ជណ្តើរព្យាណូនៅស្ថានីយ៍រថភ្លើងជប៉ុន

ក្រុមហ៊ុនផ្លូវដែកជប៉ុនខាងលិច និងអាជ្ញាធរទីក្រុង Fukuoka បានដំឡើងប្រព័ន្ធជណ្តើរដែលយកលំនាំតាមព្យាណូ​ត្រង់​ច្រក​ចេញ​ភាគខាងជើងស្ថានីយ៍ Nishitetsu នៅទីក្រុង។

ដើម្បី​ទាក់ទាញ​ភ្ញៀវ​ទេសចរណ៍ និង​ជម្រុញអោយប្រជាជនលើកកម្ពស់សុខភាពតាមរយៈការរាំតាមចង្វាក់ភ្លេង ក្រុម​ហ៊ុន​ផ្លូវដែកជប៉ុនខាងលិច និង​អាជ្ញាធរ​ទីក្រុង Fukuoka បានដំឡើងជណ្តើរដែលយកលំនាំតាមព្យាណូនៅច្រក​ចេញ​ភាគខាងជើងស្ថានីយ៍ Nishitetsu ទីក្រុង Fukuoka ភាគនិរតីនៃប្រទេសជប៉ុនចាប់ពីថ្ងៃទី ២៩ ខែកក្កដាដល់​ថ្ងៃទី ១១ ខែ​កញ្ញា។

ជណ្តើរព្យាណូនៅស្ថានីយ៍រថភ្លើងជប៉ុន រូបភាព៖ mainichi.jp

ដូច្នេះហើយ ចាប់ពីកាំជណ្តើរលេខ ៤ ដល់លេខ ១៨ (ពីខាងក្រោមឡើង) ត្រូវបានតុបតែងដូចជាព្យាណូ និងដំឡើងឧបករណ៍ចាប់សញ្ញាអុីនហ្វ្រារ៉េដ​សង​ខាង​កាំ​ជណ្តើរ​នីមួយៗ។

នៅពេលអ្នកដំណើរឈានជើងឡើងនឹងបង្អាក់អុីនហ្វ្រារ៉េដ ធ្វើឱ្យឧបករណ៍ចាប់សញ្ញាដំណើរការ និងបង្កើតសំឡេងស្រដៀង​ព្យាណូ។

អាជ្ញាធរទីក្រុងសង្ឃឹមថា ជណ្តើរនេះនឹងលើកទឹកចិត្តឱ្យប្រជាជនធ្វើលំហាត់ប្រាណយ៉ាងសប្បាយរីករាយ។

តាមការស្មានអ្នកដំណើរប្រមាណ ១០០,០០០ នាក់ប្រើស្ថានីយ៍ Nishitetsu ជារៀងរាល់ថ្ងៃក្នុងឆ្នាំសារពើពន្ធ ២០២១ ក្នុងនោះមានបុគ្គលិក​ការិយា​ល័យ​ច្រើន។

អាជ្ញាធរទីក្រុងក៏មានបំណងប្រៀបធៀបចំនួនប្រជាជនដែលប្រើជណ្តើរមុន និងក្រោយអនុវត្តគម្រោង។ អ្នកដំណើរ Riku Gomamoto មកពី Kyoto និយាយថា៖ “ខ្ញុំពិតជាភ្ញាក់ផ្អើលដែលជណ្តើរបញ្ចេញ​សំឡេង ព្រោះខ្ញុំគិតថាវាគ្រាន់​តែ​លាប​​ពណ៌​​ប៉ុណ្ណោះ។ លេងមួយបទភ្លេងធ្វើអោយខ្ញុំ​បែក​ញើស​ខ្លាំង” ។

ប្រព័ន្ធជណ្តើរស្រដៀងគ្នាត្រូវបានដំឡើងនៅ Stockholm ប្រទេសស៊ុយអែតបង្កើនចំនួនអ្នកដើរថ្មើរជើងប្រហែល ៦៦% ។

ប្រភព៖ Skydoor