ការតស៊ូស្វែងរកការពិតរបស់ឪពុកម្តាយកុមារីលង់ទឹកនៅអាងហែលទឹកសាលាបឋមសិក្សាជប៉ុនតាំងពី ១០ ឆ្នាំមុន

រដូវក្តៅកាលពី ១០ ឆ្នាំមុន Hana Asada សិស្សសាលាបឋមសិក្សា Yotoku នៅ Kyoto បានជួបឧបទ្ទវហេតុលង់ទឹក។ គ្រួសារ​ដែល​មាន​សុភមង្គល​ស្រាប់តែកាន់ទុក្ខដោយសារតែបាត់បង់សមាជិកម្នាក់ ឪពុកម្តាយប្អូនស្រីចង់ទទួលបាន​ចម្លើយ​ចំពោះ​សំណួរ “ហេតុអ្វីបានជាកូនស្រីខ្ញុំលង់ទឹក?” ការស៊ើបអង្កេតរបស់ក្រុមប្រឹក្សាអប់រំ និងសាលាមិន​ចប់​សព្វ​គ្រប់ទេ ភាគីទី ៣ ក៏មិនបានផ្តល់ចម្លើយដែលគួរអោយជឿទុកចិត្តដែរ។ ចាប់តាំងពីពេលនោះមក ឪពុកម្តាយនៅតែបន្តស៊ើបអង្កេតដោយខ្លួនឯង។ ក្រោយរយៈពេល ១០ ឆ្នាំ ការខិតខំប្រឹងប្រែងស្វែងរកមិនទាន់បញ្ចប់​នៅ​ឡើយ​ទេ។

អំណោយដែលទេវតាប្រទាន

“សម្រាប់ពួកយើង Hana ជាក្មេងដែលទេវតាប្រទាន” ។

ប្តីប្រពន្ធគ្រួសារ Asada ស្ទើរតែបោះបង់ចោលការព្យាបាលគ្មានកូនអំឡុងពេល ៥ ឆ្នាំ។ ប៉ុន្តែនៅពេលដែលគិតថាអស់​សង្ឃឹម ម្តាយ Hana ក៏មានផ្ទៃពោះដោយធម្មជាតិ។

“Hana ផ្តល់ឳកាសអោយយើងបានក្លាយជាឪពុកម្តាយ បានសង្គ្រោះជីវិតពួកយើង” ។

តោះត្រឡប់ទៅផ្ទះកូន

កាលពីថ្ងៃទី ៣០ ខែកក្កដា ឆ្នាំ ២០១២ Hana ត្រៀមចូលសាលាកំឡុងវិស្សមកាលរដូវក្តៅ។ នៅពេលដែលប្អូនស្រីនិយាយ​ថា “កូនទៅហើយ” ដាក់ម្តាយ ទឹកមុខប្អូនពេលនោះរសាប់រសល់។

“Hana លង់ទឹកក្នុងអាងហែលទឹក”

នៅរសៀលនោះ ម្តាយ Hana ទទួលបានដំណឹងអាក្រក់តាមរយៈទូរស័ព្ទពីសាលា។ គាត់ប្រញាប់ប្រញាល់ទៅកាន់មន្ទីរពេទ្យ ហើយឃើញកូនរបស់ខ្លួនដេកនៅលើគ្រែ ជាមួយនឹងបំពង់ភ្ជាប់ជាច្រើន។ វេជ្ជបណ្ឌិតបាននិយាយថា “សូម​បួង​សួង​អោយ​អព្ភូត​ហេតុ​កើត​ឡើង”​ ក្មេងស្រីស្ថិតក្នុងស្ថានភាពធ្ងន់ធ្ងរ។ នៅក្នុង​បន្ទប់​សង្គ្រោះ​បន្ទាន់ អ្នកម្តាយចេះ​តែ​​និយាយ​ជាមួយ​កូន​ស្រីរហូតថា៖

