បុរសម្នាក់ត្រូវចាប់ខ្លួនពីបទយកលលាដ៍​ក្បាលប្អូនប្រុសទៅបោះចោល

កាលពីថ្ងៃទី ២១ ខែមិថុនា កម្មកររោងចក្រកែឆ្នៃនៅ Adachi ទីក្រុងតូក្យូ មានការភ្ញាក់ផ្អើលយ៉ាងខ្លាំងដែលបាន​រក​ឃើញ​លលាដ៍ក្បាល​មនុស្សក្នុងចំណោមកាកសំណល់ដឹកជញ្ជូនមកដល់។

ក្រោយមកលលាដ៍ក្បាលត្រូវបានបញ្ជាក់ថាជារបស់ Hideo Murai អាយុ ៦៧ ឆ្នាំនៅ Kita ទីក្រុងតូក្យូ។ ក្រៅ​ពី​លលាដ៍​ក្បាល​ក្នុង​ថង់​សំរាមក៏​បាន​រក​ឃើញ​កាត​ធនាគារ​របស់ Murai ផង​ដែរ។ ប៉ូលីសក្រុងតូក្យូបានបើកការស៊ើបអង្កេត ហើយនៅថ្ងៃទី ២៩ ខែមិថុនាបានចាប់ខ្លួនបងប្រុសរបស់អ្នកស្លាប់ឈ្មោះ Shoichi Murai អាយុ ៦៨ ឆ្នាំ ដោយ​ចោទ​ប្រកាន់​ពី​បទ​បោះ​ចោល​អដ្ឋិធាតុ​មនុស្ស​ដោយ​ខុស​ច្បាប់។

ទោះជាយ៉ាងណា Murai បានបដិសេធការចោទប្រកាន់នេះ ដោយនិយាយថាគាត់បានរកឃើញអដ្ឋិធាតុប្អូនប្រុសក្នុងបន្ទប់ ប៉ុន្តែគិតថានោះជារបស់ក្លែងក្លាយ។ បងប្អូនពីរនាក់រស់ក្នុងផ្ទះតែមួយនៅ Kita បុរសជាបង Shoichi រស់នៅជាន់ទី ១ ចំណែក Hideo រស់នៅជាន់ទី ២ ។ លោក Shoichi អះអាងថាគាត់មិនបាននិយាយជាមួយប្អូនប្រុស​តាំង​ពី​ខែ​មីនា ឆ្នាំ ២០១៧ ។ ជនសង្ស័យ​ប្រទះឃើញ​លលាដ៍ក្បាលពេលកំពុងសម្អាតបន្ទប់សម្រាប់លក់ ដោយបន្ថែម​ថា “ខ្ញុំមិនដឹងថាវា (ប្អូនប្រុស) កំពុងសម្រាកនៅមន្ទីរពេទ្យណាទេ?”

ប៉ូលីស​ឆែកឆេរ​កន្លែង​ស្នាក់នៅរបស់ Hideo ហើយរកឃើញអដ្ឋិធាតុដែលនៅសល់ដេក​លើ​គ្រែ។ យោងតាមលទ្ធផលធ្វើកោសល្យវិច័យ មនុស្សម្នាក់នេះបានស្លាប់យ៉ាងហោចណាស់ពីរបីខែ ប៉ុន្តែគាត់ត្រូវបានគេបញ្ជាក់ថានៅមានជីវិត​ក្នុង​ឆ្នាំ ២០១៧ នេះបើយោងតាមការអះអាងរបស់លោក Shoichi ដែលជាលើកចុងក្រោយអ្នកទាំងពីរប្រា​ស្រ័យ​ទាក់​ទង​គ្នា។ អាជ្ញាធរ​ក៏​កំពុង​ពិនិត្យ​រក​មូលហេតុ​ការ​ស្លាប់ផងដែរ។ របាយការណ៍​រហូត​មក​ដល់​ពេល​នេះ​មិន​មាន​​សញ្ញា​​នៃ​​អំពើ​​ហិង្សា​​ទេ។

ករណី​នេះ​កំពុង​ត្រូវ​បាន​ពិភាក្សា​យ៉ាងច្រើននៅ​លើ​បណ្តាញ​អុីនធឺណេត។

  • ទោះ​ជា​របស់​ក្លែងក្លាយ​ក៏​ដោយ ហេតុ​អ្វី​បាន​ជា​បោះ​ចោល​លលាដ៍​ក្បាលប្អូនប្រុសបែប​នេះ?
  • ពួកគេ​រស់នៅ​ផ្ទះ​តែមួយ ហើយ​គាត់​មិនដឹងថា​ប្អូនប្រុសស្លាប់​រហូតដល់​រកឃើញ​គ្រោង​ឆ្អឹង​?
  • ហេតុអ្វីបានជាមិនមានក្លិន?
  • ហេតុ​អ្វីចោលតែក្បាល? ក្រែងគាត់មើលឃើញគ្រោងឆ្អឹងទាំងមូលឬ តើមានរឿងអ្វីកើតឡើង?
  • បងប្រុសម្នាក់ដែលគួរអោយខ្លាច។

ហេតុ​ការណ៍សម្លាប់សាច់ញាតិលាក់សាកសពដើម្បីទទួលបានប្រាក់សោធននិវត្តន៍ ឬអត្ថប្រយោជន៍​ផ្សេង​ទៀតមិន​មែន​មិន​ធ្លាប់​កើត​ឡើង​ឡើយ។ ទោះជាយ៉ាងណា ជាទូទៅករណីបែបនេះត្រូវបានប៉ូលីសដោះស្រាយយ៉ាងលឿន។ ប៉ុន្តែ​ក្នុង​ករណី​នេះ​មិន​ទាន់​មាន​របាយការណ៍​ស្តី​ពី​ប្រាក់​សោធន​និវត្តន៍​ ឬ​ប្រាក់​អត្ថប្រយោជន៍ខុសច្បាប់​ទេ។

មិនត្រឹម​តែប៉ុណ្ណឹងបុគ្គល​ម្នាក់​នេះ​មិនដឹងថាប្អូនប្រុសដែលរស់នៅក្នុងផ្ទះតែមួយស្លាប់យូរ​មក​ហើយ​ ជា​រឿងដែលមិន​ធ្លាប់​មាន​ពី​មុន​មក។

Sacchan

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: