មូលហេតុដែលជម្រុញអោយ Tetsuya Yamagami ធ្វើឃាត​អតីត​នាយករដ្ឋមន្ត្រីជប៉ុនលោក Shinzo Abe

Tetsuya Yamagami ដែលជាជនសង្ស័យត្រូវបានចាប់ខ្លួននៅកន្លែងកើតហេតុក្នុងករណីធ្វើឃាតអតីតនាយករដ្ឋមន្ត្រីជប៉ុន Shinzo Abe ដែលកក្រើកកាលពី​ពេល​ថ្មី​ៗ​នេះ និយាយពីមូលហេតុ​ជម្រុញអោយបុគ្គលនេះប្រព្រឹត្តបទ​ឧក្រិដ្ឋ​ដូច​តទៅ “ម្តាយរបស់ខ្ញុំលះបង់គ្រប់យ៉ាងដើម្បីសាសនា ប៉ុន្តែ​គ្រួសារក្ស័យធន និងបង្ក​កំហឹង​យ៉ាង​ខ្លាំង​” ។ អតីតអ្នក​កាន់​សាសនា​ដែលរស់នៅខេត្ត Toyama បាននិយាយថា មាន​គ្រួសារ​ជា​ច្រើនបែកបាក់ព្រោះតែបរិច្ចាគប្រាក់​យ៉ាង​ច្រើន។

ជាក់ស្តែង អតីតអ្នកជឿម្នាក់នេះនិយាយថា៖

“នៅពេលនោះ ខ្ញុំក៏ជឿទុកចិត្ត និង​សប្បាយ​ចិត្ត​យ៉ាង​ខ្លាំងចំពោះការបង្រៀនរបស់សាសនា ប៉ុន្តែក្រោយមកគ្រប់យ៉ាងដើម្បីតែប្រាក់ និងការបរិច្ចាគ។ ក្រឡេកទៅមើលពេលនោះ គ្រួសាររបស់ខ្ញុំច្របូកច្របល់ ប៉ុន្តែពួកគេនិយាយ​ថា នេះ​ជា​ផ្លូវ​ដែល​អ្នក​ត្រូវ​ដើរ ជា​មាគ៌ា​នៃ​ស្ថានសួគ៌ ដូច្នេះមិនអាចប្រឆាំងបានឡើយ” ។

កាលពីថ្ងៃទី ៨ ព្រឹត្តិការណ៍លោក Shinzo Abe ត្រូវគេធ្វើឃាតនៅ Nara មិនត្រឹម​តែកក្រើកនៅប្រទេសជប៉ុនប៉ុណ្ណោះទេ ប៉ុន្តែ​រំជើប​រំជួល​ទូទាំង​ពិភព​លោក។ អតីតមន្ត្រីកងកម្លាំងស្វ័យការពារដែនសមុទ្រ Tetsuya Yamagami (អាយុ ៤១ ឆ្នាំ) ត្រូវចាប់ខ្លួននៅកន្លែងកើតហេតុ បាននិយាយអំពីមូលហេតុ​បង្កបទល្មើសរបស់ខ្លួន​ដូច​តទៅ “ម្តាយ​របស់​ខ្ញុំព្រោះតែចូលរួមសាសនាបានក្ស័យធន។ ខ្ញុំ​គិតថា​សាសនា​នេះ​ទាក់​ទង​នឹង​នាយក​រដ្ឋមន្ត្រី​ Abe” ។

នៅថ្ងៃទី ១១ ក្រុមសាសនាខាងលើដែលពីមុនជា “សាសនាបង្រួបបង្រួម” ហើយបច្ចុប្បន្ននេះគឺ “សាសនាបង្រួបបង្រួមសន្តិភាពពិភពលោក” បានធ្វើសន្និសីទសារព័ត៌មានដោយទទួលស្គាល់ថាម្តាយរបស់ Yamagami ជាសមាជិក​​សាសនា ហើយ​ក៏​បាន​អោយ​ដឹងថាអ្នកស្រីបរិច្ចាគប្រាក់យ៉ាងច្រើន។