“តោះ​ទៅផ្ទះកូន Hana ចូល​ចិត្ត​ញ៉ាំ​មាន់​បំពងមែនទេ ត្រឡប់ទៅផ្ទះញ៉ាំ” ។

“កូនដេកបែបនេះក៏បាន ប៉ុន្តែត្រូវនៅរស់កូនណា” ។

ទោះ​បី​ជា​យ៉ាង​ណា មិន​មាន​អព្ភូតហេតុ​​កើត​ឡើង​នោះ​ទេ បេះដូង​ប្អូនស្រីឈប់​លោត​នៅយប់ថ្ងៃទី ៣១ ។

តើមានរឿងអ្វីកើតឡើង? សាលាឆ្លើយថា “យើងមិនដឹងទេ” ។

ឪពុក​ម្ដាយមិនដឹងហេតុ​អ្វីបានជាបាត់បង់កូន ពួកគេជឿថាសាលានឹងរកឃើញមូលហេតុ តើ​មាន​អ្វី​កើត​ឡើង​នៅ​អាង​ហែល​ទឹក​ថ្ងៃ​នោះ? ១៨ ថ្ងៃក្រោយឧបទ្ទវហេតុនោះ នៅការិយាល័យនាយកសាលាបឋមសិក្សា Yotoku ពួក​គេ​ទទួល​បាន​ការ​ពន្យល់​ដូច​ខាង​ក្រោម។

នៅថ្ងៃកើតហេតុ សិស្សថ្នាក់ទី ១ ដល់ទី ៣ ចំនួន ៦៩ នាក់រៀនហែលទឹកដោយមានគ្រូសង្កេតមើលចំនួន ៣ នាក់។ មាន​គ្រោះថ្នាក់​ជា​ច្រើន​​នៅ​កន្លែង​អាង​ហែល​ទឹក កម្ពស់​ទឹក​ខ្ពស់​បើធៀបនឹងប្អូនៗបឋមសិក្សា។ Hana មានកម្ពស់ ១១៣ សង់ទីម៉ែត្រ ចំណែកកម្រិតទឹកក្នុងអាងដែលប្រទះឃើញសាកសពរបស់ប្អូន ៩៥ សង់ទីម៉ែត្រ។ ពេលនោះមានគ្រូ ២ នាក់នៅកន្លែងអាងហែលទឹក ម្នាក់កំពុងបាញ់ទឹកសម្អាតជញ្ជាំង​អាង។ ពួកគេទាំងពីរនាក់សុទ្ធតែមិនបានប្រុងប្រយ័ត្នចំពោះគ្រោះថ្នាក់ ហើយក៏មិនបានត្រួតពិនិត្យគ្រប់គ្រាន់ដែរ។ ម៉្យាងវិញទៀត នៅលើផ្ទៃទឹកមានក្តារបណ្តែត​ទឹក​ច្រើន​បាំង​មើល​មិន​ឃើញ។

ទោះជាយ៉ាងណា នាយក​សាលា​មិន​បានប្រាប់​ពី​មូល​ហេតុ​ Hana លង់​ទឹកនោះ​ទេ។ “គ្មាន​នរណាមើលឃើញ ខ្ញុំមិនដឹង” ។ ឪពុក​ម្តាយ​ស្នើ​អោយបើកការស៊ើបអង្កេត ប៉ុន្តែមិនមានការរីកចម្រើនអ្វីទាល់តែសោះ។

