លោក Shirota Minoru អ្នកផ្តួចផ្តើមគំនិតផលិត Yakult ដែលជាភេសជ្ជៈដ៏ល្បីរបស់ជប៉ុន

ថ្ងៃនេះយើងនឹងស្វែងយល់រឿងមួយដែលជាការបំផុសគំនិតសម្រាប់លោក Shirota Minora ផ្តើមផលិតភេសជ្ជៈល្បីរបស់ជប៉ុន​គឺ Yakult ។

នៅពេលដើរចូលហាងលក់ទំនិញជប៉ុន អ្នកប្រាកដជាមើលឃើញដប Yakult តូចតម្រៀបជាជួរ។ នេះ​ជា​ភេសជ្ជៈ​ផ្ទុក probiotic ល្អចំពោះសុខភាព ល្បីឈ្មោះ និងត្រូវបានពិភពលោកស្គាល់។ ប៉ុន្តែនៅពីក្រោយភាពជោគជ័យរបស់ Yakult ជា​រឿង​ដ៏សោកសៅនៃការផ្តួចផ្តើមផលិតរបស់លោក Shirota Minoru ។

ដើមឡើយលោក Shirota Minora ជាយុវជនម្នាក់ដែលធំឡើងក្នុងគ្រួសារអ្នកមាន ប៉ុន្តែបែរជាអាណិតអាសូរយ៉ាងខ្លាំងចំពោះភាពក្រីក្រ។ លោកកើតនៅថ្ងៃទី ២៣ ខែមេសា ឆ្នាំ ១៨៩៩ នៅ Iida, Nagano ដែលជាកូនប្រុសទីបីក្នុងគ្រួសារ​មាន​បង​ប្អូន ៧ នាក់ ឪពុករបស់គាត់ជាអ្នកជំនួញក្នុងស្រុក។ ទោះបីជាគ្រួសារ Shirota ត្រូវចាត់ទុកថាមាន ប៉ុន្តែ​គ្រួសារ​ដែល​នៅជុំវិញពួកគេក្រីក្រយ៉ាងខ្លាំង។

នៅពេលនោះប្រទេសជប៉ុនទាំងមូលមិនអាចប្រមូលផល សុខភាពប្រជាជនធ្លាក់ចុះ។ ជំងឺឆ្លងដូចជាជំងឺរាគរូស គ្រាន់​ក្តៅ​រាត​ត្បាត។ ខណៈពេលនោះលោក Shirota មើលឃើញមិត្តភក្តិជិតខាងជាច្រើនឈឺ​ធ្ងន់ ខ្លះទៀតបាត់បង់ជីវិត។ ម្យ៉ាងវិញទៀត លោក Shirota យល់អំពីភាពឈឺចាប់នៃជំងឺ និងភាពក្រីក្រ។ លោកប្តេជ្ញា​ថា​នឹង​ក្លាយ​ជា​វេជ្ជបណ្ឌិត ​ដើម្បី​សង្គ្រោះ​អ្នកដែលមានស្ថានភាពដូច​មិត្តភ័ក្តិ​របស់​គាត់។

ចាប់តាំងពីពេលនោះមក លោក Shirota ផ្តោតលើការស្រាវជ្រាវថ្នាំបង្ការ។ នៅឆ្នាំ ១៩១៨ គាត់បានចុះឈ្មោះចូលរៀននៅសាកលវិទ្យាល័យវេជ្ជសាស្ត្រ Tohoku ។ ក្នុងឆ្នាំ ១៩២១ កាលអាយុ ២២ ឆ្នាំ លោកចូលរៀនមហាវិទ្យាល័យវេជ្ជសាស្ត្រនៅសាកលវិទ្យាល័យរាជវង្ស Kyoto (សព្វថ្ងៃនេះជាសាកលវិទ្យាល័យ Kyoto) ចាប់ផ្តើមស្រាវជ្រាវមីក្រូជីវវិទ្យានៅ​ទីនេះ។

