នៅជប៉ុនទោសបែបណាត្រូវប្រហារជីវិត តើ​ឃាតករ​សម្លាប់អតីត​នាយក​រដ្ឋមន្ត្រីត្រូវប្រឈមនឹងទោសប្រហារជីវិតដែរទេ?

ព្រឹត្តិការណ៍ថ្មីៗនេះអាចនឹងធ្វើឱ្យអ្នកចោទជាសំណួរ តើជប៉ុនជាប្រទេសមានសុវត្ថិភាពទេ? រឿងដែលលេចធ្លោជាង​គេ​នោះ​​គឺ​​ករណី​​​អតីត​​​នាយក​​រដ្ឋ​មន្ត្រី Shinzo Abe ត្រូវ​គេ​ធ្វើ​ឃាត បង្កការភ្ញាក់ផ្អើលយ៉ាងខ្លាំង។

តើ​ឃាតកម្ម​នៅ​ជប៉ុន​ត្រូវ​ទទួល​ទោស​យ៉ាង​ណា?

ដូចជែលអ្នករាល់គ្នាដឹងរួចមកហើយទោសធ្ងន់បំផុតនៅប្រទេសជប៉ុនគឺប្រហារជីវិត។ ដូច្នេះ តើសម្លាប់មនុស្ស​ត្រូវទទួល​​​ទោស​​​ប្រហារ​​ជីវិត​​ដែរ​ទេ? ដើម្បីឆ្លើយតបនឹងសំណួរនេះអាស្រ័យករណីលម្អិត រួមមានមូលហេតុ​ប្រព្រឹត្តបទល្មើស មធ្យោបាយប្រព្រឹត្តបទល្មើស សម្លាប់មនុស្សប៉ុន្មាននាក់ ស្ថានភាពខូចខាតរបស់គ្រួសារជនរងគ្រោះ ផលប៉ះពាល់​សង្គម អាយុរបស់ជនល្មើស កំណត់ត្រាព្រហ្មទណ្ឌ (ធ្លាប់ប្រព្រឹត្តបទល្មើសពីមុនមកអត់) ។ល។ តុលាការនឹងពិចារណា​លើ​កត្តាទាំងអស់ ហើយធ្វើការសម្រេចចិត្តដោយផ្អែកលើករណីជាក់ស្តែងនីមួយៗ។

មនុស្ស​ជា​ច្រើន​គិត​ថាសម្លាប់មនុស្ស ២ នាក់ឡើងទៅទើបទទួលទោសប្រហារជីវិត ប៉ុន្តែមិនងាយស្រួលដូចនេះឡើយ។ ជាក់ស្តែងឧក្រិដ្ឋជនសម្លាប់មនុស្ស ៥ នាក់ (បុរស និងស្រ្តី) ក្នុងឆ្នាំ ២០២១ ត្រូវកាត់ទោសជាប់ពន្ធនាគារអស់មួយជីវិត។ មនុស្សជាច្រើនយល់ថាជាប់ពន្ធនាគារ​មួយ​ជីវិត​មាន​ន័យ​ថា​នៅក្នុងគុកមួយជីវិត ប៉ុន្តែមិនដូច្នោះ​ទេ។ បើមានដីកាលើកលែងទោស ឬក្នុងព្រឹត្តិការណ៍ជាតិសំខាន់ មិនថាត្រូវកាត់ទោសជាប់ពន្ធនាគារអស់មួយ​ជីវិត ប្រសិនបើកែប្រែល្អ នៅតែអាចត្រូវបានពិចារណាកាត់បន្ថយទោសចេញពីពន្ធនាគារ។ សរុបទៅ ទោសប្រហារ​ជីវិត និងទោសជាប់ពន្ធនាគារអស់មួយជីវិតជាបន្ទាត់រវាងស្លាប់ និងរស់ អ្នកដែលជាប់ពន្ធនាគារមួយជីវិតអាច​នឹង​ទទួល​បានការសង្រ្គោះ។

ដូច្នេះ តើពិរុទ្ធជន​ដែល​ធ្វើ​ឃាត​អតីត​នាយក​រដ្ឋមន្ត្រី​ជប៉ុនត្រូវប្រឈមនឹងទោសប្រហារជីវិតដែរទេ? ព្រោះជននេះសម្លាប់​មនុស្ស​តែ​ម្នាក់ មិនអាចកាត់ទោសប្រហារជីវិតមែនអត់?