តាមពិតទៅ ការស៊ើបអង្កេតរបស់សាលាមិនបានធ្វើឡើងគ្រប់ជ្រុងជ្រោយឡើយ។ គ្រូ​ស្រី​ម្នាក់​បាន​ផ្តល់​សក្ខីកម្ម​ថា អំឡុងពេលសួរនាំសិស្ស​ចំនួន ៦៨ នាក់ដែល​មាន​វត្តមាន​នៅ​កន្លែង​កើត​ហេតុ​នាថ្ងៃនោះ ការណែនាំពីថ្នាក់លើគឺថា “មិនត្រូវសួរករណីគ្រោះថ្នាក់” ទេ។ សាលាផ្តល់អាទិភាពដល់ការ “ការពារផ្លូវចិត្ត” សម្រាប់ប្អូនៗជាជាងស៊ើបអង្កេតការពិត។ លទ្ធផលមានតែសិស្ស ៧ នាក់ប៉ុណ្ណោះ ដែលរំលឹកដល់គ្រោះថ្នាក់នោះ ប៉ុន្តែ​មិន​មាន​ព័ត៌មានចំពោះមូល​ហេតុ​លង់ទឹករបស់ Hana ឡើយ។ គ្រូម្នាក់នោះមានការសោកស្ដាយយ៉ាងខ្លាំងថា “គួរតែសួរនាំនៅពេលដែលក្មេងៗនៅ​ចាំ អាទិភាព​របស់​សាលា​ជា​កំហុស​មួយ” ។

បន្ទាប់ពីនិយាយជាមួយគ្រូ ក្រុមប្រឹក្សាអប់រំក្រុង និងសាលាបានសម្រេចចិត្តបិទការស៊ើបអង្កេត ជាមួយគ្នានេះចាត់វិធានការបន្ថែម ដើម្បីទប់ស្កាត់កុំឱ្យឧបទ្ទវហេតុកើតឡើងម្តងទៀត។ កាលពីខែកុម្ភៈ ឆ្នាំ ២០១៣ ក្រុមប្រឹក្សាអប់រំជូនដំណឹងដល់មាតាបិតាថា “មិនអាចបញ្ជាក់ពីមូលហេតុ” និងបង្ហាញសេចក្តីណែនាំសម្រាប់ការបង្រៀន​ហែល​ទឹក ក៏​ដូច​ជា​ដំឡើង​ប្រព័ន្ធ​ត្រួត​ពិនិត្យ។

បន្តស្វែងរកការពិត

“សាលា​មិន​ស៊ើប​អង្កេត​ទេ យើង​ត្រូវ​ធ្វើ​ដោយ​ខ្លួន​ឯង” ។

បីខែក្រោយឧបទ្ទវហេតុនេះ ឪពុកម្តាយរបស់ Hana បានដាក់ពាក្យប្តឹងសាលា និងអ្នកដែលពាក់ព័ន្ធ។ ក្នុងសេចក្តីសម្រេចរបស់តុលាការ ទោះបីជាឪពុកម្តាយ Hana ឈ្នះបណ្តឹង ចំណែកភាគីសាលាបានទទួលស្គាល់ថាមិនត្រួតពិនិត្យ​គ្រប់​គ្រាន់ យ៉ាងណាក៏មិនរីកចម្រើនក្នុងការស្វែងរកមូលហេតុ​ដែរ។

អ្នក​ទាំង​ពីរ​បាន​សម្រេច​បង្កើត​ក្រុម​ស៊ើបអង្កេតប្រមាណ ១០ នាក់ កាលពីខែសីហា ឆ្នាំ ២០១៥ ពួកគេ​ជួល​អាង​ហែល​ទឹក​នៅ​សាលា​បឋម​សិក្សា Yotoku ដើម្បីបង្កើតកន្លែងកើតហេតុឡើងវិញ។

ថ្វីត្បិតតែអាចកំណត់មូលហេតុ​ខ្លះ ប៉ុន្តែដំណើរការស្វែងរកការពិតនៅវែងឆ្ងាយនៅឡើយ។ ទោះដឹងថាស្វែងរកមូលហេតុ​មិនអាចជួយអោយកូនស្រីរស់ឡើងវិញ ពួកគេមិនអាចបំភ្លេចសម្លេងចុងក្រោយរបស់កូនស្រីពេលស្លាប់នោះទេ។

