ចំនួន​សិស្ស​បឋមសិក្សា និង​មធ្យមសិក្សាជប៉ុន​ឈប់រៀនកើន​ឡើង​​ខ្ពស់

នៅថ្ងៃទី ២៧ ខែតុលា រដ្ឋាភិបាលជប៉ុនបានប្រកាសទិន្នន័យដែលបង្ហាញថាក្នុងឆ្នាំសារពើពន្ធ ២០២១ សិស្សបឋមសិក្សា និងមធ្យមសិក្សាសរុបចំនួន ២៤៤.៩៤០ នាក់ឈប់រៀនចាប់ពី ៣០ ថ្ងៃឡើងទៅ កើន ២៤,៩% ធៀបនឹងឆ្នាំមុន ហើយ​នេះជាកម្រិតខ្ពស់បំផុតដែលមិនធ្លាប់មាន។

ក្រៅពីតួលេខខាងលើ សិស្សចំនួន ៧១.៧០៤ នាក់ឈប់រៀនចាប់ពី ៣០ ថ្ងៃឡើងទៅ ដោយសារមានការព្រួយបារម្ភចំពោះ​ជំងឺ​រាត​ត្បាត​កូវីដ ១៩ ។

យោងទៅតាមស្ថិតិ សិស្សបឋមសិក្សាចំនួន ៨១.៤៩៨ នាក់ឈប់រៀនច្រើនដូចខាងលើ ស្មើនឹង ១,៣% នៃចំនួនសិស្សបឋមសិក្សាសរុបនៅជប៉ុន កើនឡើង ៤ ដងបើធៀបនឹង ១០ ឆ្នាំមុន។

ទន្ទឹមនឹងនេះ ចំពោះកម្រិត​មធ្យមសិក្សា​ទុតិយភូមិ​មាន​សិស្ស​ចំនួន ១៦៣.៤៤២ នាក់ ស្មើនឹង ៥% នៃចំនួនសិស្សសរុបក្នុងកម្រិតនេះ កើនឡើង​ទ្វេ​ដង​បើធៀប​នឹង ១០ ឆ្នាំមុន។ ចំពោះសាលាវិទ្យាល័យ ចំនួនសិស្សឈប់ចាប់ពី ៣០ ថ្ងៃឡើងស្មើនឹងកម្រិតមុនកូវីដ ១៩ ដែលមានសិស្សប្រមាណ ៥០.០០០ នាក់។

មន្ត្រីម្នាក់មកពីក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យាជប៉ុនបានអោយដឹងថា ការរឹតបន្តឹងលើសកម្មភាព​កីឡា ឬដំណើរកំសាន្តត្រូវគេចាត់ទុកជាមូលហេតុ​កាត់បន្ថយចិត្តចង់ទៅសាលារបស់សិស្ស។ ក្រៅពីនេះ សិស្ស​​ក៏​​​មាន​​​ការ​​​លំបាក​​ពេល​​វិល​​​ទៅ​​រក​ជីវិត​ធម្មតា​វិញដែរ។

ចំពោះភាគីសាលារៀន ៤៩,៧% យល់ថាមូលហេតុដែលធ្វើអោយសិស្សឈប់រៀនច្រើន ដោយសារប្អូនៗ “ព្រួយបារម្ភ” ១១,៧% បាននិយាយថាមក​ពី​ការ​រំខាន​ក្នុងជីវិតប្រចាំថ្ងៃ និងបញ្ហាផ្សេងទៀតដែលមិនពាក់ព័ន្ធករណីវាយធ្វើបាប​គឺ ៩,៧%។

ប្រភព៖ Skydoor