoro” ដែលនាំមកនូវអារម្មណ៍ភ័យខ្លាចដល់អ្នកស្តាប់។

អ្នកប្រហែលជាមិនដឹងទេ ប៉ុន្តែខ្មោចជប៉ុនក៏មានអាយុកាលផងដែរ។ អ្នកខ្លះថែមទាំងស្រាវជ្រាវអំពីអាយុកាលរបស់ខ្មោច បើតាមអ្នកស្រាវជ្រាវទាំងនេះ ខ្មោចមានអាយុកាលជាមធ្យម ៤០០ ឆ្នាំ។ ក្នុងប្រវត្តិសាស្រ្តជប៉ុនមានការប្រយុទ្ធដ៏អស្ចារ្យមួយហៅថា Sekigahara កើតឡើងនៅថ្ងៃទី ១៥ ខែកញ្ញា ឆ្នាំ ១៦០០ ដែលល្បីជាកន្លែងបញ្ចុះសព។ ទោះជាយ៉ាងណា ក្រោយឆ្នាំ ២០០០ ចំនួនអ្នកមើលឃើញខ្មោចនៅទីនេះថយចុះ។ ៤០០ ឆ្នាំបានកន្លងផុតទៅ ប្រហែលជាខ្មោចទាំងនោះរលាយអស់ទៅហើយ។

បើអាចចូរនិយាយប្រាប់ខ្ញុំរឿងខ្មោចក្នុងប្រទេសរបស់អ្នក។

Kengo Abe