ពស់មួយក្បាលឆេះខ្លោចធ្វើអោយគ្រួសារប្រមាណ ១ ម៉ឺនខ្នងនៅ Fukushima ដាច់ភ្លើង

ក្រោមអាកាសធាតុក្តៅខ្លាំង ម៉ាស៊ីនត្រជាក់ជាដំណោះស្រាយសម្រាប់គ្រួសារជាច្រើននៅជប៉ុន។ ហេតុ​នេះ ការដាច់ចរន្ត​អគ្គិសនី​ជាឧប្បត្តិហេតុគ្រោះថ្នាក់បំផុត ថែមទាំងគំរាមកំហែងដល់អាយុជីវិតមនុស្សទៀតផង។ ដូច្នេះអាចដឹង​ថា​មានស្ថានភាពភាពច្របូកច្របល់យ៉ាងណា នៅពេលដែលមានប្រមាណ ១ ម៉ឺនគ្រួសារនៅ Fukushima ត្រូវដាច់​ភ្លើង។ ហេតុ​ការណ៍​​នេះ​​បាន​កើតឡើង​កាលពី​ថ្ងៃ​ទី​ ២៩ ខែមិថុនាក្រោមទ្រង់ទ្រាយធំ។

ក្នុងករណីបែបនេះ ភាគច្រើនមូលហេតុបណ្តាលមកពីស្ថានីយអគ្គិសនីលើសបន្ទុក ប៉ុន្តែជាក់ស្តែងប្រព័ន្ធនៅតែដំណើរការល្អរហូតដល់ម៉ោង ២ៈ១០ នាទីរសៀល។ Tohoku Electric Power បានរកឃើញបញ្ហានៅស្ថានីយ៍ចែកចាយបន្តក្នុងទីក្រុង ហើយមូលហេតុ​ពស់មួយក្បាលឆេះខ្លោច រថយន្ត​ពន្លត់​អគ្គិភ័យ​ ៦ គ្រឿង​ត្រូវ​បាន​បញ្ជូន​ទៅ​ដល់​កន្លែង​​កើត​ហេតុ។

បើតាម Tohoku Electric Power ពស់ប្រហែលជាកំពុងស្វែងរកជម្រកកុំអោយក្តៅ ប៉ុន្តែរកខុសកន្លែង។ វាលូនចូល​ទៅ​ក្នុង​ស្ថានីយ៍​ចែក​ចាយ​បន្តហើយប៉ះខ្សែភ្លើង ដែលបណ្តាលឱ្យដំណើរការប្រព័ន្ធបិទម៉ាសុីនដោយស្វ័យប្រវត្តិដើម្បី​សុវត្ថិភាព។

សំណាងល្អ ឧបទ្ទវហេតុនេះអូសបន្លាយត្រឹមរយៈពេល ១ ម៉ោង ប៉ុន្តែក្រោមអាកាសធាតុក្តៅខ្លាំងបែបនេះ ជៀសមិន​ផុត​រឿង​មនុស្សជាច្រើនមានការ​ត្អូញ​ត្អែរ​នោះ​ទេ។ មិន​ត្រឹម​តែ​ប្រជាជន សូម្បីតែអាជីវកម្មក្នុងស្រុកក៏​ប៉ះពាល់​ផង​ដែរ។

ទន្ទឹមនឹងនេះមនុស្សមួយចំនួនក៏អាណិតអាសូរសត្វពស់ ហើយរិះគន់ដល់នាយកដ្ឋានអគ្គិសនីមិន​បាន​ត្រួតពិនិត្យ​ប្រព័ន្ធអោយល្អជាងនេះ។

• អីយ៉ា ដាច់ភ្លើងម៉ោង ២ រសៀល យ៉ាប់ណាស់។
• ពស់ដែលគួរអោយអាណិត ខ្ញុំ​កើត​ឆ្នាំ​ម្សាញ់ ហើយឃើញថាករណីនេះគួរអោយសោក​ស្តាយ​ណាស់។
• ប្រសិនបើប្រព័ន្ធត្រូវរន្ទះបាញ់ ឬអ្វីផ្សេង ខ្ញុំអាចនឹងយល់ ប៉ុន្តែនេះពស់? …
• ទ្រឹស្តីមួយនិយាយថា ក្រុមជនល្មើសយកពស់ធ្វើអោយ​ដាច់​ចរន្ត​អគ្គិសនី។
• R.I.P ផងពស់។
• ខ្ញុំសុខចិត្តដាច់ភ្លើង ១ ម៉ោង ជាជាងអោយពស់ចូលផ្ទះ។
• អាណិតពស់នោះណាស់ ក្រុមហ៊ុន​គួរ​តែ​សុំទោស និង​សង​ជំងឺ​ចិត្ត​ដល់គ្រួសាររបស់វា។

មតិយោបល់រិះគន់ទាំងនេះថែមទាំងលេងពាក្យហៅថា “Hebi story” ។ Hebi (ពស់ជាភាសាជប៉ុន) បញ្ចេញសំឡេងស្រដៀងនឹងពាក្យ “ធ្ងន់” (heavy) ដែល​បក​ប្រែថា “រឿងធ្ងន់ធ្ងរ” ។

តាមពិតទៅ នេះមិនមែនជាករណីដំបូងសត្វបង្កការខូចខាតហេដ្ឋារចនាសម្ព័ន្ធនៅជប៉ុននោះទេ។ យើង​ធ្លាប់ជួបរឿង​គួរ​ឱ្យ​អស់​សំណើច​ដូច​​ជា​អណ្តើក លាមកបក្សីប៉ះពាល់ដល់ភ្លើងចរាចរណ៍ ឬ​ឆ្កែនោមលើ​បង្គោល​ភ្លើង​ធ្វើអោយ​រលំបង្គោល។ សង្ឃឹមថាមានវិធានការការពារកាន់តែប្រសើរឡើង ដើម្បីជៀសវាងរឿងទាំងនេះកើតឡើងម្តងទៀត។

Sacchan