“ប្រសិនបើគ្មាននរណាស្វែងរកការពិត ករណីរបស់កូនខ្ញុំនឹងក្លាយជាឧប្បត្តិហេតុដែលគ្មានសាក្សី។ តើ Hana គិតយ៉ាងណា​អំឡុង​ពេល​នៅ​ក្នុង​អាង​ហែល​ទឹក? ក្នុង​នាម​ជា​ឪពុក​ម្តាយ យើង​មិន​អាច​ព្រងើយ​នឹងសម្លេងរបស់កូនស្រី​នោះ​ទេ” ។

ការចាប់កំណើតរបស់ “HANA model”

គ្រោះថ្នាក់​នៅ​អាង​ហែល​ទឹកសាលា​កើត​ឡើង​ជា​ញឹក​ញាប់ តួលេខកត់ត្រាមានមនុស្ស ១៤ នាក់ស្លាប់ និង ៥៥ នាក់រងរបួសជារៀងរហូត ដោយសារគ្រោះថ្នាក់អាងទឹកចន្លោះឆ្នាំ ២០១២ ដល់ ២០២១ ។

បញ្ហាទូទៅរបស់សាលាគឺថាមិនមានប្រព័ន្ធសង្គ្រោះសាកសម។ ចំពោះករណីរបស់ Hana គ្មាន​អ្នក​ដឹក​នាំ​ការ​ជួយ​សង្គ្រោះ​ គ្រូ​​ទាំង​​នោះ​​ច្របូក​ច្របល់​អំឡុង​ពេល​ជួយ​សម្រួលផ្លូវដង្ហើម។

ដោយផ្អែកលើមេរៀននេះ សាលាបឋមសិក្សា Yotoku បានបង្កើតបាវចនាជួយសង្គ្រោះ ដែលបែងចែកយ៉ាងច្បាស់តួនាទីរបស់អ្នកជួយសង្គ្រោះ និងគ្រូណែនាំ។ តាមសំណើរបស់ឪពុកម្តាយ Hana បាវចនានេះដាក់ឈ្មោះថា “HANA model” តាំង​ពី​ឆ្នាំ​មុន។

“សូម​កុំ​ទុកអោយជីវិតរបស់នរណា​ត្រូវ​ខ្ជះខ្ជាយ”​ ។

ឪពុកម្តាយរបស់ Hana បានទៅដល់សាលាបឋមសិក្សា Yotoku នៅថ្ងៃខួបមរណភាពកូន ដើម្បីបង្ហាញពីគំនិតរបស់​​ខ្លួន។ ពួក​គេ​សង្ឃឹមថាសាលាប្រឈមមុខនឹងឧបទ្ទវហេតុនេះ ដើម្បីការពារអាយុជីវិតរបស់កុមារ។

កាលពីថ្ងៃទី ៣១ ខែកក្កដា ឆ្នាំនេះ នៅចំពោះមុខគ្រូប្រមាណ ៤០ នាក់ និងបុគ្គលិកក្រុមប្រឹក្សាអប់រំក្រុង ម្តាយ Hana បាន​និយាយ​ថា៖

“ខ្ញុំមិនចង់អោយជីវិតរបស់ Hana ខ្ជះខ្ជាយនោះទេ។ ដូចជាពួកយើង ខ្ញុំជឿថានេះក៏ជាកង្វល់របស់សាលាដែរ។ ខ្ញុំ​ចង់​ឱ្យ​អ្នក​ផ្សព្វផ្សាយ​គំរូ Hana នៅ​ទូទាំង​ប្រទេស និងរួមគ្នាគិតគូរផ្លាស់ប្តូរការ​អនុវត្តដើម្បី​សង្គ្រោះ​ជីវិត​កុមារ” ។

ថ្វីត្បិតតែមិនអាចផ្លាស់ប្តូរអតីតកាល ពួក​គេ​មិន​ចង់​ឱ្យ​មាន​កំហុស​ដដែល​នេះ​កើត​ឡើង​ម្តង​ទៀតឡើយ។ នោះជាបំណង​ប្រាថ្នា​របស់​ឪពុក​ម្តាយ​ដែល​រង​គ្រោះបន្តស្វែងរក “សំឡេងចុងក្រោយ” របស់កូន។

Sacchan