ហេតុអ្វីបានជាសិក្ខាកាមវៀតណាមនៅ Hiroshima សម្លាប់កូនបង្កើតរបស់ខ្លួន?

ថ្ងៃពុធ 29/06/2022 | 17:40 ល្ងាច

កន្លងមកធ្លាប់មានព័ត៌មាននិយាយពីកម្មសិក្សាការីត្រូវចាប់ខ្លួន និងកាត់ទោសនៅតុលាការសង្កាត់ Hiroshima ពីបទឃាតកម្មលើទារក ដែលជាកូនបង្កើតរបស់ចុងចោទ។

ហេតុអ្វីបានជាអ្នកម្តាយរូបនេះសម្លាប់កូនរបស់ខ្លួន?

ស្រ្តីជនជាតិវៀតណាមទៅជប៉ុនក្នុងនាមជាអ្នកហាត់ការបច្ចេកទេស ធ្លាប់ឮពាក្យចចាមអារ៉ាមថា បើអ្នកហាត់ការបរទេសមានផ្ទៃពោះនឹងត្រូវបណ្តេញចេញ។ នេះជាពាក្យចចាមអារ៉ាមមិនពិត ប៉ុន្តែនាងជឿលើរឿងនេះ ដែលបណ្តាលអោយមានហេតុការណ៍ដ៏ក្រៀមក្រំខាងលើ។

ក្នុងសេចក្តីសម្រេចនៅខែឧសភា តុលាការបានចង្អុលបង្ហាញថា អ្នកពាក់ព័ន្ធនឹងកម្មវិធីសិក្ខាកាមមិនបានណែនាំច្បាស់លាស់ ហើយសោកនាដកម្មដែលអាចនឹងជៀសផុត ប្រសិនបើកម្មសិក្សាការីទទួលបានព័ត៌មានគ្រប់គ្រាន់។

កម្មសិក្សាការីអាយុ ២៧ ឆ្នាំជាស្រ្តីមេម៉ាយដែលទៅដល់ប្រទេសជប៉ុនប្រហែល ២,៥ ឆ្នាំមុន ដើម្បីរកប្រាក់ចិញ្ចឹមកូនតូចនៅស្រុកកំណើត។ នាងធ្លាក់ក្នុងបំណុលដោយសារត្រូវបង់ “ថ្លៃឈ្មួញកណ្តាល” ដើម្បីចូលរួមកម្មវិធីសិក្ខាកាម។ ចំនួននេះច្រើនជាង ១០០ ដងប្រាក់ដែលឪពុកម្តាយនាងរកបានក្នុងមួយឆ្នាំ។

ចុងចោទប្រាប់តុលាការថា នាងមិនអាចចូលរៀនសាកលវិទ្យាល័យព្រោះមិនចង់ឱ្យកូនស្រីធំដឹងក្តីក្នុងភាពក្រីក្រ។ ក្នុងនាមជាសិក្ខាកាមផ្នែកបច្ចេកទេស នាងប្រមូលផលបន្លែ និងធ្វើការងារផ្សេងទៀតនៅកសិដ្ឋានតំបន់ភ្នំ Higashi-Hiroshima នៅ Hiroshima ។ នាងផ្ញើប្រាក់ប្រចាំខែជិត ៩០% (១០០,០០០ យ៉េន) ទៅស្រុក។

កម្មសិក្សាការីមានមិត្តប្រុសនៅប្រទេសជប៉ុន ប៉ុន្តែជននោះបាត់ខ្លួនបន្ទាប់ពីដឹងថានាងមានផ្ទៃពោះជាមួយខ្លួន។ ចុងចោទសារភាពថា នាងមិនហ៊ានពិគ្រោះជាមួយអ្នកណាទេ ព្រោះខ្លាចត្រូវបណ្តេញចេញ។

នាងទៅកាន់មន្ទីរពេទ្យ Higashi-Hiroshima ចំនួនពីរដង ម្តងទៅដើម្បីរំលូតកូន និងលើកទីពីរដើម្បីពិគ្រោះជាមួយវេជ្ជបណ្ឌិតចំពោះការសម្រាលកូន។ ប៉ុន្តែនាងបានអោយដឹងថា នាងត្រូវគេបដិសេធសេវាពេទ្យទាំងពីរលើកព្រោះគ្មានអ្នកបកប្រែ។

នាងបិទបាំងពោះដែលកាន់តែធំដោយប្រើអាវក្រៅ ហើយបន្តទៅធ្វើការ។

នៅខែវិច្ឆិកា ឆ្នាំ ២០២០ នាងសម្រាលកូននៅអន្តេវាសិកដ្ឋានក្រុមហ៊ុនរបស់នាងនៅ Higashi-Hiroshima ។ ប៉ុន្តែនាងខ្លាចសម្លេងយំរបស់ទារកធ្វើឱ្យលាតត្រដាងរឿងនេះ នាងយកស្កុតបិទមាត់ទារក ហើយទុកឱ្យទារកថប់ដង្ហើម នេះបើតាមដំណើររឿងក្នុងសវនាការ។ បន្ទាប់មកនាងបញ្ចុះសពទារកក្នុងបរិវេណអន្តេវាសិកដ្ឋាន។

ក្រោយមកស្ត្រីដែលជាសិក្ខាកាមត្រូវកាត់ទោសពីបទទុកចោលសាកសព និងបោះបង់តួនាទីជាអាណាព្យាបាលបណ្តាលអោយទារកស្លាប់។ នាងទទួលស្គាល់ការចោទប្រកាន់ក្នុងការជំនុំជម្រះដំបូង។

