កន្លែងទាំង ៤ នៅ Shibamata ដែលអ្នកគួរតែទៅលេងរំលឹកដល់សម័យ Showa បុរាណ

Shibamata (柴又) ជាសង្កាត់បុរាណដែល​មាន​លក្ខណៈ​គួរ​ឱ្យ​ចាប់​អារម្មណ៍​ជា​ច្រើន​។ គួរអោយស្តាយកន្លែងនេះនៅ​តែ​មិន​ទាន់​មាន​អ្នក​ស្គាល់​ច្រើន​នោះ​ទេ។

ភ្ញៀវទេសចរណ៍ជាច្រើនចូលចិត្តទៅកាន់ទីក្រុងធំ ដោយជ្រើសរើសតំបន់អ៊ូអរដូចជា Harajuku និង Shibuya ។ ប៉ុន្តែ​ប្រាកដ​ណាស់​មិនមែនមនុស្សគ្រប់គ្នា ឬគ្រប់ពេលអ្នកតែងតែចូលចិត្តភាពអ៊ូអរឡើយ។

នៅសង្កាត់ Katsushika, Tokyo, Shibamata អាចទៅលេងបានយ៉ាងងាយស្រួល និងមិនឆ្ងាយពីទីប្រជុំជន Tokyo ក៏​ដូច​ជា​ខេត្ត Chiba រួមទាំង Edogawa, Katsushika ជាកន្លែងល្អ ប្រសិនបើអ្នកចូលចិត្តប្រាសាទ និងទេសភាពធម្មជាតិ។

នៅ Shibamata ក៏មានប្រាសាទពុទ្ធសាសនា និងដងផ្លូវបុរាណដែលពោរពេញទៅដោយហាងកំសាន្ត ហាងលក់អាហារ និងនៅក្នុងបរិយាកាសបុរាណ។ ទាំងនេះជាកន្លែងកំសាន្តសំខាន់ៗ​មួយ​ចំនួន​ដែល​អ្នក​អាច​ទៅ​លេងខាងក្រោម។

១. ប្រាសាទ Shibamata Taishakuten

ប្រាសាទ Shibamata Taishakuten (柴又帝釈天) ឈ្មោះផ្លូវការ Daikyō-ji (題経寺) នៅជិតស្ថានីយ៍រថភ្លើង មើល​ពី​ខាង​ក្រៅ​មាន​ចម្លាក់​​​ឈើ​​ស្រស់ស្អាត ប៉ុន្តែមានអាយុកាលយូរមកហើយ។ វិចិត្រករដែលបានចូលរួមចំណែក​ឆ្លាក់​ក៏​រួម​ចំណែកក្នុងការសាងសង់ទីសក្ការបូជា Toshogu (東照宮) ជាកន្លែងទស្សនាដ៏ពេញនិយមបំផុតនៅ Nikkō ផង​ដែរ។

ជាងនេះទៅទៀត ប្រាសាទហ៊ុំព័ទ្ធទៅដោយសួនច្បារបែបជប៉ុនស្រស់ស្អាត នៅចុង Shibamata Sandō (柴又参道) ជា​ផ្លូវ​ដើរ​ទិញឥវ៉ាន់ដែលពេញដោយភោជនីយដ្ឋាន ហាងលក់កាដូ និងតូបលក់វត្ថុអនុស្សាវរីយ៍បែបប្រពៃណី។

២. Yamamoto-Tei

មានទីតាំងនៅខាងក្រោយ Shibamata ជិតប្រាសាទ Shibamata Taishakuten អ្នកអាចទៅដល់ Yamamoto-Tei អតីត​លំនៅ​ដ្ឋាន​របស់អ្នកជំនួញ Yamamoto Einosuke ។

នៅទីនេះ អ្នកអាចរីករាយជាមួយនឹងតែមួយពែង និងបង្អែមបែបប្រពៃណីក្នុងតម្លៃសមរម្យ ហើយក៏អាចចំណាយពេល​សម្រាក​លំហែកាយ គយគន់ទេសភាពសួនច្បារ និងស្ថាបត្យកម្មអគារ។

៣. សារមន្ទីរ Tora-san

Shibamata ជាទីតាំងថតស៊េរីរឿងល្បី 男はつらいよ (ធ្វើជាបុរសពិតជាពិបាក) ចូលរួមសម្តែងដោយ Kiyoshi Atsumi ដើរតួ Tora-san (寅さん) ជាបុរសចិត្តល្អ ប៉ុន្តែតែងជួបឧបសគ្គស្នេហា។ សុរបមានចំនួន ៤៨ វគ្គចេញផ្សាយ​តាំងពីឆ្នាំ ១៩៦៩ ដល់ឆ្នាំ ១៩៩៥ ខ្សែភាពយន្តនេះទទួលបានកំណត់ត្រាពិភពលោកហ្គីណេសស៊េរីរឿងភាគដែល​មានតួសម្តែងតែម្នាក់។

អ្នកគាំទ្រអាចទទួលទានអាហារនៅភោជនីយដ្ឋានដែលមានក្នុងភាពយន្ត និងទស្សនាសារមន្ទីរដោយឡែកសម្រាប់​​ខ្សែ​ភាព​យន្ត​នេះ។

នៅពេលដើរចូលសារមន្ទីរ Tora-san អ្នកនឹងមានអារម្មណ៍ដូចជាវិលត្រឡប់ទៅសម័យ Showa វិញ។

៤. Haikara Yokochō

ប្រសិនបើអ្នកចូលចិត្ត dagashi (អាហារសម្រន់ និងបង្អែមជប៉ុន) Haikara Yokochō (ハイカラ横丁) ជាកន្លែងដែល​អ្នក​គួរ​តែទៅ។ ជាទីតាំងរំលឹកដល់ខ្សែភាពយន្ត ដូច្នេះសាកសមបំផុតសម្រាប់ថតរូបរួចបង្ហោះនៅលើ Instagram ។

អ្នកក៏អាចស្វែងរកអាហារសម្រន់ជាច្រើនប្រភេទ រួមទាំងអាហារសម្រន់ដែលផ្សារភ្ជាប់នឹងវ័យកុមារភាពរបស់ប្រជាជន​ជប៉ុនផងដែរ។

Sacchan