លោក Shirota ផ្តោតលើការស្រាវជ្រាវមីក្រូជីវសាស្រ្តក្រពះពោះវៀន។ ប្រភពបំផុសគំនិតរបស់គាត់មកពីស្នាដៃរបស់ជីវវិទូ Elie Metchnikov ។ ម្នាក់ក្នុងចំណោមជនជាតិ Bulgaria តែងតែផឹកទឹកដោះគោដែលមានជាតិ fermented ជួយអោយ​អាយុ​វែង។

របកគំហើញធំបំផុតរបស់លោក Shirota ប៉ុន្មានឆ្នាំស្រាវជ្រាវដំបូងគាត់រកឃើញអត្ថប្រយោជន៍របស់បាក់តេរី axit lactic ក្នុងពោះវៀន និងសមត្ថភាពការពារបាក់តេរីដែលបង្កគ្រោះថ្នាក់។ លោកយល់ថាគួរតែបង្កើនប្រភេទបាក់តេរីនេះដូចជាអាហារបំប៉នដើម្បីកែលម្អសុខភាពពោះវៀន។

ជាទូទៅភាគច្រើនបាក់តេរី bifidobacteria ត្រូវបំផ្លាញមុនពេលទៅដល់ពោះវៀន។ ប៉ុន្តែក្នុងឆ្នាំ ១៩៣០ លោក Shirota ទទួល​បាន​ជោគ​ជ័យក្នុងការញែកប្រភេទបាក់តេរីមានប្រយោជន៍ពិសេសរបស់ lactobacillus casei ដែលអាចរស់បានក្នុងទឹកក្រពះ។ ប្រភេទនេះគេហៅថា Lactobacillus casei Shirota ឬ “ប្រភេទ Shirota” (シロタ株) នាំមកនូវអត្ថប្រយោជន៍មួយចំនួន ដូចជាជួយរំលាយអាហារកាន់តែល្អ បាក់តេរីដែលបង្កគ្រោះថ្នាក់តិចជាងមុន និងពោះវៀនមានសុខភាពល្អ។ ក្នុងពេលជាមួយគ្នានោះ លោក Shirota ទទួលបានសញ្ញាប័ត្រផ្នែកវេជ្ជសាស្ត្រ ហើយបានក្លាយជាសាស្ត្រាចារ្យនៅសាកលវិទ្យាល័យរាជវង្ស Kyoto ។

ដើមកំណើតរបស់ Yakult

លោក Shirota ជឿជាក់យ៉ាងមុតមាំថាគន្លឹះនៃសុខភាពគឺ “មិនមែនដើម្បីព្យាបាលជម្ងឺនោះទេ ប៉ុន្តែការពារកុំអោយ​កើត​ជំងឺ”។ ហេតុ​ដូច្នេះ គាត់ចង់ផលិតអាហារបំប៉នដែលអាចផ្គត់ផ្គង់ប្រភេទ Shirota ទៅ​មនុស្ស​បាន​ច្រើន​តាម​​ដែល​​អាច​​ធ្វើ​ទៅ​បានក្រោមទម្រង់​ប្រើប្រាស់​បាន។ លោក Shirota ជឿជាក់ថា មនុស្សគ្រប់រូបត្រូវការសុខភាព មិន​ថា​ឋានៈ​របស់ពួកគេមាន ឬក្រយ៉ាងណាឡើយ។

តាំងពីពេលនោះលោក Shirota បន្តស្រាវជ្រាវ ហើយនៅទីបំផុតផលិត Yakult ជាភេសជ្ជៈដែលមានជាតិ fermented ផ្ទុក​ប្រភេទ Shirota រាប់ពាន់លាន។

