ចំណាត់ថ្នាក់តំបន់ទេសចរណ៍ជប៉ុនដែលមានទេសភាពទាក់ទាញនៅដូវវស្សា

ទីក្រុងសន្តិភាព ទេសភាពស្អាត ឬសួនច្បារស្ងប់ស្ងាត់ ។ល។ ជាអ្វីដែលអ្នកនឹងមើលឃើញក្នុងអត្តបទនេះ។

នៅប្រទេសជប៉ុនខែមិថុនាឈានចូលរដូវក្តៅ រដូវហែលទឹក សាច់អាំង បោះជំរុំជាដើម ប៉ុន្តែនៅមានរឿងមួយដែលធ្វើ​ឱ្យ​រដូវ​ក្តៅ​មិន​សូវ​សប្បាយ​នោះ​គឺ​ភ្លៀង។ រដូវ​ក្តៅ​នៅជប៉ុនក៏ជាពេលដែលរដូវវស្សាចាប់ផ្តើមផងដែរ។ កុំគិតថាភ្លៀងធ្លាក់​​​រ៉ូមែនទិក ព្រោះភ្លៀងអាចនឹងអូសបន្លាយមួយសប្តាហ៍បំផ្លាញគម្រោងធ្វើដំណើរកំសាន្តរបស់អ្នក។ 

ទោះជាយ៉ាងណា មាន​កន្លែង​ទេសចរណ៍​មួយ​ចំនួនកាន់តែទាក់ទាញពេលភ្លៀងធ្លាក់។

ក្រុមហ៊ុនផ្តល់សេវាទេសចរណ៍ជប៉ុន Jalan ទើបតែប្រកាសចំណាត់ថ្នាក់ “កន្លែងទាក់ទាញភ្ញៀវទេសចរណ៍មកទស្សនា​​ពេល​​ភ្លៀង​​ធ្លាក់” ។ ចំណាត់ថ្នាក់កន្លែងទេសចរណ៍ដែលនាំមកនូវបទពិសោធន៍អស្ចារ្យមិនថាអាកាសធាតុយ៉ាង​ណា រួមមានទេសភាពធម្មជាតិ និងតំបន់ទេសចរណ៍ទីក្រុង។

ចំណាត់ថ្នាក់លេខ ៩ ៖ វាលស្រែកាំជណ្តើរ Shiroyone Senmaida (ខេត្ត Ishikawa)

គ្មានអ្វីស្អាតជាងវាលស្រែកាំជណ្តើរក្រោមតំណក់ទឹកភ្លៀងឡើយ។ ជាពិសេសប្រសិនបើអ្នកមើលឃើញទិដ្ឋភាពភ្លៀងរាំងពេលថ្ងៃលិច ពន្លឺព្រះអាទិត្យក្រហមឆ្លុះបញ្ចាំងនៅលើវាលស្រែកាំជណ្តើរ ជាទិដ្ឋភាពដែលអ្នកគួរតែមើលឃើញម្តងក្នុង​ជីវិត។

ចំណាត់ថ្នាក់លេខ ៩ ៖ ព្រៃ Bijin Bayashi (ខេត្ត Niigata)

ព្រៃ​ឈើ​លើ​ភ្នំ​នេះបង្កើតឡើងដោយដើមឈើដែលមានអាយុជាង ១០០ ឆ្នាំ ហើយត្រូវបានចាត់ទុកជាព្រៃដែលស្អាតជាងគេនៅប្រទេសជប៉ុន។ ព្រៃ​មើល​ទៅ​កាន់​តែ​ស្រស់​ស្អាតពេលភ្លៀងធ្លាក់ម្តងៗ ព្រោះតំណក់ទឹកលើមែកឈើឆ្លុះបញ្ចាំង​​ពន្លឺ​ចែង​ចាំង។ លើសពីនេះ ​ស្រះ​ទឹក​ក្នុង​ព្រៃឆ្លុះបញ្ចាំងទេសភាពស្រស់ស្អាត ដូចជាបង្កើតពិភពមួយទៀត​​ស្រប​គ្នា។ សំឡេងភ្លៀងធ្លាក់លើស្លឹកឈើ និងស្រះ ជាមួយនឹងសំឡេងសត្វបក្សីបន្លឺឡើងក្រោមប្រព័ន្ធអេកូឡូស៊ី​នៅ​ទីនេះ។

