កក្រើកករណីអ្នកនយោបាយជប៉ុនជ្រុលដៃប៉ះដើមទ្រូងមិត្តរួមការងារស្រីក្នុងយុទ្ធនាការបោះឆ្នោតសហគមន៍

ថ្ងៃអង្គារ 28/06/2022 | 15:22 ល្ងាច

អ្នកនយោបាយគណបក្ស (Japan Innovation Party) ជប៉ុនថ្មីៗនេះបានបង្កឱ្យមានការជជែកដេញដោលគ្នាលើបណ្ដាញសង្គម ដោយសារតែអាកប្បកិរិយាជ្រុលចំពោះ Ebisawa Yuki ។

រដូវកាលបោះឆ្នោតព្រឹទ្ធសភាតែងតែមានរឿង drama ហើយឆ្នាំនេះក៏មិនមែនជាករណីលើកលែងដែរ។ អ្នកនយោបាយ Inose Naoki នៃគណបក្ស Japan Innovation Party (Nippon Ishin no Kai; 日本維新の会) ប្រជានិយម កំពុងប្រឈមមុខនឹងការរិះគន់ជាច្រើនចំពោះអាកប្បកិរិយារបស់ខ្លួនជាមួយសមាជិកស្រី ក្នុងសុន្ទរកថាយុទ្ធនាការឃោសនាបោះឆ្នោតនៅទីក្រុងតូក្យូកាលពីថ្ងៃទី ១២ ខែមិថុនាថ្មីៗនេះ។

ក្នុងសុន្ទរកថាបោះឆ្នោតដែលត្រូវបានថតទុក និងបង្ហោះលើ YouTube លោក Inose ណែនាំបេក្ខជន និងជាអតីតអ្នកជិះស្គីអាជីព Ebisawa Yuki ។ ដំបូងឡើយ អ្នកនយោបាយរូបនេះអានឈ្មោះខុស រួចយកដៃប៉ះស្មារបស់នាងពេលសុំទោស បន្ទាប់មកដៃប៉ះឆ្អឹងដងកាំបិត និងដើមទ្រូង។ វីដេអូនេះត្រូវបានកំណត់ជាទម្រង់ឯកជន ប៉ុន្តែឃ្លីបរយៈពេល ១៥ វិនាទីដែលបង្ហោះដោយអ្នកប្រើគណនី @GreatRaiden ត្រូវបានចែករំលែកនៅលើ Twitter យ៉ាងឆាប់រហ័ស។ បច្ចុប្បន្នវីដេអូនេះមានអ្នកមើលប្រហែល ២,៣ លាននាក់។

動画で見るとより酷いです。 pic.twitter.com/VUOGOhF1TV
— great_raiden (@GreatRaiden) June 16, 2022

ជាទូទៅប្រតិកម្មចំពោះវីដេអូភាគច្រើនជាកំហឹង និងការស្អប់ខ្ពើមដោយថ្កោលទោសចំពោះទង្វើបៀតបៀនផ្លូវភេទ។ អ្នកយកព័ត៌មានស្រីម្នាក់បានបង្ហោះ tweet ថា “ដោយសារការបៀតបៀនផ្លូវភេទចំពោះអ្នកនយោបាយ និងអ្នកឈរបោះឆ្នោតស្រ្តីជាបញ្ហាធំនាពេលនេះ ខ្ញុំមិនដឹងថាធ្លាប់ឮប៉ុន្មានដងមកហើយ បេក្ខជនជាស្ត្រីនិយាយថា ពួកគេមានអារម្មណ៍មិនល្អព្រោះត្រូវប៉ះពាល់អំឡុងពេលយុទ្ធនាការឃោសនាបោះឆ្នោត” ។

