នាយករដ្ឋមន្ត្រីជប៉ុនលើកកូនប្រុសច្បងរបស់ខ្លួនធ្វើ​​​ជា​ជំនួយ​ការ​ជាន់​​ខ្ពស់​ ដែល​បណ្តាលឱ្យមានពាក្យចចាមអារ៉ាមអ្នកស្នងតំណែង

នាយករដ្ឋមន្ត្រីជប៉ុនលោក Kishida Fumio បាន​លើក​កូនប្រុសច្បងរបស់ខ្លួន Kishida Shotaro ធ្វើជា​ជំនួយ​ការជាន់ខ្ពស់ទទួលបន្ទុកកិច្ចការបរទេស។

នេះ​បើ​តាម Asahi កាលពីថ្ងៃទី ៤ ខែតុលា (ម៉ោងក្នុងស្រុក) នាយករដ្ឋមន្ត្រីជប៉ុនលោក Kishida Fumio បានតែង​​តាំង​កូន​ប្រុស​ច្បងរបស់ខ្លួនធ្វើជាជំនួយការជាន់ខ្ពស់។ រឿងនេះ​បាន​​បណ្តាលឱ្យ​មានពាក្យចចាមអារ៉ាមបុរស​វ័យ ៣១ ឆ្នាំ​ត្រៀម​ខ្លួន​បន្ត​អាជីព​នយោបាយ​របស់​ឪពុកនាពេល​អនាគត។

ការិយាល័យនាយករដ្ឋមន្ត្រីបានអោយដឹងលោក Kishida Shotaro ត្រូវបានតែងតាំងជា​ជំនួយការ​ជាន់​ខ្ពស់របស់នាយក​រដ្ឋមន្ត្រី ដែល​ទទួល​បន្ទុកកិច្ចការបរទេស។

កូនប្រុសច្បងរបស់លោក Kishida Fumio ធ្លាប់មានបទពិសោធធ្វើការនៅការិយាល័យនាយករដ្ឋមន្ត្រី។ មុខតំណែង​ថ្មី​អនុញ្ញាត​ឱ្យគាត់ចូលរួមដំណើរទៅក្រៅប្រទេស ជួបថ្នាក់ដឹកនាំពិភពលោក ហើយបានឃើញដំណើរការចរចា​អន្តរ​ជាតិ។

Kishida Shotaro កូនប្រុសច្បងរបស់នាយករដ្ឋមន្ត្រីជប៉ុន Kishida Fumio ។ រូបភាព៖ Asahi

តាមពិតទៅ “កូនស្នងតំណែងឪពុក” ជាទំនៀមទំលាប់​យូរមកហើយក្នុងនយោបាយជប៉ុន។ អតីតនាយករដ្ឋមន្ត្រី Abe Shinzo ក៏​ធ្លាប់​ធ្វើជាជំនួយការឪពុករបស់ខ្លួនដែរ លោកធ្លាប់កាន់តំណែងរដ្ឋមន្ត្រីការបរទេសជប៉ុន។

អ្នកកាន់តំណែងមុនលោក Kishida អតីតនាយករដ្ឋមន្ត្រី Suga Yoshihide ជាអ្នកដឹកនាំតែមួយគត់នៃគណបក្សប្រជាធិបតេយ្យសេរីដែលគ្មាន​ប្រវត្តិ​មក​ពី​គ្រួសារ​នយោបាយអំឡុងពេល ២ ទសវត្សរ៍កន្លងមកនេះ។ ឪពុករបស់​លោក Suga ជា​កសិករ​ដាំ​ផ្លែស្ត្របឺរី។

ការតែងតាំងលោក Kishida Shotaro ទទួលរងមតិរិះគន់មួយចំនួន ខណៈដែលកម្រិតជឿទុកចិត្តនាយករដ្ឋមន្ត្រី Kishida កំពុង​ធ្លាក់​ចុះ​ដោយ​សារ​តែអតិផរណា។ យ៉ាង​ណា​មិញ រដ្ឋាភិបាល​ជប៉ុន​បាន​អះអាងថា “ការ​ជ្រើសរើសអាស្រ័យ​​លើ​​បុគ្គលិក​​​លក្ខណៈ និង​​សមត្ថភាព មិន​មាន​ហេតុ​ផល​ផ្សេង​​ទៀត​​ឡើយ” ។

ប្រភព៖ Skydoor