វេជ្ជបណ្ឌិត Shirota ចាប់ផ្តើមទីផ្សារ Yakult ក្នុងឆ្នាំ ១៩៣៥ ដោយចែកដបនីមួយៗដល់អ្នកជំងឺក្នុងតំបន់របស់ខ្លួន។ មិនយូរប៉ុន្មានផលិតផលពេញនិយម ហើយតម្រូវការកើនឡើងយ៉ាងខ្លាំង។ ដូច្នេះលោក Shirota ជួលក្រុមអ្នកលក់នៅនឹងកន្លែង ដើម្បីផ្គត់ផ្គង់ភេសជ្ជៈ និងព័ត៌មានភេសជ្ជៈដល់អតិថិជនសក្តានុពល។ អាជីវកម្មរីក​ចម្រើន​​តាម​បែប​ចលនា​មូល​ដ្ឋាន លក់ក្នុងតម្លៃ ៥ យ៉េន ឬដូចដែលលោក Shirota បាននិយាយថា “ស្មើតម្លៃ​កាត​ប៉ុស្តាល់ ឬបារីមួយដើម” ។

នៅទីបំផុត សកម្មភាពអាជីវកម្មពង្រីកមិនត្រឹមតែទូទាំងប្រទេសជប៉ុនប៉ុណ្ណោះទេ ថែមទាំងនៅក្រៅប្រទេសទៀត​ផង មាន​ជាង ៥០០ សាខានៅទូទាំងពិភពលោក។ លោក Shirota បានបង្កើតទីស្នាក់ការកណ្តាល Yakult ក្នុងឆ្នាំ ១៩៥៥ នៅ​ទីក្រុង​តូក្យូ ហើយក្នុងពេលជាមួយគ្នានេះកាន់តំណែងជាប្រធាន និងនាយកវិទ្យាស្ថានស្រាវ​ជ្រាវ។

នារី Yakult

ក្នុងអំឡុងពេលសង្រ្គាម លោក Shirota បានបង្កើតវិធីសាស្រ្តផ្សេងដើម្បីផ្សព្វផ្សាយ Yakult នៅទូទាំងប្រទេស​ជប៉ុន។ ដើម្បីបន្តដំណើរការអាជីវកម្ម គាត់ត្រូវធានាថាផលិតផលដល់ដៃអ្នករាល់គ្នា ទាន់ពេលវេលា និងមិន​ថា​លក្ខខណ្ឌអាកាសធាតុយ៉ាងណា។ សំណើនេះតម្រូវឱ្យបុគ្គលិករបស់គាត់ត្រូវមានភាពអត់ធ្មត់ ម៉ឺងម៉ាត់ និង​យក​ចិត្ត​ទុកដាក់ចំពោះភារកិច្ចរបស់ខ្លួន។ តើនរណាអាចឆ្លើយតបតម្រូវការនេះបានល្អជាងស្ត្រីមេផ្ទះ?

នេះជាវីដេអូបង្ហាញពីនារី Yakult សម័យទំនើប។

តែងតែតាមទាន់សម័យកាល

Yakult ជា​ផលិតផល​ដែល​តែង​តែ​តាម​ទាន់​សម័យ តែងតែដាក់ចេញទម្រង់ថ្មីដើម្បីបំពេញតម្រូវការទីផ្សារ និងសុខ​ភាព។ ផលិតផលថ្មីបំផុតគឺ Yakult ១០០០ ចេញលក់កាលពីខែមេសាឆ្នាំមុន ដែលមានផ្ទុក ១០០ ពាន់លាន Shirota ។ សូម្បី​តែ Yakult ក៏ឆ្លងកាត់ការផ្លាស់ប្តូរជាបន្តបន្ទាប់។

ដើមឡើយ Yakult ត្រូវបានផលិតក្នុងដបកែវ។ យ៉ាង​ណា​មិញ ដោយសារ​តម្លៃ​ផលិត​កើន​ឡើង ព្រម​ទាំង​គិត​ពី​ទម្ងន់​​ផលិត​ផល​​ដែល​នារី Yakult ត្រូវកាន់ លោក Shirota ប្តូរទៅប្រើដបជ័រតូច ស្រាល និងថោកជាងមុន។ ការរចនាសព្វថ្ងៃជាគំនិតថ្មីដែលផ្តើមចេញនៅពេលនោះ ដបតូចល្មមនឹងបាតដៃ ងាយស្រួលសម្រាប់កុមារតូចៗ និងមនុស្សចាស់ដែលកាន់មិនបាន។ សម្ភារៈ polystyrene មានអនាម័យ និងសុវត្ថិភាពខ្ពស់ គម្របបន្ទះអាលុយ​មីញ៉ូម​អនុញ្ញាត​ឱ្យ​ខ្យល់​ចូល ដូច្នេះដំណើរការ fermentation មិនត្រូវរំខាន។ ទំហំតូចត្រឹម​ ៦៥ មីលីលីត្រក៏ជាបរិមាណសុវត្តិភាពផងដែរ។

លទ្ធិ Shirota និងវប្បធម៌អាជីវកម្មរបស់ Yakult

វេជ្ជបណ្ឌិត Minoru Shirota បានស្នើគំនិតសំខាន់ៗជាច្រើនផ្នែកថ្នាំបង្ការអំឡុងពេលស្រាវជ្រាវរបស់ខ្លួន។ គំនិតទាំងនេះបង្កើតជា Yakult ដែលគេហៅរួមថា “លទ្ធិ Shirota” ជាមួយនឹងគោលគំនិតសំខាន់ៗចំនួនបី៖

• ថ្នាំគួរតែប្រើជាមធ្យោបាយការពារជំងឺជាជាងព្យាបាលជំងឺ
• ពោះវៀនមានសុខភាពល្អជួយឱ្យអ្នកមានអាយុវែង
• មនុស្សគ្រប់រូបអាចមានសុខភាពល្អ មិនថាអ្នកមាន ឬក្រ

លទ្ធិ Shirota ក៏បង្កើតជាវប្បធម៌អាជីវកម្មរបស់សាជីវកម្មផងដែរ។ Matsumoto Masatoshi ប្រធានផ្នែកធនធានមនុស្សរបស់ Yakult បាននិយាយថា “ខ្ញុំជឿថា ដោយសារបុគ្គលិកទាំងអស់នៅទីនេះយល់ច្បាស់អំពីលទ្ធិ Shirota យើង​អាច​បង្កើត​វប្បធម៌​អាជីវកម្ម ជា​កន្លែង​ដែលមនុស្សគ្រប់គ្នាអាចធ្វើការដោយសន្តិភាព” ។

រឿងរបស់លោក Shirota Minoru

លោក Minoru Shirota ទទួលមរណភាពនៅឆ្នាំ ១៩៨២ ជន្មាយុ ៨២ បន្ទាប់​ពី​បាន​សម្រេច​គោល​ដៅ និង​ការ​តាំង​ចិត្ត​ជាច្រើនទសវត្សរ៍របស់ខ្លួន។ Yakult មានវត្តមានជាង ៣០ ប្រទេស ថែមទាំងមានសារមន្ទីររំលឹកដល់លោក Shirota ក្នុងវិទ្យាស្ថានស្រាវជ្រាវកណ្តាលរបស់ Yakult នៅទីក្រុង Kunitachi, Tokyo ។ សាជីវកម្ម Yakult និងវិទ្យាស្ថាន​ស្រាវ​ជ្រាវ​នេះ​កំពុងបន្តអភិវឌ្ឍបច្ចេកវិទ្យាថ្មី សម្លឹងមើលទៅអនាគត ប៉ុន្តែនៅតែធ្វើតាមលទ្ធិ Shirota ជា​គោល​​ការណ៍​​ណែនាំ​រហូត​ទៅ។

Sacchan