នៅថ្ងៃទី ១៧ ខែមិថុនា លោក Inose បានបង្ហោះសារសុំទោស ដោយទទួលស្គាល់ការធ្វេសប្រហែសរបស់ខ្លួន ហើយសន្យាថានឹងចាប់អារម្មណ៍ចំពោះអាកប្បកិរិយា។ នៅពេលដែល Business Insider ទាក់ទងទៅកាន់ក្រុមនយោបាយដើម្បីស្តាប់យោបល់របស់ពួកគេ ពួកគេយល់ស្របថាលោក Inose ជ្រុលជ្រួស និងបង្ហាញពីចេតនាការពារមិនឱ្យរឿងស្រដៀងគ្នានេះកើតឡើង។ Ebisawa ចូលទៅកាន់ Twitter ដោយនិយាយថានាងពិតជាភ្ញាក់ផ្អើលចំពោះការជជែកដេញដោលតាមអុីធឺណេត នាងនិយាយថាលោក Inose “ស្ទើរតែមិនប៉ះដើមទ្រូងរបស់នាង” ទេ ហើយជឿថាការសុំទោសរបស់បុគ្គលម្នាក់នេះដោយស្មោះ។ ហេតុនេះទើបបញ្ហាស្ងប់ទៅវិញ ប៉ុន្តែនៅតែមានមតិជាច្រើនទាក់ទងនឹងបញ្ហាបៀតបៀនផ្លូវភេទ។

ភាពជាក់ស្តែងករណីបៀតបៀនផ្លូវភេទក្នុងពិភពនយោបាយជប៉ុន

ករណីនេះបានបន្តការពិភាក្សាអំពីបញ្ហាបៀតបៀនផ្លូវភេទ ជាពិសេសនៅពេលដែលស្ត្រីត្រូវបានទទួលស្គាល់ក្នុងពិភពនយោបាយ។ បើប្រៀបនឹងភាគីបុរស អ្នកនយោបាយស្ត្រីនៅជប៉ុនងាយរង “ការបៀតបៀនអ្នកបោះឆ្នោត” (ភាសាជប៉ុនហៅថា hyou hara 票ハラ) ។ ការស្ទង់មតិដោយការិយាល័យខុទ្ទកាល័យនៅឆ្នាំ ២០២១ មាន ៦១,៨% ក្នុងចំណោមអ្នកឆ្លើយសំណួរ ៩៩៤ នាក់មិនចូលរួមការបោះឆ្នោតបាននិយាយថា ពួកគេត្រូវប្រឈមមុខនឹងទម្រង់បៀតបៀនផ្លូវភេទពីអ្នកបោះឆ្នោត និងអ្នកនយោបាយ ដែលក្នុងនោះស្ត្រីមានចំនួន ៦៥,៥% និងបុរស ៥៨% ។

ក្នុងការបោះឆ្នោតសភាតំណាងរាស្រ្តកាលពីខែវិច្ឆិកាឆ្នាំមុន មានស្រ្តីតែ ៤៥ នាក់ប៉ុណ្ណោះដែលទទួលបានអាសនៈ។ អ្នកនយោបាយស្រ្តីជាច្រើនរូបក៏មិនសូវទទួលបានការគោរព ដូចជាសមាជិកសភា Shiomura Ayaka ធ្លាប់ត្រូវមិត្តរួមការងារប្រុសបដិសេធ បន្ទាប់ពីបង្ហាញការព្រួយបារម្ភអំពីក្មេងស្រីជំទង់ត្រូវបង្ខំឱ្យចូលរួមសម្តែងរឿងអាសអាភាស។

ប្រហែលជា Ebisawa មិនចង់ឱ្យព្រឹត្តិការណ៍ថ្មីៗប៉ះពាល់ដល់ការតស៊ូមតិរបស់ខ្លួន។ សង្ឃឹមថាក្រោយហេតុការណ៍នេះលោក Inose ចាប់អារម្មណ៍អាកប្បកិរិយាចំពោះមិត្តរួមការងារស្រី ជាពិសេសពេលថ្លែងសុន្ទរកថាសាធារណៈ។

Sacchan