ចម្ការលក់​បន្លែស្អាតគ្មានមនុស្ស​តាម​បែប​ប្រមូល​ផល​ដោយ​ខ្លួន​ឯងនៅជប៉ុន

អ្នកទាំងអស់គ្នាប្រាកដជាធ្លាប់ឃើញតូប​លក់​បន្លែ​គ្មានមនុស្សតាមដងផ្លូវនៅក្នុងប្រទេសជប៉ុន។ នៅទីនោះអ្នកត្រូវ​ដាក់​ប្រាក់​ក្នុង​ហិប​ដោយខ្លួនឯង យកទំនិញរួចចាកចេញ។ ប្រសិនបើអ្នកធុញទ្រាន់នឹងជីវិតនៅទីក្រុងតូក្យូ គ្រាន់​តែ​ចំណាយ​ពេលជិះរថភ្លើងដែលមានចម្ងាយប្រហែល ៩០ នាទីចេញពីទីក្រុង។ ជាកន្លែងដែលហ៊ុមព័ទ្ធ​ដោយ​ធម្មជាតិ​​ដ៏​​សម្បូរ​​បែប ហើយថែមទាំងមានតូបលក់បន្លែតាមដងផ្លូវទៀតផង។

ដូចដែលបានរៀបរាប់ខាងលើ តូបលក់គ្មានមនុស្សទាំងនេះជាទូទៅដាក់តាំងទំនិញនៅលើធ្នើរ និងប្រអប់ដាក់ប្រាក់នៅជិតនោះ ជាមួយនឹងតម្លៃប្រហែល ១០០ យ៉េនក្នុងមួយមុខទំនិញ។ ប៉ុន្តែតូបនេះមានចំណុចខុសប្លែក​បន្តិច។

ជាដំបូងផ្លាកសញ្ញាដែលមានអក្សរ “លក់​បន្លែ​តាម​បែប​ប្រមូល​ផល​ដោយ​ខ្លួន​ឯង ធ្វើដោយខ្លួនឯង” ។

ក្នុងចម្ការមានបន្លែច្រើនប្រភេទដែលទាំងអស់នេះគោរពតាមប្រព័ន្ធ “ធ្វើដោយខ្លួនឯង” ។ បើតាមផ្លាសញ្ញាណែ​នាំ ជំហានដំបូងក្នុងការទិញនៅទីនេះ អ្នកត្រូវប្រមូលផលបន្លែដោយខ្លួនឯង។ ជំហានបន្ទាប់ត្រូវគណនាតម្លៃដែល​អ្នក​បាន​ប្រមូល​ផល តាមរយៈការប្រៀបធៀបនឹងតារាងតម្លៃដែលបានកំណត់សម្រាប់បន្លែនីមួយៗ ហើយជាចុង​ក្រោយ​ដូច​កន្លែង​ផ្សេងទៀត អ្នកត្រូវដាក់ប្រាក់ក្នុងប្រអប់ប្រាក់។

“តាំងពីការប្រមូលផលរហូតដល់ទូទាត់ប្រាក់ សូមធ្វើដោយខ្លួនឯង” ។

កុំគិតថានេះជាទម្រង់ខ្ជះខ្ជាយពេលវេលា ព្រោះក្រៅពីបន្លែដែលមានសុខភាពល្អ ម្ចាស់ចម្ការក៏ផ្តល់ឱ្យអ្នកនូវបទពិសោធន៍ធ្វើកសិកម្មដោយឥតគិតថ្លៃ​ផង​ដែរ។ ប៉ុន្តែប្រសិនបើអ្នកមិនដឹងត្រូវធ្វើយ៉ាងណា មិនអីទេ ព្រោះអ្នកអាច​សុំ​ជំនួយ​ពីកសិករនៅទីនោះបាន។

កសិករ​ម្នាក់​នោះ​គឺ​​អ្នក​ស្រី Kokubo ជាអ្នកទទួលខុសត្រូវថែទាំចម្ការ។ អ្នកស្រីនឹងផ្តល់ឱ្យអ្នកនូវមេរៀនរើសបន្លែដោយ​ឥត​គិត​ថ្លៃ និងត្រៀមខ្លួនឆ្លើយសំណួរទាក់ទងនឹងរបៀបដាំបន្លែ ឬស្ថានភាពទីផ្សារបន្លែជាដើម។

តាមរយៈសំណួរបែបនេះ អ្នកយកព័ត៌មានរបស់ Soranews ស្វែងយល់ពីមូលហេតុ​អ្នកស្រីចាប់ផ្តើមលក់បន្លែតាមទម្រង់​នេះ។ ដើម​ឡើយ​ពួក​គេ​គ្រោងប្រើដីដើម្បី​លក់​របាំង​ការពារស្មៅ ជាការច្នៃប្រឌិតដែលអ្នកស្រី Kokubo ​រក​ឃើញ។ ប៉ុន្តែលទ្ធផលមនុស្ស​ជា​ច្រើនសួរថា តើ​អាច​ទិញ​បន្លែ​បាន​ឬ​អត់? អ្នកស្រី Kokubo គិតថាមិន​មែន​តែង​តែ​មានមនុស្សនៅចម្ការរង់ចាំភ្ញៀវមកដល់ទេ ដូច្នេះគាត់ក៏សម្រេចចិត្តទុកអោយភ្ញៀវធ្វើដោយខ្លួន​ឯង។ ជា​ការ​ពិត​ណាស់ អ្នកស្រីត្រៀមខ្លួនជួយជានិច្ចបើមានវត្តមាននៅចម្ការពេលភ្ញៀវមានការលំបាក។

បន្លែទាំងអស់ដែលអ្នកទិញនៅទីនេះមានតម្លៃថោក ហើយជាការពិតណាស់ ស្រស់ជាងបន្លែដែលអ្នកទិញនៅទីក្រុង​តូក្យូ។ មិនត្រឹមតែស្រស់ និងថោកប៉ុណ្ណោះទេ ថែមទាំងជាបទពិសោធន៍ដ៏គួរឱ្យចាប់អារម្មណ៍សម្រាប់អ្នករស់​នៅ​ទីក្រុង។

Sacchan