ភូមិកញ្ជ្រោង Zao Kitsune ជាកន្លែងកំសាន្តមានទេសភាពធម្មជាតិស្រស់ស្អាត

ភូមិ Zao Kitsune ជាជម្រករបស់សត្វកញ្ជ្រោង​​ឆ្លាត​វៃ គួរអោយស្រលាញ់ ជាមួយនឹងរោមពណ៌​មាសរលោង។

Zao Kitsune ឬគេហៅថា Zao Fox Village ជាកន្លែងពិសេសមួយដែលអាចទៅលេងពេលទៅប្រទេសជប៉ុន។ ភូមិកញ្ជ្រោង Zao ស្ថិតនៅក្នុងភូមិតូចមួយក្បែរទីក្រុង Shiroishi ខេត្ត Miyagi ។ តំបន់ទេសចរណ៍នេះនៅលើភ្នំដ៏ស្ងប់ស្ងាត់​មួយ ដាច់ឆ្ងាយពីភាពអ៊ូអរនៅទីក្រុង។ ភូមិនេះត្រូវបានបង្កើតឡើងក្នុងឆ្នាំ ១៩៩០ រហូតមកដល់ពេលនេះជាតំបន់​ទាក់​ទាញ​ភ្ញៀវ​ទេសចរណ៍​នៅខេត្ត Miyagi ។

ដំបូងឡើយ កន្លែងនេះគ្រាន់តែតំបន់អភិរក្សសម្រាប់សត្វកញ្ជ្រោងប៉ុណ្ណោះ។ រហូតមកដល់សព្វថ្ងៃនេះ ភូមិបានក្លាយជាកន្លែងដើរទស្សនាយ៉ាងពេញនិយម ដែលជាកន្លែងចិញ្ចឹម​កញ្ជ្រោងគួរឱ្យស្រឡាញ់រាប់រយក្បាល។

នៅខាងក្នុងភូមិកញ្ជ្រោង Zao Kitsune ត្រូវបានបែងចែកទៅជាតំបន់ខុសៗគ្នា។ កន្លែងទីមួយពេលដើរចូលតាមច្រកទ្វារធំ កញ្ជ្រោងត្រូវមើលថែដូចជាសត្វចិញ្ចឹម​នៅក្នុងទ្រុង។ ឆ្លងកាត់កន្លែងនេះ សត្វកញ្ជ្រោងផ្សេងទៀតត្រូវប្រលែងអោយដើរដោយសេរីក្រោមបរិយាកាសធម្មជាតិ។

នៅកន្លែងទាំង ២ នេះ ក្រៅពីសម្លឹងមើលសត្វ​កញ្ជ្រោងដ៏គួរឱ្យស្រឡាញ់ ភ្ញៀវ​ទេសចរ​ណ៍ថែមទាំងមានឳកាសប្រាស្រ័យទាក់ទង និងអោយចំណីពួកវា។ កញ្ចប់​ចំណីត្រូវបានលក់នៅកន្លែងដើរទស្សនា មាន​តម្លៃ​ចាប់​ពី ១០០ យ៉េន។ ប្រសិនបើភ្ញៀវទេសចរណ៍ចង់ចូលកាន់តែជិតជាងនេះ អ្នកអាចចុះឈ្មោះសេវាកម្មថតរូបជាមួយកញ្ជ្រោង។

នៅតំបន់ទាំង ២ ខាងលើមានបទប្បញ្ញត្តិតឹងរ៉ឹងដើម្បីធានាសុវត្ថិភាព ភ្ញៀវពិបាកនឹងចូលទៅជិត ក៏ដូចជាថតរូបជាមួយកញ្ជ្រោង ដូច្នេះសេវាកម្មថតរូបជាមួយកញ្ជ្រោងនេះ ភ្ញៀវទេសចរណ៍អាចឱប ថតរូប និងស្និទ្ធស្នាលជាមួយពួកវា។

ប្រសិនបើនរណា​ម្នាក់​ច្រឡំ​ភូមិ​កញ្ជ្រោង Zao ជាមួយនឹងទម្រង់សួនសត្វមិនត្រូវនោះទេ។ ព្រោះតែមិនដូចសួនសត្វធម្មតាទេ ភូមិ Zao មានបរិវេណធំទូលាយ។ កន្លែង​នេះ​ប្រៀប​ដូច​ជា​ព្រៃ​ធម្មជាតិ​តូច​មួយ សត្វ​កញ្ជ្រោង​អាចរត់លេងដោយសេរី។ នៅពេលធ្វើដំណើរទៅកាន់ប្រទេសជប៉ុន អ្នកមិនត្រឹមតែមានឱកាសប្រលែងជាមួយសត្វកញ្ជ្រោងដ៏គួរឱ្យស្រឡាញ់ប៉ុណ្ណោះទេ ថែមទាំងមានឱកាសបានឃើញភូមិកញ្ជ្រោងដ៏ស្រស់ស្អាត និងសន្តិភាពផងដែរ។

ក្នុងបរិវេណភូមិកញ្ជ្រោង Zao Kitsune មានប្រាសាទកញ្ជ្រោងមួយ។ កន្លែងនេះមានបរិយាកាសស្ងប់ស្ងាត់ខុសពីធម្មតា នៅជុំវិញហ៊ុំព័ទ្ធដោយដើមឈើបៃតង ជាមួយនឹងរូបចម្លាក់កញ្ជ្រោង Inari ប្លែកៗជាច្រើននៃវប្បធម៌ជប៉ុន។ នេះជាកន្លែងស័ក្តិសមសម្រាប់ភ្ញៀវទេសចរណ៍ដែលស្រលាញ់ធម្មជាតិ មានឱកាសដើរលេង និងគយគន់ទេសភាពពេលមកដល់ Zao Kitsune ។

ភូមិចាប់​ផ្តើម​បើក​ឱ្យ​ភ្ញៀវ​ចូល​ទស្សនា​ចាប់​ពី​ម៉ោង ​៩​ ព្រឹក​ដល់​ម៉ោង​ ៤​ ល្ងាច តម្លៃសំបុត្រ ៧០០ យ៉េន/ម្នាក់។

ប្រភព៖ Skydoor