ហាងបារ Mocktail ពិសេសផ្តល់កន្លែងសម្រាកបន្ធូរអារម្មណ៍ដល់ស្រ្តីមានផ្ទៃពោះ

ថ្ងៃអង្គារ 28/06/2022 | 11:07 ព្រឹក

ក្នុងបរិបទដែលមនុស្សកាន់តែច្រើនយកចិត្តទុកដាក់លើរបៀបរស់នៅដែលមានសុខភាពល្អ របារគ្មានជាតិអាល់កុលត្រូវបានបង្កើតឡើង និងពេញនិយមខ្លាំងនៅទូទាំងពិភពលោក។

ទោះជាយ៉ាងណា ចំពោះបុគ្គលពិសេសដូចជាស្រ្តីមានផ្ទៃពោះជិតសម្រាលកូនយ៉ាងម៉េចវិញ? ជាការពិតណាស់ ពួកគេក៏ត្រូវការកន្លែងសម្រាកមុននឹងទទួលព្រឹត្តិការណ៍សំខាន់ក្នុងជីវិត។ ប៉ុន្តែនេះមិនមែនជារឿងធម្មតានៅប្រទេសជប៉ុននោះទេ ស្រ្តីជាច្រើនដែលរៀបការរួចយល់ច្បាស់ពីសម្ពាធសង្គម ហើយព្យាយាមស្វែងរកការបន្ធូរអារម្មណ៍ដែលមិនទាក់ទងនឹងជីវិតអាពាហ៍ពិពាហ៍ ដូចជាទៅបារបន្ទាប់ពីរៀបការ ឬពេលកំពុងមានផ្ទៃពោះក៏ដោយ។ ថ្វីត្បិតតែជាបារគ្មានជាតិអាល់កុល ល្អចំពោះសុខភាព ប៉ុន្តែគំនិតប្រកាន់បារធ្វើឱ្យស្រ្តីមិនអាចទៅកន្លែងបែបនេះដោយសេរី។

រូបភាពតំណាង

ក្រុមហ៊ុនជប៉ុនបានសម្រេចចិត្តធ្វើអ្វីម្យ៉ាងដើម្បីដោះស្រាយបញ្ហានេះ? ពួកគេបាននិយាយជាមួយបុគ្គលិកស្រីមានផ្ទៃពោះ ឬធ្លាប់ឈប់សម្រាកលំហែមាតុភាពពីមុន ហើយនេះជាការឆ្លើយតបមកវិញ។

កាលនោះជារដូវក្តៅស្អុះស្អាប់។ ទោះបីជាមិននិយាយចេញ ប៉ុន្តែស្រ្តីមានផ្ទៃពោះក៏ចង់ទៅផឹកណាស់ដែរ។
វាពិបាកសម្រាប់ខ្ញុំ ខ្ញុំមិនអាចផឹករយៈពេលប្រហែល ២ ឆ្នាំព្រោះត្រូវបំបៅកូន។ ចំណែកឯប្តីវិញសុខស្រួលសុីផឹកក្បែរខ្លួន។
ពេលកំពុងមានផ្ទៃពោះ ខ្ញុំមានអារម្មណ៍ឯកា ដោយសារតែខ្ញុំមិនមានកន្លែងផ្ទាល់ខ្លួនដើម្បីរីករាយជាមួយអាហារឆ្ងាញ់ៗ ភេសជ្ជៈ និងជជែកជាមួយមិត្តភក្តិ។

តាមរយៈការឆ្លើយតប គំនិតមួយត្រូវបានបំផុសឡើង។ ហេតុអ្វីមិនបើកហាងបារ Mocktail ពិសេសសម្រាប់អ្នកម្តាយនាពេលអនាគត?

ក្រុមហ៊ុនដែលបង្កើតគំនិតនេះគឺ Rokko Butter ដែលជាម៉ាកយីហោនៅពីក្រោយផលិតផលឈីសដ៏ពេញនិយមបំផុតនៅក្នុងប្រទេស QBB Baby Cheese ។ គំនិតនេះក៏កើតចេញពីគម្រោងដែលកំពុងដំណើរការ “QBB Baby Cheese for mom” ជាមួយគោលបំណងជួយដល់ស្ត្រីមានផ្ទៃពោះទទួលទានអាហារដែលមានសុខភាពល្អ និងឆ្ងាញ់។

Rokko Butter សម្រេចចិត្តសហការជាមួយ Mockteria ដែលជាភោជនីយដ្ឋានដំបូងរបស់ Kobe ជំនាញខាង Mocktail ។ ភេសជ្ជៈគ្មានជាតិអាល់កុលដ៏ពេញនិយមរបស់ Mockteria ត្រូវបានផលិតចេញពីផ្លែឈើ និងបន្លែតាមរដូវ។ ភ្ញៀវក៏អាចរីករាយនឹងមុខម្ហូបឆ្ងាញ់ៗដែលរៀបចំដោយមេចុងភៅជនជាតិអុីតាលីផងដែរ។

Mockteria នឹងបើកសម្ភោធហាងបារពិសេសក្នុងរយៈពេលកំណត់ ដែលមានឈ្មោះថា ニンプバー ក្នុងនោះ ニンプ គឺ Katakana នៃ 妊婦 (ninpu) ន័យចំ “ស្ត្រីមានផ្ទៃពោះ” ។

អត្ថប្រយោជន៍របស់ Ninpu Bar

១. ផ្តល់ពេលវេលាដល់ស្រ្តីមានផ្ទៃពោះអាចសម្រាក រួចផុតពីជីវិតប្រចាំថ្ងៃទៅកាន់បារ រីករាយជាមួយភេសជ្ជៈ និងបន្ធូរអារម្មណ៍ជាមួយនឹងប្រភេទ Mocktail ពិសេសដែលត្រូវបានរចនាឡើងសម្រាប់ពួកគេ។ នេះជាវិធីល្អក្នុងការទទួលយកបទពិសោធបរិយាកាសហាងបារ ជាកន្លែងដែលពួកគេត្រូវជៀសវាងអំឡុងពេលមានផ្ទៃពោះដើម្បីធ្វើអោយខ្លួនស្រស់ស្រាយ។

២. ផ្តល់កន្លែងសម្រាប់ស្រ្តីមានផ្ទៃពោះ និងពេលវេលារីករាយជាមួយស្វាមី និងមិត្តភក្តិ។ ជាពិសេសពេលជិតសម្រាល ពួកគេមិនសូវមានពេលវេលាសម្រាក ខណៈដែលជាពេលតានតឹងបំផុត។ Ninpu Bar ជាកន្លែងដែលពួកគេអាចជួបជុំ ហើយចែករំលែកជាមួយអ្នកដែលមានស្ថានភាពដូចគ្នា។

៣. អ្នកម្តាយនាពេលអនាគតក៏អាចចាត់ទុក Ninpu Bar ជាកន្លែងចែករំលែកគំនិត និងកង្វល់ផងដែរ។ នៅទីនេះមានសៀវភៅពិសេសសម្រាប់ពួកគេសរសេរគំនិត និងអារម្មណ៍របស់ខ្លួន។ សង្ឃឹមថារឿងនេះអាចជួយពួកគេឱ្យរួចផុតពីសម្ពាធមុនពេលមានកូន។

សូមក្រឡេកមើលមុខម្ហូប និងភេសជ្ជៈពិសេសក្នុងហាង។