តារាសម្តែងប្រុស Ozawa Ren ចង់ត្រឡប់មករកវិស័យសិល្បៈវិញក្រោយករណីរឿងអាស្រូវរំលោភបំពានផ្លូវភេទ

តារាសម្តែង Ozawa Ren បានប្រកាសនៅលើ Twitter ថា គាត់កំពុងព្យាយាមត្រលប់មក Showbiz វិញ ប៉ុន្តែទស្សនិក​ជន​ភាគ​ច្រើនហាក់ដូច​ជា​គ្មាន​បំណង​អភ័យ​ទោស​ចំពោះ​អ្វី​ដែល​គាត់​បាន​ធ្វើ​នោះ​ទេ។

កាលពី ២ ឆ្នាំមុន តារាសម្ដែង Ozawa Ren បានបោះបង់អាជីពខាងវិស័យសិល្បៈ បន្ទាប់​ពី​សារព័ត៌មានលាតត្រដាង​ព័ត៌​មាន​មិន​គួរ​អោយជឿទាក់ទងនឹងទង្វើរបស់តារាសម្តែងរូបនេះ។ ក្រោយរយៈពេល ២ ឆ្នាំ គាត់មានបំណង​ចង់​វិល​ត្រឡប់​មក​វិញ ប៉ុន្តែសហគមន៍ Twitter បង្ហាញប្រតិកម្មយ៉ាងខ្លាំង។ ទាំងនេះជាព័ត៌មាន​មួយ​ចំនួន​ទាក់​ទង​នឹង​ហេតុ​ការណ៍កន្លង​មក ក៏ដូចជារឿងរ៉ាវបានផ្លាស់ប្តូរអាកប្បកិរិយារបស់ប្រជាជនចំពោះជនល្មើសផ្លូវ​ភេទ។

រឿងអាស្រូវរបស់ Ozawa

Ozawa Ren (小澤廉) ល្បីដោយសារចូលសម្តែងក្នុងរឿង Kamen Rider ។ ចាប់តាំងពីពេលនោះមក គាត់ត្រូវបានគេស្គាល់ចំពោះការ​សម្តែង​លើ​ឆាក 2.5D ។

នៅឆ្នាំ ២០២០ Bunshun Online បានលាតត្រដាងទង្វើគួរឱ្យខ្លាចរបស់តារាសម្តែងប្រុសជា​សាធារណៈ។ ជាក់ស្តែង Bunshun បាន​អោយ​ដឹង​ថា Ozawa រួមភេទជាមួយសិស្សស្រីវិទ្យាល័យ (នារីក) ក្នុងនោះរួមមានភស្តុតាងជាច្រើនពីក្រុមគ្រួសារ និងមិត្តភ័ក្តិរបស់នារីក រួមទាំងការសន្ទនារបស់ពួកលើបណ្តាញសង្គម Line ។ មិត្តម្នាក់របស់នារីកបានណែនាំនាងស្គាល់ Ozawa ក្នុងពិធីជប់លៀងមួយ។ នៅពេលនោះ Ozawa ខំប្រឹងបង្ហាញថាខ្លួនជាបុរសល្អឥតខ្ចោះម្នាក់ ប៉ុន្តែផ្ទុយទៅវិញគាត់ប្រៀបដូចជាសត្វចម្លែក។ Ozawa តែងតែធ្វើបាបនារីក ដោយបន្សល់ទុកស្នាមជាំនៅលើខ្លួនរបស់នាង។ ក្នុងឯកសារ Ozawa ហៅសិស្សស្រីនោះថា “pet” (សត្វចិញ្ចឹម​) ហើយនិយាយអំពី “ការបង្វឹក” នាង។ អ្នកទាំងពីរបានចាប់ផ្តើមរស់នៅជាមួយគ្នានៅឆ្នាំ ២០១៩ នៅពេលដែលនារីកមានផ្ទៃពោះ ទំនោរ​ហឹង្សារ​បស់ Ozawa កាន់តែច្រើនឡើង គាត់បានបង្ខំសិស្សស្រីរំលូតកូន។ រងទុក្ខទាំងផ្លូវកាយ និងផ្លូវចិត្តបណ្តាលអោយ​នារី​ក​គិត​ចង់​ធ្វើ​អត្តឃាត។

ការវិលត្រឡប់មកវិញរបស់ Ozawa Ren

ភស្តុតាង​ដែល Bunshun ចង្អុលបង្ហាញច្រើនរហូតដល់ថ្នាក់ Ozawa Ren មិន​អាច​ប្រកែក​បាន។ បន្ទាប់ពីករណីរឿង​​អាស្រូវ​​នេះ គាត់​ត្រូវ​បង្ខំ​ចិត្ត​ឈប់​ធ្វើ​ការ។ ទោះ​ជា​យ៉ាង​ណា អ្វី​គួរ​ឱ្យ​កត់​សម្គាល់​គឺថា Ozawa មិនធ្លាប់ប្រឈម​មុខ​​នឹង​​ការ​​ចោទ​​ប្រកាន់​​ព្រហ្មទណ្ឌ​​ណា​​មួយ​​ឡើយ។