បច្ចុប្បន្នប្រធាន​សាសនា Tanaka បាននិយាយថា “យើងមិនដឹងច្បាស់ពីស្ថានភាពគ្រួសារ​ក្ស័យធន គ្រាន់តែ​ដឹង​ថា​ពួកគេ​មាន​បញ្ហា​ផ្នែក​ហិរញ្ញវត្ថុ។ ហើយក៏មិនមានឯកសារកត់ត្រាសាសនាស្នើ​សុំ​ការ​បរិច្ចាគ​ច្រើន​ពី​គ្រួសារ​ទាំងនេះ​ដែរ” ។

ម្តាយរបស់ជនសង្ស័យចូលជាសមាជិកសាសនាក្នុងឆ្នាំ ១៩៩០ ។ ថ្វីត្បិតតែមិនដឹងថាអ្នកស្រីបរិច្ចាគ​ប្រាក់​ប៉ុន្មាន ប៉ុន្តែច្បាស់ណាស់ថាមានចំនួនច្រើនរហូតធ្វើអោយគ្រួសារដួលរលំ។

សមាជិកសាសនាម្នាក់ទៀតបាននិយាយថា៖

“ខ្ញុំត្រូវគេសួរថាមានប្រាក់ប៉ុន្មាន? នៅពេលខ្ញុំប្រាប់ពួកគេថា ខ្ញុំមិនមានប្រាក់សន្សំច្រើនទេ ពួកគេស្នើឱ្យដកប្រាក់​ធានា​រ៉ាប់រង ឬកម្ចីប័ណ្ណឥណទាន។ សរុបទៅខ្ចីកាន់តែច្រើនកាន់តែល្អ ហើយត្រូវធ្វើដោយខ្លួនឯង” ។

ដោយដឹងថាម្តាយរបស់ជនសង្ស័យបានបរិច្ចាគប្រាក់សរុបចំនួន ១០ លានយ៉េន ក្នុងរយៈពេល ១០ ឆ្នាំ ដោយបានខ្ចីប្រាក់ជាបន្តបន្ទាប់ដើម្បីទិញ “ផើង” ថ្លៃ។ ជនសង្ស័យយល់ថាម្តាយខ្លួនត្រូវគេលាងខួរក្បាល និងបង្ខំឱ្យចូលរួមបរិច្ចាគ។

ម្យ៉ាងវិញទៀត សាសនាបង្រួបបង្រួមសន្តិភាពពិភពលោកបានបំភ្លឺយ៉ាងច្បាស់ក្នុងសន្និសីទសារព័ត៌មាននាពេលថ្មីៗនេះថា ច្បាប់ដែលត្រូវអនុវត្តតាម ក៏ដូចជាបញ្ហាទាក់ទងនឹងការបរិច្ចាគជារឿងអតីតកាល។ យ៉ាងណាក៏ដោយ បច្ចុប្បន្ន​មេធា​វីកំពុង​ស៊ើប​អង្កេត សង្ស័យជាករណីខាងវិញ្ញាណ។

អតីតសមាជិកសាសនាបានវាយតម្លៃថា៖

“ជាក់ស្តែងមានមនុស្សជាច្រើនខំប្រឹងរកប្រាក់ លក់ផ្ទះ លក់ទ្រព្យសម្បត្តិឪពុកម្តាយ ដើម្បីបំពេញគោលបំណងជាក់លាក់ណាមួយ។ ប៉ុន្តែសម្លាប់មនុស្សមិន​អាច​លើកលែងបានដាច់​ខាត។ ខ្ញុំមានអារម្មណ៍​សោក​ស្តាយ​ណាស់ ប្រសិន​បើ​មាន​វិធី​ផ្សេង​ខណៈ​ពេល​នោះ…” ។

Sacchan