ក៏អាចនឹងទៅរួចដែរ ប៉ុន្តែបើពិចារណាលើប៉ះពាល់ធំធេងចំពោះសង្គម លទ្ធផលបុគ្គលនេះត្រូវកាត់ទោសប្រហារជីវិត​ក៏​ខ្ពស់​ដែរ។

ក្រៅពីទោសសម្លាប់មនុស្ស រដ្ឋធម្មនុញ្ញ​ក៏បានចែងអំពីឧក្រិដ្ឋកម្មក្បត់ជាតិ ជាក់ស្តែងជាប់ពន្ធនាគារមិនកំណត់ ឬទោសប្រហារជីវិតចំពោះសកម្មភាពកុបកម្ម ក្នុងគោលបំណងបំផ្លាញសណ្តាប់ធ្នាប់ជាតិ។ ទង្វើរបស់ជនល្មើសក៏អាច​រាប់​ចូល​បទ​ល្មើស​​ខាង​លើ​​ដែរ ហើយលទ្ធផលទទួលទោសប្រហារជីវិតខ្ពស់។

ត្រង់ចំណុចនេះមានចន្លោះប្រហោងធំ ប្រសិនបើអាចកំណត់ស្ថានភាពផ្លូវចិត្តរបស់បុគ្គលនេះមិនប្រក្រតីអំឡុងពេលប្រព្រឹត្តបទល្មើស មិនអាចចាត់ទុកជាទោសបានទេ។ ជាការពិតណាស់ មិនមែនមានន័យថាបុគ្គលនេះត្រូវ​ដោះ​លែង​អោយ​មាន​សេរី​ភាព​ឡើយ ត្រូវដាក់ជននេះដាច់ដោយឡែកពីសង្គមនៅមន្ទីរពេទ្យផ្លូវចិត្ត។

និយាយអញ្ចឹងជប៉ុនអនុវត្តទោសប្រហារជីវិតដោយការព្យួរក។ អ្នកទោសឈរនៅកន្លែងព្យួរក ជាមួយនឹងខ្សែ​ចង​ក។ នៅពេលទទួលបានសញ្ញាផ្នែកខាងស្រុតចុះ រាងកាយអ្នកទោសនឹងធ្លាក់ចុះ ខ្សែ​ពួរ​រឹតករហូតដល់ស្លាប់។ ខណៈពេល​ធ្លាក់​ចុះ ក​នឹង​បាក់ ដូច្នេះអ្នកទោស​ស្លាប់​ភ្លាម​ៗ។

ករណី​ធ្វើ​ឃាត​អតីត​នាយក​រដ្ឋមន្ត្រី Shinzo Abe កំពុង​ស្ថិត​ក្រោម​ការ​ស៊ើប​អង្កេត។ ទោះបីជាពិរុទ្ធជនត្រូវបានកំណត់ នៅ​តែ​ត្រូវ​ស៊ើបអង្កេតប្រភពហេតុ​ការណ៍ ទន្ទឹមនឹងនេះទាមទារឱ្យមានការស៊ើបអង្កេតជាច្រើនទៀត ដើម្បី​ការ​ពារកុំឱ្យឧប្បត្តិហេតុស្រដៀងគ្នានេះកើតឡើងម្តងទៀត។

ជប៉ុន​ជា​ប្រទេសបញ្ចេញមតិ​ដោយ​សេរី ដូច្នេះ​ប្រសិន​បើ​មិន​យល់​ស្រប​នឹងលោក Abe អ្នកអាចបដិសេធ។ ប៉ុន្តែ គ្មាន​អ្នក​​ណា​​ម្នាក់​​មាន​​សិទ្ធិ​​យក​​ជីវិត​​អ្នក​ដទៃ​តាម​អំពើ​ចិត្ត​ឡើយ។

ខ្ញុំ​សង្ឃឹម​ថា ជប៉ុន​នឹង​មិន​វិល​ទៅ​រក​សភាព​ដូច​កាល​សង្គ្រាម​លោក​លើក​ទី ២ នោះទេ នៅពេលនោះកងទ័ពនឹងបាញ់​សម្លាប់​អ្នក​ដែល​ប្រឆាំង​រដ្ឋាភិបាល។

Kengo Abe