ហាត់សមមុនសម្លាប់សាច់ញាតិ “ក្មេងស្រីជនជាតិជប៉ុនអាយុ ១៥ ឆ្នាំចាក់មនុស្ស ២ នាក់”

ថ្ងៃសុក្រ 26/08/2022 | 11:37 ព្រឹក

កាលពីពេលថ្មីៗនេះប៉ូលិស Shibuya បានចាប់ខ្លួនក្មេងស្រីអាយុ ១៥ ឆ្នាំម្នាក់នៅ Shibuya ព្រោះតែចាក់មនុស្សពីរនាក់តាមផ្លូវ។ បើតាមសម្តីរបស់ជនសង្ស័យ នាង “ហាត់សម” មុននឹងសម្លាប់ម្ដាយបង្កើត និងប្អូនប្រុស។

នៅវេលាម៉ោងប្រហែល ៧ៈ២០ នាទីយប់ ថ្ងៃទី ២០ ខែសីហា ជនសង្ស័យចាក់ស្រ្តីម្នាក់អាយុ ៥៣ ឆ្នាំ និងកូនស្រីអាយុ ១៩ ឆ្នាំខាងក្រោយខ្នង នៅតាមផ្លូវ Maruyama ជិតស្ថានីយ៍ Shibuya ។

ជនសង្ស័យត្រូវចាប់ខ្លួនភ្លាមៗនោះ ហើយប៉ូលិសបានរកឃើញកាំបិតតូចចំនួន ៣ ក្នុងរបស់របរផ្ទាល់ខ្លួន។ ជនសង្ស័យអាយុ ១៥ ឆ្នាំជាអនីតិជន ដូច្នេះមិនត្រូវបញ្ចេញឈ្មោះទេ មកពី Toda, Saitama ។

តាមសម្តីសាក្សីជនសង្ស័យយំពេលត្រូវប៉ូលិសចាប់ខ្លួន “សក់ខ្មៅ ហើយមើលទៅនៅក្មេងណាស់” ។ បើតាមព័ត៌មានពីប៉ូលិស ជនសង្ស័យបានសារភាពថា “ចង់ទទួលទោសប្រហារជីវិត” ។ ចំណែកជនរងគ្រោះរងរបួសធ្ងន់ ត្រូវចំណាយពេលយ៉ាងហោច ៣ ខែទើបជាសះស្បើយ។ របួសក្មេងស្រីអាយុ ១៩ ឆ្នាំពីក្រោយខ្នងមានជម្រៅ ១០ សង់ទីម៉ែត្រ។

ជនសង្ស័យចាកចេញពីផ្ទះប្រហែលថ្ងៃត្រង់ដោយមានប្រាក់ ៥០០ យ៉េនក្នុងខ្លួន និយាយប្រាប់ម្តាយថាទៅរៀនត្រៀមប្រឡង។ បន្ទាប់មកនាងជិះរថភ្លើងពីស្ថានីយ៍ Musashi Urawa ទៅកាន់ស្ថានីយ៍ Shinjuku រកកន្លែងមួយដើម្បីធ្វើសកម្មភាព។

បើតាមការបញ្ជាក់ ក្មេងស្រីអាយុ ១៥ ឆ្នាំរៀបចំគម្រោងសម្លាប់ម្តាយរបស់ខ្លួន ព្រោះម្តាយនាងធ្វើអាក្រក់ពេលនាងមានអារម្មណ៍មិនល្អ។ នាងក៏មានបំណងសម្លាប់ប្អូនប្រុសព្រោះមិនចង់ឱ្យប្អូនរស់នៅដោយគ្មានម្តាយ។

Sacchan