ចំណាត់ថ្នាក់លេខ ៨ ៖ Togenkyo (ខេត្ត Miyazaki)

ជាមួយនឹងគុម្ពផ្កា Hydrangea ចំនួន ២ លានមានពណ៌ចម្រុះលាតសន្ធឹងលើផ្ទៃដីធំជាង Tokyo Dome ។ Togenkyo នាំ​មក​នូវ​ទេស​ភាពសួនច្បារស្រស់ស្អាតក្រោមផ្ទៃមេឃពណ៌ខៀវ។ សូម្បីតែនៅពេលភ្លៀងធ្លាក់ក៏មើលទៅស្អាត​ណាស់​ដែរ ជាកន្លែងគួរតែទៅលេងមិនថារដូវវស្សា។

ចំណាត់ថ្នាក់លេខ ៧ ៖ Karuizawa Hoshino Area Harunire Terrace (ខេត្ត Nagano)

ហាងជាច្រើនតាមបណ្តោយផ្លូវ Haruine Terrace ទីក្រុង Karuizawa ពោពេញទៅដោយឆ័ត្រចម្រុះពណ៌ជាង ១០០ ដើម មិន​ថា​ពេល​ភ្លៀង​ឬ​យប់​ពន្លឺភ្លឺចែងចាំង។ 

ចំណាត់ថ្នាក់លេខ ៦ ៖ ជ្រលងភ្នំ Oirase (ខេត្ត Aomori)

រដូវក្តៅទៅលេងខេត្ត Aomori ល្អបំផុត ដោយសារតែ Aomori ស្ថិតនៅភាគខាងជើងប្រទេសជប៉ុន ល្បីនឹងអាកាស​ធាតុ​ត្រជាក់។ នៅ Aomori សីតុណ្ហភាពរដូវក្តៅល្មមអាចធ្វើដំណើរកំសាន្ត។

ជ្រលងភ្នំ Oirase មានចរន្តទឹកថ្លានៃទន្លេ Oirase ហូរកាត់ព្រៃ និងថ្ម នាំមកនូវបរិយាកាសត្រជាក់ និងធម្មជាតិស្រស់ស្អាត ដែលត្រូវបានជ្រើសរើសជាកន្លែងគួរតែទៅទស្សនាមុនពេលស្លាប់។ នៅពេលភ្លៀងធ្លាក់ លើក​លែង​តែ​រអិល​ ថ្មជាប់ស្លែមើលទៅកាន់តែទាក់ទាញ។ នេះជាកន្លែងដែលធ្វើអោយអ្នកបំភ្លេចគ្រប់យ៉ាងនៅលើពិភព​លោក គ្រាន់​តែ​ចង់​ស្រូប​ខ្យល់​អាកាស​បរិសុទ្ធ និងរីករាយជាមួយជីវិតបច្ចុប្បន្ន។

ចំណាត់ថ្នាក់លេខ ៥ ៖ Sanzen-in (Kyoto)

ក្នុងតំបន់ទីក្រុងប្រាសាទ Sanzen-in ជាមួយនឹងសួនស្ងប់ស្ងាត់ទាំងពីររួមមាន Yuseien និង Shuhekien ។ Yuseien ជាកន្លែងទាក់ទាញបំផុតពេលភ្លៀងធ្លាក់ ដោយសារតែសួនត្រូវបានគ្របដណ្ដប់ដោយស្លែក្រាស់ ក្រោមដើមសុីដា និងដើមតាត្រៅ។ សួន Shuhekien ទស្សនាតាមសាលធំប្រាសាទ ដូច្នេះទោះបីជាមានភ្លៀងធ្លាក់ខ្លាំង ក៏អ្នកនៅតែអាចរីករាយនឹងសួនផងដែរ។

