ទំនាក់ទំនងរវាងអ្នកស្រុក Kyoto និងភ្ញៀវទេសចរណ៍បរទេសក្រោមស្ថានភាពប្រាក់យ៉េនធ្លាក់ចុះ

Yasuko Fujii ម្ចាស់ហាងស្រាដែលមានអាយុកាល ២៣០ ឆ្នាំនៅ Kyoto មានអារម្មណ៍ច្របូកច្របល់ចំពោះការ​វិល​ត្រឡប់​មក​វិញ​របស់​ភ្ញៀវ​ទេស​ចរណ៍​បរទេស។ ថ្វីត្បិតតែភ្ញៀវទេសចរណ៍ទិញគ្រឿងស្រវឹងច្រើន ប៉ុន្តែពួកគេក៏សម្រុកទៅ​បំពេញ​ផ្លូវ​ដែលធ្លាប់តែស្ងាត់នៅ Kyoto អំឡុងពេលជំងឺ​រាត​ត្បាត។

អារម្មណ៍ច្របូកច្របល់របស់ម្ចាស់រូបនេះក៏ឆ្លុះបញ្ចាំងពីភាពមិនប្រាកដប្រជារបស់ប្រជាជនជប៉ុនផងដែរ ខណៈដែល​ប្រទេសនេះកំពុងព្យាយាមបើកដំណើរការឡើងវិញ ហើយការធ្លាក់ថ្លៃរបស់ប្រាក់យ៉េននឹងផ្តល់អត្ថប្រយោជន៍យ៉ាងខ្លាំងសម្រាប់ភ្ញៀវទេសចរណ៍ ក៏​ដូច​ជា​អាជីវកម្ម​ក្នុង​ស្រុក។

លោក Fujii អាយុ ៧៩ ឆ្នាំ​បាន​និយាយ​ថា “តាមទស្សនៈអាជីវកម្ម យើង​ចង់អោយភ្ញៀវទេសចរណ៍បរទេសមកលេង ប៉ុន្តែ​​តាម​​ទស្សនៈ​​ផ្ទាល់​​ខ្លួន យើង​ចង់​បាន​តែ​ភ្ញៀវ​​ជប៉ុន​ប៉ុណ្ណោះ” ។

កាលពីមុន អ្នកស្រុកធ្លាប់ជួបប្រទះស្ថានភាពភ្ញៀវទេសចរណ៍រាប់លាននាក់មកពីប្រទេសចិន កូរ៉េ និងអាស៊ីអាគ្នេយ៍​សម្រុក​ចូល​ផ្សារ Nishiki ។ ការ​បើក​ចំហ​របស់​ជប៉ុនចំពោះទេសចរណ៍ពិតជាមានអត្ថប្រយោជន៍ផ្នែកសេដ្ឋកិច្ច ប៉ុន្តែចំណុចទាំងនេះបានបណ្តាលឱ្យមានការត្អូញត្អែរចំពោះអាកប្បកិរិយាមិនល្អរបស់ភ្ញៀវទេសចរណ៍នៅកន្លែង​វប្បធម៌​ដូច​ជា​ប្រាសាទ​នៅ Kyoto ។

ទោះយ៉ាងណា Kyoto ជាទីក្រុងចំណាស់ ល្បីជាមួយនឹងផ្លូវតូចចង្អៀត ហាងតែ និងផ្ទះសំណាក់បែបប្រពៃណី ហើយភាគច្រើនផ្អែកលើវិស័យ​ទេស​ចរណ៍។

ចំពោះប្រាក់យ៉េនធ្លាក់ចុះរយៈពេលជាង ២ ទសវត្សរ៍ និងការស្តារវិស័យទេសចរណ៍ពិភពលោក សណ្ឋាគារ និងហាងនំបែបប្រពៃណីនៅ Kyoto គួរតែត្រៀមសម្រាប់កំណើនទេសចរណ៍។ ទោះជាយ៉ាងណា ចំនួនភ្ញៀវទេសចរណ៍ចូលប្រទេស​ជប៉ុន​តិច​តួច​បំផុត​អំឡុងពេលនេះ ព្រោះ​រដ្ឋាភិបាល​ទទួល​យក​មនុស្សមួយចំនួនតូចចូលប្រទេសប៉ុណ្ណោះ ហើយ​ទើបតែអនុវត្តការបន្ធូរបន្ថយព្រំដែនចាប់ពីខែមិថុនាកន្លងទៅ។ ចំណុចនេះធ្វើ​ឱ្យ​ចំនួន​ភ្ញៀវទេសចរណ៍ចូលប្រទេស​ជប៉ុន​កើន​ឡើង​ច្រើន បន្ទាប់​ពី​ប្រទេស​នេះ​បើក​ជា​ផ្លូវ​ការ។

ម្ចាស់​ហាង​ដែល​គ្រប់​គ្រង​ដោយ​ខ្លួន​ឯង​នៅ Kyoto បាននិយាយថា “បញ្ហាមិនស្ថិតលើភ្ញៀវទេសចរណ៍បរទេសនោះទេ ប៉ុន្តែស្ថិតលើសមត្ថភាពរបស់យើងអាចបំពេញតម្រូវការរបស់ពួកគេ។ ប្រសិន​បើ​មាន​មនុស្ស​ជាច្រើនមក យើង​មិន​​អាច​​ធានា​​នូវ​​អាកប្បកិរិយា​​រាក់​ទាក់​ចំពោះ​ភ្ញៀវ​ម្នាក់ៗ​បាន​ទេ” ។

យោងទៅតាមក្រុមហ៊ុនស្រាវជ្រាវ Teikoku Databank ចំនួនសណ្ឋាគារបិទទ្វារទូទាំងប្រទេសកើនឡើងដល់កម្រិតខ្ពស់​ក្នុង​រយៈ​ពេល ៥ ឆ្នាំ នៅឆ្នាំ ២០២១ ហើយវិស័យទេសចរណ៍ក្នុងស្រុកនៅ Kyoto រងផលប៉ះពាល់ធ្ងន់ធ្ងរ។

លោក Hiroshi Fujie នាយក Hakuba បាននិយាយថា “Kyoto ជាទីក្រុងទេសចរណ៍ ហើយបើគ្មានភ្ញៀវទេសចរណ៍បរទេស យើងប្រាកដជាជួបបញ្ហា”។ លោកមិន​ប្រាកដ​ថា​ហាង​នេះ​អាចបន្តរយៈពេលមួយឆ្នាំទៀតឬអត់ទេ ប្រសិន​បើ​គ្មាន​ភ្ញៀវ​ទេស​ចរណ៍​បរទេស។

Sacchan