ប្រធាន​ប៉ូលិស​ជាតិ​ជប៉ុន​សុំ​​លា​លែង​​ពី​​តំណែង​​​បន្ទាប់​ពី​ករណី​អតីត​នាយក​រដ្ឋ​មន្ត្រី Abe ត្រូវបាញ់សម្លាប់

ប្រធានទីភ្នាក់ងារប៉ូលិសជាតិនៃប្រទេសជប៉ុនកាលពីថ្ងៃទី ២៥ ខែសីហា បានអោយដឹងលោកនឹងលាលែងពីតំណែង​ដើម្បី​ទទួល​ខុស​ត្រូវ​ចំពោះ​ករណី​អតីតនាយករដ្ឋមន្ត្រីជប៉ុនលោក Shinzo Abe ត្រូវ​បាញ់​សម្លាប់​កាល​ពីខែ​មុន។

រូបភាព៖ NIKKEI ASIA

ថ្នាក់ដឹកនាំទីភ្នាក់ងារ​ប៉ូលិស​ជាតិលោក Itaru Nakamura ថ្លែង​ក្នុង​សន្និសីទ​សារព័ត៌មានទីក្រុងតូក្យូកាលពីថ្ងៃព្រហស្បតិ៍​ថា “មានភាពខ្វះខាតក្នុងផែនការសន្តិសុខ ការវាយតម្លៃហានិភ័យ និងខ្វះខាតការណែនាំពីមេបញ្ជាការនៅ​កន្លែង​កើត​ហេតុ​” ចំពោះកំហុសការពារអតីត​នាយក​រដ្ឋមន្ត្រីលោក Shinzo Abe ។

លោក Nakamura បានបន្ថែមថា “បន្ទាប់ពីយើងបានពិនិត្យករណីនេះយ៉ាងល្អិតល្អន់ យើងសម្រេចចិត្តចាប់ផ្តើមឡើងវិញ និងកែលម្អប្រព័ន្ធសុវត្ថិភាពរបស់ខ្លួន” ។

លោក Nakamura យកចិត្តទុកដាក់យ៉ាងខ្លាំងចំពោះទំនួលខុសត្រូវរបស់ខ្លួនក្នុងករណីធ្វើ​ឃាត​អតីត​នាយក​រដ្ឋមន្ត្រី​ Abe ។​ លោក​បាន​ដាក់​ពាក្យ​លាលែង​ពី​តំណែង​ទៅ​អគ្គស្នងការនគរបាលជាតិនៅ​ព្រឹក​ថ្ងៃ​ទី ​២៥ ខែ​សីហា។

កងកម្លាំងដែលទទួលបន្ទុកការពារសន្តិសុខ​ក្នុង​អំឡុង​ពេល​ព្រឹត្តិការណ៍​ត្រូវគេចាត់ទុកថាមិនបំពេញតួនាទីអោយល្អ។

ក្រោយមរណភាពរបស់អតីតនាយករដ្ឋមន្ត្រី Abe មេប៉ូលិសខេត្ត Nara លោក Tomoaki Onizuka ក៏បានទទួលខុស​ត្រូវ​ចំពោះ​សន្តិ​សុខ​នៃ​​ព្រឹត្តិ​ការណ៍​ផង​ដែរ។ 

លោក Tomoaki Onizuka ប្រធានកងកម្លាំងប៉ូលិសខេត្ត Nara នៅភាគខាងលិចប្រទេសជប៉ុនបានទទួលស្គាល់​ថា “ខ្ញុំជឿថាវិធានការការពារ និងសុវត្ថិភាពសម្រាប់អតីតនាយករដ្ឋមន្ត្រី Abe មានចំណុចខ្វះខាតដែលមិនអាច​បដិសេធ​បាន” ។

ប្រភព៖ Skydoor