គូស្វាមីភរិយាជនជាតិជប៉ុនលែងលះគ្នា ៣ ឆ្នាំម្តងដោយ​សារ​ច្បាប់​ចែក​នាម​ត្រកូល​ក្រោយពេល​រៀបការ

ជារៀងរាល់ ៣ ឆ្នាំ គូស្វាមីភរិយាជនជាតិជប៉ុនលែងលះគ្នាម្តង ដោយ​សារ​ច្បាប់​ចែក​នាម​ត្រកូល​ក្រោយពេល​រៀបការ។

មុនពេលរៀបការ ប្តីប្រពន្ធរស់នៅជាយក្រុង Hachioji ភាគខាងលិច Tokyo ធ្លាប់ខ្វែងគំនិតគ្នាចំពោះបញ្ហាប្តូរនាម​ត្រកូល​ក្រោយ​ពេល​រៀបការជា​ច្រើន​ដង។

ច្បាប់​ជប៉ុន​ចែង​ថា គូ​ស្វាមីភរិយាគ្រប់រូបត្រូវឯកភាពប្រើ​នាមត្រកូល​តែ​មួយបន្ទាប់ពីរៀបការជាមួយគ្នា។

ដើម្បីដោះស្រាយបញ្ហាខាងលើ គូស្វាមីភរិយាវ័យ ៣២ ឆ្នាំដំណាលគ្នាបានសម្រេចចិត្តលែងលះ និងរៀបការឡើងវិញរៀង​រាល់ ៣ ឆ្នាំម្តង បន្ទាប់ពីបុរសជាប្តីធ្លាប់ឮ​រឿង​ប្ដី​ប្រពន្ធមួយគូប្តូរនាមត្រកូលរាល់ ៣ ឆ្នាំម្តងនៅកន្លែងធ្វើការ។

នៅឆ្នាំ ២០១៦ អ្នក​ទាំង​ពីរ​​រៀប​ការ ហើយ​បាន​សម្រេច​ចិត្ត​ប្រើ​នាម​ត្រកូលរបស់​ប្រពន្ធ​​រយៈ​ពេល ៣ ឆ្នាំ​ដំបូង។

រូបភាព Mainichi

កាលពីខែកក្កដាកន្លងទៅនេះ ពួកគេបានដាក់ពាក្យលែងលះ និងចុះឈ្មោះរៀបការឡើងវិញ។ លើកនេះអ្នកទាំងពីរ​ប្តូរ​ទៅ​ប្រើ​នាម​ត្រកូល​ប្តី​វិញម្តង។

ចំពោះគូស្វាមីភរិយាជនជាតិជប៉ុន រឿងលែងលះគ្នាហើយរៀបការឡើងវិញ ជារឿងដែលស្មុគស្មាញ។ ប៉ុន្តែ​ពួកគេ​ត្រូវ​បង្ខំ​ចិត្ត​ធ្វើ​ដូច្នេះ ព្រោះមិន​អាច​បំពាន​ច្បាប់។

បច្ចុប្បន្នប្តីប្រពន្ធមួយគូនេះកំពុងពិចារណាទៅរៀបការនៅក្រៅប្រទេស បន្ទាប់ពីបានដឹងអំពីសេចក្តីសម្រេចរបស់តុលាការក្រុងតូក្យូកាលពីជាង ២០ ឆ្នាំមុន ទាក់ទងនឹងអាពាហ៍ពិពាហ៍របស់អ្នកដឹកនាំរឿង Kazuhiro Soda និង​ភរិយា Kiyoko Kashiwagi ។

ក្នុងឆ្នាំ ១៩៩៧ លោក Soda និងភរិយាបានរៀបការនៅទីក្រុងញូវយ៉ក (សហរដ្ឋអាមេរិក)។ ឆ្នាំ ២០១៨ ពួកគេបានដាក់ពាក្យសុំរៀបការក្រោមនាមត្រកូលរៀងខ្លួនទៅកាន់ការិយាល័យខណ្ឌ Chiyoda ទីក្រុងតូក្យូ ប៉ុន្តែ្តត្រូវបដិសេធ។

ទោះជាយ៉ាងណា កាលពីខែមេសា ឆ្នាំ ២០២១ តុលាការក្រុងតូក្យូចេញសេចក្តីសម្រេចទទួលស្គាល់ស្ថានភាពអាពាហ៍​ពិពាហ៍​របស់​ពួក​គេ​នៅ​ប្រទេស​ជប៉ុន។ នេះ​ក៏​ជា​ករណី​ទីមួយដែល​ប្ដី​ប្រពន្ធ​រៀបការ​នៅ​បរទេស​ប្រើ​នាម​ត្រកូល​​ដើម​ត្រូវ​​បាន​​ទទួល​​​ស្គាល់​នៅជប៉ុន។

ប្រភព៖ Skydoor