តារាម៉ូដែលស្រីជនជាតិជប៉ុន​បាន​ទទួល​មរណភាព​ក្នុង​ករណី​រត់​ជាន់​គ្នា​នៅ Itaewon ប្រទេសកូរ៉េ

នៅថ្ងៃទី ៣១ ខែតុលា NHK Japan បានរាយការណ៍ថាតារាម៉ូដែលស្រី Tomikawa Mei បានទទួលមរណភាពក្នុង​សោក​នាដកម្ម Halloween នៅ Itaewon (ប្រទេសកូរ៉េ) យប់ថ្ងៃទី ២៩ ខែតុលា។ លោក Tomikawa Ayumu ដែលជា​ឪពុក​របស់ជនរងគ្រោះ បានបញ្ជាក់ដំណឹងដ៏ក្រៀមក្រំដែលកូនស្រីរបស់គាត់បានទទួលមរណភាពក្នុងអាយុ ២៦ ឆ្នាំ​ប្រាប់​ព័ត៌មាន។

លោក Tomikawa Ayumu បន្ត​ថា Tomikawa Mei ផ្អាកការងារជាអ្នកបង្ហាញម៉ូដ ដោយ​បាន​ទៅ​សិក្សា​នៅ​ប្រទេស​កូរ៉េ​កាលពី​ខែ​មិថុនា។ លើក​ចុង​ក្រោយ​ដែល​លោក​បាន​ទាក់ទងទៅកូនស្រីនៅ​​វេលា​​ម៉ោង​ ៧ យប់​​ថ្ងៃ​​ទី​ ២៩ ខែតុលា។ ក្នុង​អំឡុង​ពេល​និយាយ​ទូរស័ព្ទកញ្ញា Tomikawa Mei បានប្រាប់ឪពុកថានាងនឹងចេញទៅក្រៅជាមួយបុរសជន​ជាតិ​បារាំង​ក្នុង​ឳកាស​បុណ្យ Halloween ។

“លោក Tomikawa Ayumu បានអោយដឹងថា ខ្ញុំអានព័ត៌មាន និងដឹងអំពីសោកនាដកម្មនៅ Itaewon ក្នុងរាត្រី Halloween ។ ភ្លាមៗនោះ ខ្ញុំទូរស័ព្ទ​ទៅអោយកូន​រាប់​សិប​ដង ប៉ុន្តែគ្មាននរណាម្នាក់ឆ្លើយតបទេ។ ប្តីប្រពន្ធខ្ញុំបួង​សួង​សុំ​ឱ្យ Tomikawa Mei បានសុវត្ថិភាព ទី​បំផុត​នៅ​តែ​គ្មាន​សង្ឃឹម។ ប៉ូលិសកូរ៉េបានលើកទូរស័ព្ទរបស់កូនស្រី។ ក្រោយ​​មក​​ក្រសួង​​ការ​​បរទេស​​ជប៉ុន​​បាន​បញ្ជាក់​ថាស្នាមម្រាមដៃរបស់ Tomikawa Mei ត្រូវ​នឹង​ជនរងគ្រោះ​ដែល​បាន​ស្លាប់” ។

គ្រួសារក្រៀមក្រំយ៉ាងខ្លាំងពេលដឹងថា Tomikawa Mei ទទួលមរណភាពក្នុងករណីរត់ជាន់គ្នានៅ Itaewon ។ រូបភាព៖ Japan Times

នៅល្ងាចថ្ងៃទី ៣១ ខែ​តុលា ឪពុក​ម្ដាយ​របស់កញ្ញា Tomikawa Mei បានទៅកាន់ប្រទេសកូរ៉េដើម្បី​ទទួល​សព​តារា​ម៉ូដែល​ស្រី។ នៅអាកាសយានដ្ឋាន លោក Tomikawa Ayumu មិនអាចទប់ទឹកភ្នែកបាន នៅពេលដែលសារព័ត៌មាន​សាក​សួរ។ លោកនិយាយថា បំណង​ធំ​បំផុត​របស់​គ្រួសារ​គឺ​ចង់​ឃើញ Tomikawa Mei ជា​លើក​ចុង​ក្រោយ ហើយ​​នាំ​​កូន​​ស្រី​​ត្រឡប់​ទៅ​ស្រុក​វិញ។

មុននោះសារព័ត៌មានក៏ធ្លាប់រាយការណ៍ករណីតារាល្បី ២ រូបដែលបានស្លាប់ដោយសារឧបទ្ទវហេតុនៅ Itaewon គឺតារា​ចម្រៀង​ប្រុស Lee Ji Han តារាស្រី Kim Yuna ។ បើតាម Yahoo Japan ជប៉ុនកត់សម្គាល់ជនរងគ្រោះ ២ នាក់បាន​ស្លាប់​ក្នុងឧបទ្ទវហេតុនេះ។ ក្រៅពីកញ្ញា Tomikawa Mei ជនរងគ្រោះម្នាក់ទៀតជានិស្សិតស្រីអាយុ ១៨ ឆ្នាំ។

យប់ថ្ងៃទី ២៩ ខែតុលា មនុស្សរាប់ម៉ឺននាក់ប្រមូលផ្តុំគ្នាទៅកាន់ Itaewon ដើម្បីចូលរួមពិធីបុណ្យ Halloween ។ សោកនាដកម្មបានកើតឡើងនៅពេលដែលមនុស្សជាច្រើនឈរប្រជ្រៀតគ្នាក្នុងផ្លូវតូចមួយជិតសណ្ឋាគារ Hamilton ។

រូបភាព៖ Japan Times

យោងទៅតាម Korea Times គិតត្រឹមម៉ោង ១០ យប់ ថ្ងៃទី ៣០ ខែតុលា ក្រុមមន្ត្រីបានបញ្ជាក់ថា មនុស្សចំនួន ១៥៤ នាក់បានស្លាប់ (ស្ត្រី ៩៨ នាក់ បុរស ៥៦ នាក់) និង ១៣៣ នាក់ផ្សេងទៀតរងរបួស ជនរងគ្រោះភាគច្រើនស្ថិត​ក្នុង​វ័យ​ជំទង់។ ដោយសារតែអ្នករបួសមួយចំនួនស្ថិតក្នុងស្ថានភាពធ្ងន់ធ្ងរ ដូច្នេះចំនួនអ្នកស្លាប់​អាច​នឹង​កើន​ឡើង។

បច្ចុប្បន្ននេះ រាល់សកម្មភាពកម្សាន្ត និងព្រឹត្តិការណ៍វប្បធម៌ក្នុងប្រទេសកូរ៉េសុទ្ធតែត្រូវលុបចោល ឬពន្យារពេលក្នុង​អំឡុង​ពេល​កាន់​ទុក្ខជាតិ ដើម្បីរំលឹកដល់ជនរងគ្រោះ និងចូលរួមរំលែកទុក្ខដល់ក្រុមគ្រួសាររបស់ពួកគេក្នុងហេតុ​ការណ៍​រត់ជាន់​គ្នានេះ។

ប្រភព៖ Skydoor