ប្រកាសអាសន្នកម្រិតខ្ពស់បំផុតបន្ទាប់ពីបន្ទុះភ្នំភ្លើង Sakurajima ផ្ទុះ

បើតាមប្រភពព័ត៌មានពីទីភ្នាក់ងារឧតុនិយមជប៉ុន (JMA) បានអោយដឹងភ្នំភ្លើង Sakurajima ខេត្ត Kagoshima ភាគ​និរតី​ប្រទេស​ជប៉ុន ចាប់ផ្តើមផ្ទុះកាលពីយប់ថ្ងៃអាទិត្យ ទី ២៤ ខែកក្កដា វេលាម៉ោង ៨ យប់ (ម៉ោង​ក្នុង​តំបន់) បណ្តាលអោយផេះ និងថ្មភ្នំភ្លើងខ្ទាតចេញ ដែលជម្រុញអោយអាជ្ញាធរក្នុងតំបន់ចេញបញ្ជាជម្លៀស​ដើម្បី​ធានាសុវត្ថិភាពរបស់ប្រជាជន។ បច្ចុប្បន្នក្រុមមន្ត្រីនៅតែតាមដានភ្នំភ្លើងដែលសកម្មបំផុតក្នុងប្រទេស​ជប៉ុន។

ទីភ្នាក់ងារឧតុនិយមជប៉ុនមិនបានព្យាករណ៍ថា ភ្នំភ្លើង Sakurajima នឹងបង្កឱ្យមានការផ្ទុះមួយទៀតនោះទេ។ ទោះ​​ជា​​យ៉ាង​​ណា ទីភ្នាក់ងារ​បាន​ដំឡើង​កម្រិត​ប្រកាស​អាសន្ន​ដល់​កម្រិត ៥ ដែល​ជា​កម្រិត​ខ្ពស់​បំផុត។ នេះជាលើកទីមួយហើយដែលកម្រិតប្រកាសអាសន្នកម្រិត ៥ ត្រូវបានដាក់ចេញចំពោះភ្នំភ្លើង Sakurajima បន្ទាប់ពីប្រព័ន្ធនេះ​​ត្រូវ​​បាន​ដាក់ឱ្យប្រើប្រាស់ក្នុងឆ្នាំ ២០០៧ ។

ករណីបន្ទុះខាងលើបានបណ្តាលឱ្យដុំថ្មភ្នំភ្លើងធំៗធ្លាក់ចុះចម្ងាយ ២,៥ គីឡូម៉ែត្រ។ មិន​មាន​របាយការណ៍ស្តីពីការ​ខូច​​ខាត ឬមនុស្សរងរបួសឡើយ។ ទោះ​បី​ជា​យ៉ាង​នេះក្តី អាជ្ញាធរបានចេញបញ្ជាជម្លៀសប្រជាជនរាប់សិបនាក់នៅទីក្រុង​ពីរ​ជិត​នោះ។

លោក Nakatsuji Tsuyoshi មន្ត្រីទីភ្នាក់ងារខាងលើបាននិយាយថា “សកម្មភាពភ្នំភ្លើង Sakurajima កាន់តែខ្លាំងឡើងៗ។ ប្រជាជន​​ក្នុង​​តំបន់​​ត្រូវ​​មាន​​ការ​ប្រុង​ប្រយ័ត្ន​ខ្ពស់​ចំពោះ​ហានិភ័យ​ថ្ម​ភ្នំភ្លើង​ធំៗធ្លាក់​នៅ​ក្បែរ​នោះ” ។

ប្រភព៖ NHK