ជប៉ុនផលិត LEXUS រថយន្តខ្លាំងលំដាប់ពិភពលោក ធន់​នឹង​គ្រាប់​បែក

LEXUS ជាតំណាងរថយន្តលំដាប់ខ្ពស់របស់ជប៉ុន។ ក្នុងនោះ LEXUS LX ជារថយន្តដែលមានទំហំធំ និងគ្រឿងសង្ហារិម​ប្រណីត ដែល​ភ្ញៀវ VIP លើពិភពលោកចូលចិត្ត។

https://response.jp/article/2022/01/24/353503.html

រថយន្តមានទំហំធំពេញ​និយម​នៅ​អាមេរិក​ខាង​ជើងជាជាងនៅប្រទេសជប៉ុន។ ដូច្នេះរថយន្តជំនាន់ទី ១ ជំនាន់ទី ២ ភាគច្រើនលក់នៅអាមេរិកខាងជើង និងរថយន្តជំនាន់ទី ៣ ត្រូវបានប្រកាសនៅសហរដ្ឋអាមេរិកក្នុងឆ្នាំ ២០០៧ ។ រហូតដល់ឆ្នាំ ២០០៥ ទើបដាក់ចេញនៅជប៉ុន ប៉ុន្តែត្រូវបានកែប្រែទំហំ​តូច​ជាង។ ម៉ូដែល​រថយន្តនេះមិន​ផ្តោត​លើទីផ្សារ​​ជប៉ុន​​ទេ។

រថយន្ត LEXUS LX ផ្តោតលើផាសុកភាព និងសុវត្ថិភាព មិនមែនល្បឿននោះទេ ដូច្នេះហើយ ក្រុមហ៊ុនបានដាក់ចេញរថយន្តដែលមានកម្លាំងខ្លាំងជាងមុន សម្រាប់ក្រុមអតិថិជនពិសេស។ រថយន្តមានឈ្មោះថា Armored LEXUS LX600 ។

យកលំនាំដើមតាមរថយន្ត LEXUS LX600 គេបន្ថែមអក្សរ Armored (ពាសដែក) ដើម្បីបន្ថែមអារម្មណ៍ខ្លាំងក្លាដល់​រថយន្ត។

រថយន្តនេះ “ខ្លាំងក្លា” ដូចជាឈ្មោះរបស់វាអញ្ចឹង។

រថយន្តនេះត្រូវបានកែប្រែដោយក្រុមហ៊ុនផលិតរថយន្តពាសដែកនៃប្រទេសកាណាដាដែលមានឈ្មោះថា INKAS Armoured Vehicle Manufacturing អាចទប់ទល់នឹងគ្រាប់បែក។ ក្រុមហ៊ុននេះបង្កើតឡើងនៅឆ្នាំ ២០០០ មានជំនាញរចនាប្រភេទរថយន្ត Sedan/SUV ពាសដែកប្រណីត រថយន្តដឹកជញ្ជូនសាច់ប្រាក់ និងរថយន្តពាសដែកយុទ្ធសាស្ត្រ ដោយផ្តោតលើអតិថិជនខាងធនាគារ បុគ្គលិករដ្ឋាភិបាល និងភ្ញៀវ VIP នៅទូទាំងពិភពលោក។

រថយន្តមានមុខងារការពារខុសគ្នាដូចជាដំឡើងកញ្ចក់ការពារគ្រាប់កាំភ្លើង ទំពក់ទ្វារមិនបាក់ទោះរថយន្តផ្ទុះ ប្រព័ន្ធ​កាត់​បន្ថយរំញ័រជួយអោយរថយន្តធ្វើដំណើរយ៉ាងរលូនទោះផ្លូវរដឹបរដុបដោយសារត្រូវវាយប្រហារក៏ដោយ។ សំបក​កង់ Run Flat អាច​រត់បានចម្ងាយជាក់លាក់ទោះបែកកង់។

រថយន្តអាចការពារអ្នកបើកបរពីគ្រាប់កាំភ្លើង ៧,៦២ មីលីម៉ែត្រ និងគ្រាប់បែកដៃពីរគ្រាប់ដាក់ក្រោមរថយន្ត។ ជាមួយនឹងកម្រិតនេះ យានជំនិះអាចការពារអ្នកដំណើរពីការវាយប្រហារតាមផ្លូវ។

រថយន្តពាសដែក ប៉ុន្តែជាប្រភេទស្រាល ព្រោះពាសដែកធ្ងន់អាចប៉ះពាល់ដល់ល្បឿន ក្នុងករណីត្រូវរត់គេចពីកន្លែងកើតហេតុភ្លាមៗ ពាសដែកស្រាលមានគុណសម្បត្តិច្រើនជាង។ រថយន្តនេះក៏ត្រូវបានបំពាក់ដោយកង់រឹងមាំ ប្រព័ន្ធ​ហ្វ្រាំង​ត្រូវ​បាន​ពង្រឹង ស៊ីរ៉ែន ប្រព័ន្ធ​ពន្លត់​អគ្គីភ័យ។ល។

ដោយសារ​រថយន្ត​នេះត្រូវបានផលិតតាមតម្រូវការ ដូច្នេះតម្លៃមិនប្រកាសជាសាធារណៈ​ទេ ប៉ុន្តែតាមការរំពឹងរថយន្ត​នឹង​លក់​​អោយ​ប្រទេស​នានា​ជុំវិញ​ពិភព​លោក។

យើងកំពុងរស់នៅក្នុងពិភពដ៏គ្រោះថ្នាក់ ទោះបីជាអ្នកមិនបានធ្វើអ្វីខុសក៏ដោយ អ្នកនៅតែត្រូវវាយប្រហារ ដោយ​ក្លាយ​ជា​ជន​រង​គ្រោះ​នៃសង្គ្រាម។

យើង​មិន​បាត់​បង់​ជំនឿ​ទេ ប៉ុន្តែ​យើង​គួរតែមានវិធានការការពារខ្លួន។

Kengo Abe