បញ្ចប់ការហាមប្រាមមិនអោយជជែកគ្នាអំឡុងពេលទទួលទានអាហារ​ថ្ងៃ​ត្រង់​នៅសាលាបឋម និងមធ្យមសិក្សា

នៅតំបន់មួយចំនួនក្នុងប្រទេសជប៉ុនកំពុងពិចារណាច្បាប់ហាមប្រាមនិយាយគ្នាអំឡុងពេលទទួលទានអាហារថ្ងៃត្រង់​នៅ​សាលាបឋម និងមធ្យមសិក្សា ដែលត្រូវបានដាក់ចេញកាល​ពី ២ ឆ្នាំមុន ដើម្បី​ជៀស​វាង​ការ​រីក​រាល​ដាលជំងឺ​កូវីដ ១៩ ។

ក្នុង​បរិបទ​ការ​រីក​រាល​ដាលជំងឺកូវីដ ១៩ មានការថយចុះនៅទូទាំងប្រទេស និងការព្រួយបារម្ភកុមារមិនមានឱកាស​ជជែកជាមួយមិត្តភក្តិក្នុងពេល​ទទួល​ទាន​អាហារ​អាចប៉ះពាល់ដល់ការអភិវឌ្ឍសមត្ថភាពទំនាក់ទំនងសង្គម​របស់កុមារ ការពិចារណាត្រូវបានធ្វើឡើងជុំវិញការហាមឃាត់នេះ។ យ៉ាង​ណា​មិញ មនុស្សជាច្រើននៅតែស្ទាក់​ស្ទើរចំពោះ​គំនិតទទួលទានអាហារជុំគ្នាដោយ​មិន​ពាក់​ម៉ាស់។

អ្នកយកព័ត៌មានមកពី Mainichi Shimbun មានឱកាសទៅមើលនៅសាលាបឋមសិក្សា Kego ទាំង ៦ នៅ Fukuoka ពេលទទួលទានអាហារថ្ងៃត្រង់។ សំឡេងចានបន្លឺឡើងពេញថ្នាក់រៀន ជាមួយនឹងតន្ត្រី និងសម្លេងពន្យល់​អំពី​មុខម្ហូបក្នុងថ្ងៃនោះចាក់នៅលើធុងបាសរបស់សាលា ប៉ុន្តែមិន​មាន​​សំឡេង​​ជជែក​​គ្នា​​របស់​សិស្សនោះទេ។

នាយកសាលា Kenji Tanaka បាននិយាយថា “ភាពស្ងៀមស្ងាត់ពេលទទួលទានអាហារថ្ងៃត្រង់បានបន្តជាយូរមកហើយ។ ខ្ញុំសង្ឃឹមថាពេលវេលាទទួលទានអាហារថ្ងៃត្រង់ដែលរីករាយនៅសាលានឹងត្រលប់មកវិញឆាប់ៗនេះ” ។

នៅពេលដែលសាលារៀនបើកឡើងវិញនៅខែឧសភា ឆ្នាំ ២០២០ មួយរយៈពេលបន្ទាប់ពីបិទទូទាំងប្រទេស ក្រុមប្រឹក្សា​អប់រំ​ទីក្រុង Fukuoka បានណែនាំសិស្ស “កុំអង្គុយទល់មុខគ្នា” និង “កុំជជែកគ្នា” អំឡុងពេលអាហារថ្ងៃត្រង់។ សេចក្តីណែនាំ​នេះ​ក៏​ស្រប​នឹង​ការអំពាវនាវ​របស់​នាយកដ្ឋាន​អប់រំ​ផង​ដែរ ដើម្បី​ចៀសវាងតំណក់ទឹកពេល​ទទួល​ទាន​អាហារ​ជាមួយគ្នា​។ នោះហើយជាមូលហេតុដែល “អាហារថ្ងៃត្រង់ស្ងៀមស្ងាត់” ត្រូវបានដាក់ចេញ។

អភិបាលក្រុង Fukuoka លោក Soichiro Takashima បាននិយាយថានឹងពិចារណាគោលនយោបាយ “អាហារថ្ងៃត្រង់ស្ងៀមស្ងាត់” ឡើងវិញ។ លោក Takashima និយាយក្នុងសន្និសីទសារព័ត៌មានថា “ការអប់រំចំពោះអាហារ និងអាហារូបត្ថម្ភមិនត្រឹម​តែជារបបអាហារូបត្ថម្ភប៉ុណ្ណោះទេ ថែមទាំងរួមបញ្ចូលការប្រាស្រ័យទាក់ទងគ្នាពេលទទួល​ទាន​អាហារ​ផង​ដែរ។ ការទទួលទានអាហារក្នុងសភាពស្ងៀមស្ងាត់ជា​ករណី​ពិសេស ត្រូវអនុវត្តក្នុងករណីបន្ទាន់ជំងឺ​កូវីដ ១៩” ។

