សាកសពកុមារីអាយុ ៧ ឆ្នាំត្រូវបានរកឃើញក្រោយរយៈពេល ២ សប្តាហ៍​បាត់​ខ្លួន

រូបភាពចុងក្រោយរបស់កុមារីដែលត្រូវបានថតដោយកាមេរ៉ាសុវត្ថិភាព។

សាកសព​ក្មេង​ស្រី​ត្រូវ​បាន​រក​ឃើញក្រោយពេលស្វែងរកអស់​រយៈ​ពេល​ ២​ សប្តាហ៍។

ម្សិលមិញថ្ងៃទី ៦ ខែតុលា ប្រព័ន្ធផ្សព្វផ្សាយជប៉ុនបានអោយដឹង ប៉ូលិសបានបញ្ជាក់ថាសាកសពកុមារី Saya Minami (អាយុ ៧ ឆ្នាំ) ដែល​​​បាន​​​បាត់​​ខ្លួន​​កន្លះ​​ខែ​មុន​ត្រូវ​បានរកឃើញ។

មុននោះនៅថ្ងៃទី ៤ ខែតុលា សាកសពក្មេងស្រីមិនស្គាល់អត្តសញ្ញាណម្នាក់ត្រូវបានគេប្រទះឃើញនៅតំបន់ទន្លេ Edogawa ។ លក្ខណៈ​រាង​កាយ និងសម្លៀកបំពាក់របស់ក្មេងស្រីស្រដៀងទៅនឹង Saya Minami ។

នៅពេលនោះ ក្រុមគ្រួសាររបស់ Saya Minami បានបន្ត​ថា​ពួកគេ​កំពុង​រង់ចាំការសន្និដ្ឋានជាផ្លូវការពីប៉ូលិស។ ទោះ​ជា​លទ្ធផល​យ៉ាង​ណា​ក្តី គ្រួសារកុមារីអរគុណអ្នកទាំងអស់គ្នាដែលបានយកចិត្តទុកដាក់ និងតាមដានករណីនេះ​កន្លង​មក។

ប៉ូលិស​ជប៉ុន​បាន​អោយដឹងថា លទ្ធផល​តេស្ត DNA របស់សាកសពត្រូវនឹងកុមារីដែលបានបាត់ខ្លួន។ ព័ត៌មាន​នេះ​បាន​ធ្វើ​អោយអ្នកដែលតាមដាន​ហេតុ​ការណ៍​​ពិបាក​ចិត្តយ៉ាងខ្លាំង ព្រោះលែងមាន​អព្ភូតហេតុ​កើតឡើងទៀតហើយ។ សាក​សព​ត្រូវបានគេរកឃើញនៅកន្លែងដែលប៉ូលីសប្រទះឃើញ​ស្បែក​ជើង និង​ស្រោម​ជើងកុមារីប្រហែល ១៥ គីឡូម៉ែត្រ។

រូបភា៖ Kyodo

កាលពីថ្ងៃទី ៣ ខែតុលា បុរស​ម្នាក់​ជិះ​កង់​បាន​រាយការណ៍​ទៅ​កាន់ប៉ូលិស មានអ្វីម្យ៉ាងមិនធម្មតាអណ្តែតក្នុងទន្លេ Edogawa ។ មួយ​ថ្ងៃ​ក្រោយ​មក ប៉ូលិស​បាន​រក​ឃើញ​សាក​សព​របស់​កុមារី Saya ។

ប្រព័ន្ធផ្សព្វផ្សាយក្នុងស្រុកបានរាយការណ៍ លទ្ធផល​ធ្វើ​កោសល្យ​វិច័យ​បានបង្ហាញ​ថា មូលហេតុ​នៃ​ការ​ស្លាប់​ប្រហែល​មកពី​លង់ទឹក។ ក្រៅពីនេះ មិនមានរបួសស្នាមដែលបង្ហាញថារងអំពើ​ហឹង្សា ឬ​ការ​វាយដំពេលក្មេងស្រីស្លាប់នោះទេ។ ប៉ូលិស​​បាន​​និយាយ​​ថា ពួកគេ​កំពុង​បន្ត​ស៊ើបអង្កេត​លើ​ហេតុការណ៍​នេះ​។

កុមារី Saya Minami បាន​បាត់​ខ្លួន​កាលពី​ថ្ងៃ​ទី ​២៣ ខែកញ្ញា នៅពេលដែលប្អូន និងម្តាយគ្រោងនឹងទៅលេងសួនក្បែរផ្ទះ។ ទោះជាយ៉ាងណា កុមារីអាយុ ៧ ឆ្នាំបានចាកចេញពីផ្ទះមុនម្តាយប៉ុន្មាននាទី ហើយនិយាយថានឹងជួប​ម្តាយ​នៅ​សួន​​ច្បារ។ ប្រហែល ៥ នាទីក្រោយមកអ្នកម្តាយទៅដល់កន្លែងណាត់ជួប ប៉ុន្តែមិនឃើញកូនស្រីនោះទេ។

ប្រជាជនដាក់ផ្ការំលឹកដល់កុមារី។

នៅថ្ងៃដដែលនោះ ប៉ូលិសបានរកឃើញកង់ដែលកុមារីជិះ។ នៅថ្ងៃបន្ទាប់ ស្បែកជើង និងស្រោមជើងរបស់ Saya ត្រូវ​បាន​គេ​ប្រទះ​ឃើញ​នៅ​មាត់​ទន្លេ ដែល​មាន​ចម្ងាយ​ពី​ឧទ្យាន​ប្រហែល ៣០០ ម៉ែត្រ។ ប៉ូលិសបានប្រមូលផ្តុំអ្នក​ជួយ​សង្គ្រោះ ១២០ នាក់ ដោយ​ប្រើ​ឧទ្ធម្ភាគចក្រ និង​អ្នក​មុជទឹក​ដើម្បី​ស្វែង​រក​ក្មេងស្រី។ កាមេរ៉ាសុវត្ថិភាពនៅតាមផ្លូវ​ក្បែរ​នោះ​ក៏​បានចាប់យករូបភាពចុងក្រោយរបស់ Saya ពេលប្អូនកំពុងធ្វើដំណើរចេញពីផ្ទះ។

ករណីកុមារី Saya បាន​ទាក់ទាញ​ការ​ចាប់អារម្មណ៍របស់សាធារណជនកន្លងមក។ ប៉ូលិសក៏បានអំពាវនាវឱ្យប្រជា​ពល​រដ្ឋជួយស្វែងរកតម្រុយរបស់ជនរងគ្រោះផងដែរ។ ក្រោយកើតហេតុ អ្នកជំនាញជាច្រើនបានព្រមានឪពុកម្តាយ​​មិន​គួរ​ទុកអោយកូនចេញក្រៅតែម្នាក់ឯងទេ ជាពិសេសតំបន់ក្បែរទន្លេ និង​បឹង។

ប្រភព៖ FNN, Yahoo Japan, Kyodo