ចាប់ពីថ្ងៃទី ១១ នេះតទៅជប៉ុនលុបចោលវិធានការព្រំដែនសម្រាប់ភ្ញៀវទេសចរណ៍អន្តរជាតិ

ចាប់ពីថ្ងៃទី ១១ ខែតុលា ឆ្នាំ ២០២២ នេះជប៉ុនបើកទទួលភ្ញៀវទេសចរណ៍អន្តរជាតិ ជាជាងកំណត់ត្រឹម​ ៥០.០០០ នាក់​ក្នុង​មួយ​ថ្ងៃ ក៏​ដូច​ជា​លុប​ចោល​ការដាក់កំហិតលើការធ្វើដំណើរបុគ្គល និងរឹតបន្តឹងការធ្វើដំណើរ​ដោយ​គ្មាន​ទិដ្ឋាការ។

ជប៉ុនក៏បានបន្តកម្មវិធីលើកលែងទិដ្ឋាការស្នាក់នៅរយៈពេលខ្លីសម្រាប់ប្រជាជនមកពី ៦៨ ប្រទេស និងដែនដី រួម​ទាំង​សហរដ្ឋ​អាមេរិក កូរ៉េ និង​ចក្រ​ភព​អង់​គ្លេស​ផងដែរ។

បុគ្គលដែលចូលប្រទេសមិនចាំបាច់ធ្វើ​តេស្ដ​រកកូវីដនោះទេ ប្រសិន​បើ​ពួក​គេ​មិន​មាន​រោគ​សញ្ញាដែលសង្ស័យថាឆ្លង ដូច​ជា​គ្រុន​ក្តៅ ហើយក៏មិនចាំបាច់ដាក់ឱ្យនៅដាច់ដោយឡែកពេលឆ្លងដែនដែរ។

ទោះជាយ៉ាងណា អ្នកដំណើរដែលចូលប្រទេសនៅតែត្រូវបង្ហាញប័ណ្ណចាក់វ៉ាក់សាំងចំនួន ៣ ដង ឬលទ្ធផលតេស្តអវិជ្ជមាន​ក្នុង​រយៈ​ពេល ៧២ ម៉ោង​មុនពេលចេញដំណើរ។

ជប៉ុនបានដាក់កំហិតជាច្រើនចំពោះការចូលប្រទេសចាប់ពីខែកុម្ភៈ ឆ្នាំ ២០២០ ខណៈដែលជប៉ុនហាមឃាត់ចំពោះ​ជន​បរទេស​ដែល​ទៅ​លេងខេត្ត Hubei ប្រទេស​ចិន។

ប្រភព៖ NHK