ជាចុងក្រោយ ក្រុមប្រឹក្សាអប់រំទីក្រុងបានចេញសេចក្តីជូនដំណឹងដល់សាលាបឋម មធ្យមសិក្សា និងសាលាដែលមានតម្រូវការពិសេស ដោយនិយាយថាសិស្ស​អាច​ជជែក​គ្នា​អំឡុង​ពេលអាហារថ្ងៃត្រង់អោយតែមិនមានសំលេងរំខាន។ នេះបើតាមក្រុមប្រឹក្សាភិបាល តុនៅតែបែរទៅខាងមុខ ប៉ុន្តែសិស្សអាច​ងាក​ម្ខាង​ជជែក​គ្នា។

ចំពោះការជូនដំណឹងខាងលើ ឪពុកម្តាយមួយចំនួនបានបញ្ចេញមតិលើគុណសម្បត្តិ និងគុណវិបត្តិពេលបញ្ចប់ “អាហារ​ថ្ងៃត្រង់ស្ងៀមស្ងាត់” ។ ម្តាយរបស់ក្មេងប្រុសថ្នាក់ទី ៤ វ័យ ៤០ ឆ្នាំគាំទ្រចំពោះការផ្លាស់ប្តូរនេះដោយនិយាយ​ថា “ទទួល​ទានផងមើលទឹកមុខអ្នក​ដទៃ​ជា​ផ្នែក​មួយ​ដ៏​សំខាន់​ក្នុង​ការ​លូតលាស់ ប៉ុន្តែការដែលពាក់​ម៉ាស់​មិន​អាច​ធ្វើ​​បាន​ទេ” ។ ជាមួយគ្នានេះដែរ ម្តាយរបស់ក្មេងស្រីថ្នាក់ទី ៣ វ័យ ៣០ ឆ្នាំ បាននិយាយថា “កូនខ្ញុំទម្លាប់ញ៉ាំបាយស្ងៀមស្ងាត់ ហើយខ្ញុំប្រាកដថាកូនមិនមានអារម្មណ៍ឯកោទេពេលត្រឡប់មកផ្ទះជួបជុំគ្រួសារ។ ខ្ញុំបារម្ភចំពោះ​ការ​រីក​រាល​ដាល​ជំងឺ​ជាង ដូច្នេះខ្ញុំសង្ឃឹមថាកូនបន្តញ៉ាំដោយមិននិយាយគ្នា” ។

គណៈកម្មការអប់រំខេត្ត Miyazaki និយាយថា ពួកគេនឹងបញ្ឈប់ស្នើអោយទទួលទានអាហារថ្ងៃត្រង់ស្ងៀមស្ងាត់នៅសាលាចាប់ពីថ្ងៃទី ៦ ខែមិថុនា ដោយសារអត្រាឆ្លងបានធ្លាក់ចុះ ហើយស្តង់ដារទទួលទានអាហារក៏ត្រូវបានបន្ធូរបន្ថយ​ផង​ដែរ។

មន្ត្រី​ខេត្ត​ដែល​ចុះ​ត្រួត​ពិនិត្យ​គោល​នយោបាយ​បាន​ពន្យល់​ថា “យើងសង្ឃឹមថាសាលារៀននឹងធ្វើការសម្រេចចិត្តដោយ​ខ្លួន​ឯង​ផ្អែកលើស្ថានភាពជាក់ស្តែង ជាជាងធ្វើតាមគោលការណ៍បង្រួបបង្រួម” ។ ប៉ុន្តែ​ក៏​បាន​បន្ថែម​ទៀត​ថា “អនុវត្ត​​តាម​ការណែនាំ​របស់​ក្រសួង​អប់រំ​ស្ដីពី​ការមិនសាយភាយ​ដំណក់ទឹក​មិនងាយស្រួលទេ។ សាលារៀនមួយចំនួន​អាច​សម្រេច​ចិត្តបន្តគោលការណ៍អាហារថ្ងៃត្រង់ស្ងៀមស្ងាត់” ។

Sacchan

មើលបន្ថែម: