ជប៉ុនរឹតបន្តឹងសន្តិសុខដើម្បីធានា​សុវត្ថិភាព​​ពិធី​បុណ្យសព​​របស់អតីត​​នាយក​រដ្ឋមន្ត្រី​ Abe Shinzo

ជប៉ុនកំពុងរឹតបន្តឹងសន្តិសុខ​ដើម្បី​រៀបចំ​ពិធីបុណ្យ​សពថ្នាក់ជាតិសម្រាប់អតីតនាយករដ្ឋមន្ត្រី Abe Shinzo ដែលនឹង​ប្រព្រឹត្ត​ទៅ​នៅ​ថ្ងៃ​ទី ២៧ ខែកញ្ញា។

ក្នុង​សន្និសីទ​កាសែត​កាលពីថ្ងៃទី ២២ ខែកញ្ញា ប្រធានខុទ្ទកាល័យលោក Matsuno Hirokazu បានអោយដឹងថា ភ្ញៀវ​ក្នុង​ស្រុក​ប្រមាណ ៣.៦០០ នាក់ និងភ្ញៀវអន្តរជាតិចំនួន ៧០០ នាក់នឹងចូលរួមពិធីបុណ្យសពថ្នាក់ជាតិរបស់លោក Abe នៅ Nippon Budokan ទីក្រុង​តូក្យូ នៅថ្ងៃទី ២៧ ខែកញ្ញា។

ដើម្បី​ធានា​សុវត្ថិភាពអំឡុង​ពេល​ព្រឹត្តិការណ៍ រដ្ឋាភិបាលជប៉ុនកំពុងត្រៀមរៀបចំសកម្មភាពជាច្រើន។

ការចំណាយដែលគ្រោងទុកចំនួន ១,៦៥ ពាន់លានយ៉េន (១១,៥ លានដុល្លារ) ដើម្បីរៀបចំពិធីបុណ្យសពថ្នាក់ជាតិ រដ្ឋាភិបាល​ជប៉ុន​បាន​ចំណាយ​ជិតពាក់កណ្តាលប្រមាណ (៨០០ លានយ៉េន) សម្រាប់សន្តិសុខ និង ៦០០ លានយ៉េនសម្រាប់​ទទួល​គណៈ​ប្រតិភូ​អន្តរ​ជាតិ។

ប្រជាជន​ដាក់​កម្រង​ផ្កា​រំលឹក​ដល់​អតីត​នាយក​រដ្ឋមន្ត្រី​ជប៉ុន Abe Shinzo នៅ​ទីក្រុង​តូក្យូកាលពីខែ​កក្កដា។ រូបភាព៖ Reuters

បើ​តាម​គម្រោង ផ្លូវនៅជុំវិញ Nippon Budokan ត្រូវបិទអំឡុងពេលប្រារព្ធពិធីបុណ្យសព។ ដែនអាកាស​ក្នុង​តំបន់ ៤៦ គីឡូម៉ែត្រ​ជុំវិញ​​ក៏​ត្រូវ​បាន​ដាក់​កំហិត​ផង​ដែរ ចាប់ពី​ថ្ងៃ​ទី ២៦ ដល់ ២៨ ខែ​​កញ្ញា។

ចាប់ពីម៉ោង ១០ ព្រឹក ថ្ងៃទី ២៧ ខែកញ្ញា ប្រជាជនត្រូវបានអនុញ្ញាតឱ្យដាក់កម្រងផ្កាគោរពវិញ្ញាណក្ខន្ធអតីតនាយក​រដ្ឋមន្ត្រី​ជប៉ុន​នៅទីតាំងមួយចំនួនជិតកន្លែងប្រារព្ធពិធីបុណ្យសព ប៉ុន្តែត្រូវតែឆ្លងកាត់ការត្រួតពិនិត្យកាបូប របស់​របរ​ផ្ទាល់​ខ្លួន ហើយអាចនឹងត្រូវស្នើអោយឆ្លងកាត់ច្រកឧបករណ៍ចាប់លោហៈ។

ជប៉ុនប្រមូលផ្តុំប៉ូលិសរាប់ម៉ឺននាក់ រួមទាំងប៉ូលិសចំនួន ២.៥០០ នាក់មកពីតំបន់ផ្សេងទៀតទៅកាន់ទីក្រុងតូក្យូ ដើម្បីធានាសន្តិសុខក្នុងអំឡុងពេល​ព្រឹត្តិ​ការណ៍​។ ប៉ុន្មានថ្ងៃកន្លងមកនេះ ប៉ូលិស​ប្រើ​ឆ្កែ​ហិត​ក្លិនល្បាត​នៅ​ស្ថានីយ​​រថភ្លើង និង​​អាកាស​យានដ្ឋាន Haneda នៅទីក្រុង​តូក្យូ។

ប៉ូលិស​ជប៉ុន​ក៏​កំពុង​ដើរ​ល្បាត​តាម​ផ្លូវ​ហាយវេ​ ស្ថានទូត និងផ្ទះសំណាក់ដែលទទួលគណៈប្រតិភូអន្តរជាតិនៅទីក្រុង​​តូក្យូ។ បុគ្គលិក​យោធា​ជប៉ុន​ជាង ១.០០០ នាក់ក៏​ត្រូវ​បាន​ដាក់​ពង្រាយ​ក្នុងពិធីកាន់ទុក្ខ​ជាតិ​របស់​លោក Abe ផង​ដែរ។ តាមការរំពឹងទុកអំឡុងពេលប្រារព្ធពិធី វង់តន្រ្តីយោធានឹងលេងភ្លេងក្នុងពិធីបុណ្យសព និងបាញ់កាំភ្លើង​ចំនួន ១៩ គ្រាប់ ដើម្បីរំលឹកដល់អតីតនាយករដ្ឋមន្ត្រីលោក Abe ។

ប្រភព៖ Skydoor