ចុងចោទយំ និងសុំទោសទារកនៅពេលបញ្ចប់សវនាការ។ នាងអង្វរសុំអភ័យទោស ដោយបន្ថែមថា នាងតែងតែគិតដល់កូនរបស់ខ្លួន។

ប្រធានចៅក្រម Mio Mimura បានរិះគន់ចុងចោទថា “ខ្វះទំនួលខុសត្រូវក្នុងនាមជាម្តាយ” ។ កាលពីថ្ងៃទី ៣១ ខែឧសភា តុលាការកាត់ទោសចុងចោទជាប់ពន្ធនាគារ ៣ ឆ្នាំ។ ប៉ុន្តែក្រោយមក Mimura ផ្អាកការកាត់ទោសនេះរយៈពេលបួនឆ្នាំ។

ចៅក្រមបានចង្អុលបង្ហាញថា មន្ត្រីក្រុមហ៊ុនដឹងអំពីការផ្លាស់ប្តូររាងកាយរបស់សិក្ខាកាម ប៉ុន្តែមិនអាចកំណត់ស្ថានភាពរបស់នាង។ លើសពីនេះ ក្រុមត្រួតពិនិត្យដែលទទួលខុសត្រូវការពារសិក្ខាកាមមិនបានកត់សម្គាល់រឿងមានផ្ទៃពោះក្នុងអំឡុងពេលប្រជុំធម្មតាឡើយ។

“ប្រសិនបើពួកគេយកចិត្តទុកដាក់ចំពោះបុគ្គលិករបស់ខ្លួន ចុងចោទនឹងរួចផុតពីស្ថានភាពសម្រាលកូនតែម្នាក់ឯង។ ជាការពិតនាងមិនទទួលបានជំនួយពីឪពុកទារក និងភាគីមន្ទីរពេទ្យ ទាំងចុងចោទព្យាយាមសុំជំនួយ ដែលជាចំណុចសំខាន់ក្នុងករណីនេះ” ។

ចៅក្រមក៏បាននិយាយថា “ចុងចោទគ្មានជម្រើសអ្វីក្រៅពីជឿលើពាក្យចចាមអារ៉ាម” ដែលថាសិក្ខាកាមត្រូវបណ្តេញចេញប្រសិនបើមានផ្ទៃពោះ។

សិក្ខាកាមបរទេសផ្នែកបច្ចេកទេសត្រូវបានការពារដោយច្បាប់ស្តីពីឱកាសការងារស្មើគ្នា ដែលហាមឃាត់ការបណ្តេញកម្មករមានផ្ទៃពោះ។ យោងតាមការស្ទង់មតិដែលធ្វើឡើងដោយលោក Masako Tanaka សាស្ត្រាចារ្យសហប្រតិបត្តិការអន្តរជាតិ និងស្រាវជ្រាវផ្នែកយេនឌ័រនៅសាកលវិទ្យាល័យ Sophia ពាក្យចចាមអារ៉ាមត្រូវបណ្តេញចេញប្រសិនបើមានផ្ទៃពោះហាក់ដូចជាផ្សព្វផ្សាយក្នុងចំណោមសិក្ខាកាមនៅជប៉ុន។

ក្នុងចំណោមស្ត្រីបរទេសចំនួន ៣០១ នាក់ធ្វើការ ឬសិក្សានៅប្រទេសជប៉ុនដែលបានចូលរួមការស្ទង់មតិនេះ ស្ត្រីចំនួន ៤៩ នាក់ រួមទាំងអ្នកហាត់ការផ្នែកបច្ចេកទេសចំនួន ១២ នាក់បាននិយាយថា អង្គការដែលបញ្ជូនអ្នកហាត់ការក្នុងប្រទេសម្ចាស់ផ្ទះ ក្រុមហ៊ុន និងសាលារៀននៅជប៉ុនប្រកាសថា មានផ្ទៃពោះនឹងត្រូវបណ្តេញចេញ។

ទិន្នន័យរបស់នាយកដ្ឋានការងារបង្ហាញថា កម្មសិក្សាការីភាគច្រើនដែលមានផ្ទៃពោះ ឬសម្រាលកូនក្នុងអំឡុងពេលបណ្តុះបណ្តាលសុទ្ធតែមិនត្រឡប់ទៅធ្វើការវិញ។ យោងតាមក្រសួង កម្មសិក្សាការីផ្នែកបច្ចេកទេសចំនួន ៦៣៧ នាក់បានបញ្ឈប់កម្មវិធីសិក្សាដោយសារមានផ្ទៃពោះ ឬសម្រាលកូននៅចន្លោះខែវិច្ឆិកា ឆ្នាំ ២០១៧ ដល់ខែធ្នូ ឆ្នាំ ២០២០ ។ ក្នុងចំណោមពួកគេមានតែ ១១ នាក់ ឬស្មើនឹង ១,៧% បន្តការបណ្តុះបណ្តាល។

Yasuko Iwashita សាស្ត្រាចារ្យរងនៅសាកលវិទ្យាល័យ Bunkyo នៃសាកលវិទ្យាល័យ Hiroshima ស្រាវជ្រាវបញ្ហាអ្នកហាត់ការបច្ចេកទេសបាននិយាយថា “សង្គមជប៉ុនមិនអើពើនឹងពួកគេ” ។

Sacchan