ម៉ាស៊ីនងូតទឹកដោយស្វ័យប្រវត្តិ​មិន​ត្រឹម​តែ​ជួយ​សម្អាត​រាង​កាយ ថែម​​ទាំង​​ល្អ​​ចំពោះ​សុខ​ភាព​ផ្លូវ​ចិត្ត

ម៉ាស៊ីនងូតទឹកដោយស្វ័យប្រវត្តិនេះមានឈ្មោះថា “Project Usoyaro” ត្រូវបានក្រុមហ៊ុន Science ពណ៌នាថាអាច​ជួយ​សម្អាត​ខ្លួន​ប្រាណ សម្រាប់អ្នកដែលធ្វើការនឿយហត់ពេញមួយថ្ងៃចង់ចូលគេងភ្លាមៗ។ អ្នក​ប្រើ​គ្រាន់​តែដេក​ក្នុង​​ម៉ាស៊ីន​​​នេះ ហើយ​​ទុក​​អោយ​​ឧបករណ៍​​​អនុវត្ត​​​ជំហាន​​​សម្អាត។

ឧបករណ៍នេះត្រូវបានរចនាឡើងតាមទម្រង់អាងងូតទឹកបិទជិតជាមួយនឹងគ្រែសម្រាប់អ្នកប្រើប្រាស់ដេកពីលើដើម្បី​ឱ្យ​ទឹក​លាងសម្អាតជុំវិញរាងកាយ។ វាក៏ត្រូវបានបំពាក់ដោយឧបករណ៍ចាប់សញ្ញាត្រួតពិនិត្យជាច្រើន និងប្រព័ន្ធ​បញ្ញា​សិប្ប​និមិត្ត (AI) ដើម្បីសម្អាតរាងកាយមនុស្សអោយស្អាត ជួយឱ្យអ្នកប្រើប្រាស់អាចបន្ធូរអារម្មណ៍។

Techeblog ដកស្រង់ព័ត៌មានពី Science បានអោយដឹងថា “គោលដៅរបស់ Project Usoyaro មិនត្រឹមតែសម្អាតរាងកាយអ្នកប្រើប្រាស់​ប៉ុណ្ណោះ​ទេ ថែមទាំងជាការព្យាបាលសុខភាពផ្លូវចិត្តផងដែរ។ ម៉ាស៊ីនងូតទឹកដោយស្វ័យ​ប្រវត្តិ​ជួយ​ឱ្យ​អ្នកប្រើប្រាស់អាចបន្ធូរអារម្មណ៍ សម្រាកលំហែកាយស្តាប់តន្ត្រីពិរោះ ដោយផ្អេកលើប្រព័ន្ធសំឡេងដែលភ្ជាប់​ក្នុង​ឧបករណ៍ និង​អេក្រង់​កម្សាន្ត​សម្រាប់​អ្នក​ប្រើ​ប្រាស់​ងូតទឹកផងមើលប្រធានបទដែលខ្លួន​ចូល​ចិត្ត​ផង” ។

ម៉ាសុីនងូតទឹកដោយស្វ័យប្រវត្តិរបស់ Science មានគ្រែសម្រាប់អ្នកប្រើប្រាស់។ រូបភាព៖ Science

ឧបករណ៍ចាប់សញ្ញាក្នុងម៉ាសុីនងូតទឹកដោយស្វ័យប្រវត្តិនឹងវាស់ស្ថានភាពប្រព័ន្ធសរសៃប្រសាទ។ បន្ទាប់មកទិន្នន័យ​នេះ​នឹង​បញ្ជូនទៅឱ្យប្រព័ន្ធ AI ខាងក្នុងឧបករណ៍ដើម្បីកត់សម្គាល់អារម្មណ៍របស់អ្នកប្រើប្រាស់។ នៅពេលនោះ អនុញ្ញាត​ឱ្យ​ឧបករណ៍​កំណត់​កម្រិត​ទឹក ជ្រើសរើសប្រភេទតន្ត្រី ឬកម្រិត​សំឡេង​សមរម្យ ជួយបង្កើតបរិយា​កាស​ផាសុកភាព​សម្រាប់​អ្នក​ប្រើប្រាស់។ 

អេក្រង់ខាងក្នុងអនុញ្ញាតឱ្យបញ្ជាមុខងារ និងបង្ហាញតួលេខចំពោះស្ថានភាពរបស់អ្នកប្រើ។ រូបភាព៖ Science

នាយកក្រុមហ៊ុន Science Yasuaki Aoyama បានចែករំលែកថា លោកគ្រោងនឹងណែនាំកំណែសាកល្បងម៉ាសុីន​ងូត​ទឹក​ដោយ​ស្វ័យ​ប្រវត្តិ Project Usoyaro ក្នុង​ឆ្នាំ ២០២៤ មុន​​ពេល​បើក​ដំណើរការ​ពាណិជ្ជកម្ម​នៅ​ឆ្នាំ​ ២០២៥ ។

ប្រភព៖ Skydoor