ចំណាត់ថ្នាក់លេខ ៤ ៖ ផ្លូវរថភ្លើងផ្កា Hydrangea – Hakone Tozan (ខេត្ត Kanagawa)

Hakone ជា​រមណីយដ្ឋាន​ល្បីជ្រោះទឹកក្តៅ អាចមើលឃើញទេសភាពភ្នំហ្វូជី។ ចាប់ពីខែមិថុនាដល់ដើមខែកក្កដា តំបន់​នេះ​ស្ថិតក្នុងរដូវវស្សា។ នៅរដូវនេះមានផ្កា Hydrangea ដុះតាមបណ្តោយភ្នំ ផ្លូវដែក Hakone Tozan ភ្ជាប់ខ្សែរថភ្លើង​សំខាន់​ជាមួយកន្លែងកំសាន្ត Hakone ។ 

ចំណាត់ថ្នាក់លេខ ៣ ៖ ផ្លូវ Higashi Chaya ខេត្ត Ishikawa)

នៅលើផ្លូវនេះមានហាងលក់វត្ថុអនុស្សាវរីយ៍សិប្បកម្មប្រពៃណី ក្រៅពីនេះអ្នកក៏អាចទិញការ៉េមធ្វើពីមាសផងដែរ។ ផ្ទះនៅទីនេះធ្វើពីឈើ ផ្លូវក្រាលថ្ម ដូច្នេះពេលភ្លៀងនឹងឆ្លុះបញ្ចាំងទិដ្ឋភាពផ្លូវ ចំណែកនៅពេលយប់គ្រប់យ៉ាងហាក់ដូចជាភ្លឺស្រស់ស្អាត។

ចំណាត់ថ្នាក់លេខ ២ ៖ ជ្រលងភ្នំ Takachiho (ខេត្ត Miyazaki)

នេះជាទេសភាពធម្មជាតិរបស់ Miyazaki ដែលជាប់ក្នុងចំណាត់ថ្នាក់។ ជ្រលងភ្នំ Takachiho មានទន្លេប្រវែង ៧ គីឡូម៉ែត្រ ជាមួយនឹងផ្ទាំងថ្មរាងចម្លែកបញ្ឈរនៅសងខាង។ ចរន្តទឹកពណ៌ត្បូងមរកតត្រូវបានគេជ្រើសរើសជាកន្លែង​ល្អ​បំផុតសម្រាប់គយគន់ស្លឹក​ឈើ​ក្រហម​នៅ​សរទរដូវ។ អ្នកអាចជួលទូកបណ្តែតលើ​ផ្ទៃ​ទឹកមើលទេសភាពធម្មជាតិនៅទីនេះ។ 

ចំណាត់ថ្នាក់លេខ ១ ៖ កោះ Yaku – Yakushima (Kagoshima)

ត្រូវគេចាត់ទុកជាកន្លែងបំផុសគំនិតក្នុងរឿងគំនូរជីវចលល្បីដូចជា Princess Mononoke របស់ Ghibli តំបន់បេតិក​ភណ្ឌ​ធម្មជាតិ​ពិភពលោកនេះមានលក្ខណៈពិសេស ដែលរួមមានជ្រលងភ្នំ Shiratani Unsui ។ យ៉ាងណាមិញ សូមប្រយ័ត្ន​បរិមាណ​ទឹកភ្លៀងខ្លាំងអាចបណ្តាលអោយទឹកឡើង និងបង្កគ្រោះថ្នាក់ដល់ភ្ញៀវទេសចរណ៍។

Sacchan

មើលបន្ថែម: