ជប៉ុនមិនទទួលស្គាល់អាពាហ៍ពិពាហ៍ភេទដូចគ្នា ប៉ុន្តែក្រុមហ៊ុន Nintendo ទទួលស្គាល់

ជាក់ស្តែង ក្រុមហ៊ុន Nintendo ជប៉ុនអនុញ្ញាតឱ្យគូស្នេហ៍ស្រលាញ់ភេទដូចគ្នាក្នុងក្រុមហ៊ុនទទួលបានអត្ថប្រយោជន៍​មួយ​ចំនួន​ដូចជាអាពាហ៍ពិពាហ៍ភេទផ្ទុយគ្នា។

ថ្មីៗនេះក្រុមហ៊ុន Nintendo បានធ្វើបច្ចុប្បន្នភាពចំពោះគំនិតផ្តួចផ្តើមទំនួលខុសត្រូវសង្គម (CSR) របស់ក្រុមហ៊ុន។ ទោះបីនេះមិនមែនជារឿងថ្មីសម្រាប់អ្នកគាំទ្រក៏ដោយ ប៉ុន្តែការធ្វើបច្ចុប្បន្នភាពលើកនេះមានចំណុចលេចធ្លោមួយ។

ក្នុងផ្នែក “ប្រព័ន្ធភាពជាដៃគូ” ក្រុមហ៊ុន Nintendo បានប្រកាសចាប់ពីខែមីនាឆ្នាំ ២០២១ ក្រុមហ៊ុនមានគោល​ការណ៍​សម្រាប់ “គូស្នេហ៍​ស្រលាញ់​ភេទ​ដូច​គ្នា” ក្នុងក្រុមហ៊ុនទទួលបាន “អត្ថប្រយោជន៍ដូចជាអាពាហ៍ពិពាហ៍ភេទផ្ទុយគ្នា” ។

ថ្វីត្បិតតែមានការខិតខំប្រឹងប្រែងថ្នាក់ជាតិក្នុងអំឡុងប៉ុន្មានឆ្នាំថ្មីៗនេះចំពោះបញ្ហាអាពាហ៍ពិពាហ៍ភេទដូចគ្នា ទើបតែប៉ុន្មានសប្តាហ៍មុន តុលាការជប៉ុនប្រកាសបន្តការហាមឃាត់ចំពោះអាពាហ៍ពិពាហ៍ភេទដូចគ្នា ដោយលើកហេតុផលថាការហាមឃាត់នេះមិន​ស្រប​តាម​រដ្ឋធម្មនុញ្ញ។ ក្នុងករណីបណ្តឹងនៅ Osaka សេចក្តីសម្រេច​ត្រូវ​បាន​ធ្វើ​ឡើង​នៅ​ថ្ងៃ​ទី ២០ ខែ​មិថុនា ដោយ​បញ្ជាក់​ថា​ “ក្នុងរដ្ឋធម្មនុញ្ញ និយមន័យអាពាហ៍ពិពាហ៍មិនបើកចំហរចំពោះបុគ្គល​ស្រលាញ់​ភេទ​ដូច​គ្នា​ទេ” ។

ទោះជាយ៉ាងណា ប្រព័ន្ធនៃក្រុមហ៊ុន Nintendo កំពុងទទួលស្គាល់ផ្ទុយមកវិញ។

នៅក្រុមហ៊ុន Nintendo យើងចង់បង្កើតបរិយាកាសការងារដែលគាំទ្រ និងផ្តល់សិទ្ធិដល់បុគ្គលិកម្នាក់ៗ។

យើងបានណែនាំប្រព័ន្ធភាពជាដៃគូកាលពីខែមីនាឆ្នាំ ២០២១ ដូចជាគំនិតផ្តួចផ្តើមផ្អែកលើទស្សនវិជ្ជានេះ។ បច្ចុប្បន្ន​ទោះ​អាពាហ៍​ពិពាហ៍​ភេទដូចគ្នាមិនត្រូវបានទទួលស្គាល់តាមច្បាប់របស់ជប៉ុន ប្រព័ន្ធនេះធានាថាបុគ្គលិកដែលមានដៃគូស្រលាញ់​ភេទ​ដូច​គ្នាក្នុងស្រុកមានសិទ្ធិដូចបុគ្គលិក​ស្រឡាញ់​ភេទ​ផ្ទុយ​គ្នា​ដែលបានរៀបការ។

ក្នុងក្រមសីលធម៌សម្រាប់បុគ្គលិកក្រុមហ៊ុន Nintendo មានបទប្បញ្ញតិ្ត “យើងមិនរើសអើងដោយផ្អែកលើពូជសាសន៍ ជាតិ​សាសន៍ សញ្ជាតិ មនោគមវិជ្ជា សាសនា ជំនឿ ប្រភពដើម ឋានៈសង្គម វណ្ណៈ មុខរបរ ភេទ អាយុ ពិការភាព ទំនោរ​ផ្លូវ​ភេទ ឬអត្តសញ្ញាណយេនឌ័រ” សរុបទៅពួកគេហាមឃាត់រាល់ការរើសអើង។

ក្រៅពីណែនាំប្រព័ន្ធភាពជាដៃគូ ក្រុមហ៊ុន Nintendo ក៏បានកែប្រែបទប្បញ្ញត្តិចំពោះទង្វើ​បៀតបៀន ដើម្បី​ហាមឃាត់​ការ​បញ្ចេញមតិរើសអើងដោយផ្អែកលើទំនោរផ្លូវភេទ ឬអត្តសញ្ញាណយេនឌ័រ ក៏ដូចជាការបង្ហាញពីទំនោរផ្លូវ​ភេទ​ឯក​ជន​របស់​នរណា​ម្នាក់​ផ្ទុយនឹងឆន្ទៈរបស់ពួកគេ។

ជាមួយនឹងការណែនាំប្រព័ន្ធភាពជាដៃគូនៅប្រទេសជប៉ុន ក្រុមហ៊ុន Nintendo បានជូនដំណឹងដល់បុគ្គលិករបស់ខ្លួន​ចំពោះ​បញ្ហា​ចម្រុះផ្នែកយេនឌ័រ ជាមួយនឹងសារមកពីប្រធានដូចជាមធ្យោបាយលើកកម្ពស់ការយល់ដឹងអំពីអត្ថន័យ​នៃភាពចម្រុះ។ ក្នុងសារនេះ លោកប្រធានបានជំរុញឱ្យបុគ្គលិកទាំងអស់ប្រកាន់យកនូវការយល់ដឹងថ្មី ទាំងពាក្យសម្តី និងសកម្មភាពគ្មានបំណងបង្កគ្រោះថ្នាក់ ហើយអាចបណ្តាលឱ្យមានការឈឺចាប់ផ្លូវចិត្ត ស្នើអោយមាន​ការ​យោគ​យល់ និងគាំទ្រដើម្បីបង្កើតបរិយាកាសដែលមនុស្សគ្រប់គ្នាធ្វើការប្រកបដោយផាសុកភាព។

“តាមរយៈការកែលម្អប្រព័ន្ធក្រុមហ៊ុន និងការបណ្តុះបណ្តាល យើងនឹងបន្តការងាររបស់ខ្លួនដើម្បីបង្កើតបរិយា​កាស​មួយ​ដែល​បុគ្គលិក​ម្នាក់ៗ​អាច​បញ្ចេញទេពកោសល្យរបស់ខ្លួន” ។

ជប៉ុន​ជា​សមាជិក​តែ​មួយ​គត់​នៃ G7 មិន​ទទួល​ស្គាល់អាពាហ៍ពិពាហ៍ភេទ​ដូច​គ្នា។ ប្រទេសនេះ “ក៏តម្រូវ​ឱ្យ​អ្នក​កែ​ភេទ​ត្រូវ​ទទួល​ការវះកាត់ក្រៀវ ប្រសិនបើពួកគេចង់អោយច្បាប់ទទួលស្គាល់អត្តសញ្ញាណយេនឌ័រ” ។ ម្យ៉ាងវិញ​ទៀត​ក្រុម​ហ៊ុន Nintendo បញ្ជាក់ថាខ្លួន “មិនរើសអើងដោយផ្អែកលើអត្តសញ្ញាណយេនឌ័រ” ឡើយ។

Sacchan