CEO សាជីវកម្មប្រេងជប៉ុន​លាលែងពីតំណែងក្រោយ​ពេល​បែក​​ធ្លាយ​​​រឿង​​អាស្រូវ​​រំលោភ​ផ្លូវ​ភេទ

នៅថ្ងៃទី ២១ ខែកញ្ញា សាជីវកម្មប្រេងយក្សជប៉ុន Eneos Holdings បាន​បញ្ជាក់​ជា​ផ្លូវ​ការ​ចំពោះ​​ការ​សម្រេច​​ចិត្តលាលែង​​ពី​តំណែង​ភ្លាមៗក្នុងខែ​សីហា ឆ្នាំ​ ២០២២ របស់ប្រធាន និងនាយកប្រតិបត្តិលោក Tsutomu Sugimori បន្ទាប់​ពី​ករណី​រឿងអាស្រូវផ្លូវភេទ។

កាលពីថ្ងៃទី ១២ ខែសីហា សាជីវកម្មប្រេងយក្ស Eneos Holdings (ជប៉ុន) បានអោយដឹង CEO ដែលកំពុងកាន់តំណែង លោក Tsutomu Sugimori បានសម្រេចចិត្តលាលែងពីតំណែងភ្លាមៗ ដោយសារតែ “ហេតុផលផ្ទាល់ខ្លួន” ។ ព័ត៌មាន​លម្អិត​មិនត្រូវបានបង្ហើបរហូតដល់ថ្ងៃទី ២១ ខែកញ្ញា។

អាស្រ័យហេតុនេះ សេចក្តីប្រកាសរបស់ Eneos បានអោយដឹងថា អតីតនាយកប្រតិបត្តិលោក Tsutomu Sugimori មាន​អាកប្បកិរិយា​មិន​សមរម្យ ផ្ទុយ​នឹង​តម្លៃ​សិទ្ធិ​មនុស្ស​ដែល​សាជីវកម្មបាន​ដាក់​ជា “អាទិភាព​ដាច់​ខាត” ។

បើតាមទស្សនាវដ្ដី Shukan Shincho កាលពីថ្ងៃទី ៧ ខែកក្កដា ឆ្នាំ ២០២២ លោក Sugimori បានចាប់រំលោភ និងបង្ខំថើបបុគ្គលស្រីហាងបារនៅខេត្ត Okinawa ។ ជន​រង​គ្រោះរង​របួស​អំឡុងពេលព្យាយាមប្រឆាំង។

យោងទៅតាម Eneos សាជីវកម្មសម្រេចមិនប្រកាសជា​សាធារណៈរហូតមកដល់ពេលនេះ ដើម្បីការពារសិទ្ធិឯកជនរបស់ជនរងគ្រោះ។

តាំងពីឆ្នាំ ២០១៧ ចលនាសង្គម #MeToo បានរំដោះជនរងគ្រោះករណីអំពើហិង្សាផ្លូវភេទជាច្រើនជុំវិញពិភព​លោក។ ទោះ​ជា​យ៉ាង​ណា នៅ​ជប៉ុន​ចលនា​នេះ​មិនខ្លាំងក្លាដូចនៅប្រទេសដទៃ​ទៀត​ឡើយ។

ឧទាហរណ៍ថ្មីៗនេះ អតីតទាហានស្រីនៃកងកម្លាំងស្វ័យការពារជប៉ុនបានចោទប្រកាន់ជាសាធារណៈចំពោះករណីរំលោភ​ផ្លូវ​ភេទលើជនរងគ្រោះផ្ទាល់អំឡុងពេលហ្វឹកហាត់នៅឆ្នាំ ២០២១ ។ រដ្ឋមន្ត្រីក្រសួងការពារជាតិជប៉ុនបានបន្ត​ស៊ើប​អង្កេត បំភ្លឺ និង​ពិចារណា​លើករណីស្រដៀងគ្នាជាច្រើនទៀតក្រោយពេលលាតត្រដាង។

ប្រភព៖ Skydoor