ថ្មីៗនេះ Ozawa បានបង្ហាញខ្លួនឡើងវិញនៅលើ Twitter ជាមួយនឹងសំបុត្រសរសេរដៃ។ ក្នុង​​នោះ គាត់​​បាន​​និយាយ​​ថា “ខ្ញុំ​​បាន​​ចំណាយ​​ពេល ២ ឆ្នាំដើម្បី​វិភាគ​ខ្លួន​ឯង ដោយ​ក្រឡេក​ទៅ​មើល​ភាព​មិនទាន់ពេញវ័យ និងចំណុច​ខ្សោយ​របស់​ខ្លួន។ ខ្ញុំពិតជាសុំទោសដោយស្មោះ” ។ Ozawa បញ្ចប់សំបុត្រដោយថ្លែងអំណរគុណចំពោះអ្នកដែល​បាន​គាំទ្រ ហើយបាននិយាយថាគាត់គ្រោងនឹងត្រលប់មកសម្តែងវិញ។

ការឆ្លើយតបរបស់អ្នកប្រើបណ្តាញសង្គមចំពោះ Tweet នេះបង្ហាញថា ភាគច្រើនមិនទទួលស្វាគមន៍ចំពោះការ​វិល​ត្រឡប់​មក​វិញ​របស់តារាសម្តែងរូបនេះទេ។ កំពូលមតិយោបល់ដែលមានជាង ១២,០០០ Like បានអោយដឹងថា “ព្រោះ​តែ​ស្រលាញ់ និងគាំទ្រអ្នក ទើបខ្ញុំមិនចង់អោយអ្នកវិលត្រឡប់មកវិញ។ អ្នកមិនអាចបិទបាំងបញ្ហានេះ ដោយ​គ្រាន់​តែ​ចាត់ទុកនោះជាចំណុចខ្សោយរបស់ខ្លួនឡើយ។ ខ្ញុំគិតថាខ្លួនមានសិទ្ធិដាក់កំហិតដោយ​សារ​តែ​ពេល​វេលា និង​​ប្រាក់​ដែល​​ខ្ញុំ​ខ្ជះខ្ជាយ​លើ​អ្នក។ ខ្ញុំ​រង់ចាំ​ចម្លើយ​របស់​អ្នក” ។

ប្រតិកម្មរបស់ប្រជាជនជប៉ុនចំពោះជនល្មើសផ្លូវភេទ

សកម្មជនជប៉ុនមានការរិះគន់យ៉ាងខ្លាំងមកលើអាកប្បកិរិយាប្រទេសចំពោះបទល្មើសផ្លូវភេទ ជាពិសេសករណី​ជន​រង​គ្រោះ​មិន​ទាន់​គ្រប់​អាយុ។ ចៅក្រមជាច្រើននាក់បានអោយដឹងជនរងគ្រោះមិនអាច “បញ្ជាក់” ថាពួកគេមិនយល់ព្រមចំពោះសកម្មភាពរួមភេទ ទោះបីជាជនល្មើស​ជា​ឪពុក​ម្តាយ​របស់​ជន​រង​គ្រោះ​ក៏ដោយ។ សូម្បី​តែ​សាលា​ជប៉ុន​ក៏​មាន​រឿង​អា​ស្រូវ​ផ្លូវ​ភេទ​រវាង​គ្រូ និងសិស្សផងដែរ។

ទោះជាយ៉ាងណា នៅតែមានចំណុចវិជ្ជមានបង្ហាញថាគ្រប់យ៉ាងកំពុងផ្លាស់ប្តូរ។ Ito Shiori នាំយកចលនា #MeToo ដោយ​ទាក់​ទាញ​ការ​យកចិត្តទុកដាក់ចំពោះទង្វើមិនអើពើករណីរំលោភផ្លូវភេទលើស្រ្តី។

បច្ចុប្បន្នសាធារណជន​ជប៉ុន​មានប្រតិកម្ម​យ៉ាងខ្លាំង​ចំពោះ​ករណីពាក់ព័ន្ធ។ ករណី​តារា​សម្ដែងប្រុស Kagawa Teruyuki បៀតបៀនបុគ្គលិកស្រីម្នាក់នៅ Ginza ជា​ឧទាហរណ៍​ស្រាប់។ Kawaga ធ្លាប់ព្យាយាមវិលត្រឡប់មកវិញដោយ​សុំ​ទោស​នៅ​លើ​ការ​ផ្សាយ​បន្ត​ផ្ទាល់ ប៉ុន្តែបរាជ័យ ហើយមិនទទួលបានការអញ្ជើញណាមួយឡើយ។

Sacchan