សាសនារបស់ជប៉ុនដែលសូម្បីតែប្រជាជនជប៉ុនខ្លួនឯងក៏មិនដឹង

តើសាសនាជាអ្វី? យើងទាំងអស់គ្នាស្គាល់ “សាសនា” ប៉ុន្តែប្រសិនបើត្រូវកំណត់និយមន័យ តើយើងអាចឆ្លើយសំណួរនេះបានទេ?

ចំពោះសំណួរបន្ទាប់ តើអ្នកកាន់សាសនាអ្វី? អ្នកកាន់ព្រះពុទ្ធសាសនា គ្រិស្តសាសនា ឥស្លាម។ល។ ប្រសិនបើសួរប្រជា​ជន​ជប៉ុន​សំណួរ​​នេះ តើពួកគេឆ្លើយ​ដូចម្តេច?

ភាគច្រើនជនជាតិជប៉ុនឆ្លើយថា “ខ្ញុំមិនកាន់សាសនា” ទេ។

តើជនជាតិជប៉ុនជឿលើទេវតាមែនទេ? នៅពេលមានអ្វីដែលត្រូវអធិស្ឋាន ពួកគេ​ទៅ​ព្រះវិហារ ចំណែកពិធីបុណ្យ​សពធ្វើនៅវត្ត។

ថ្វីត្បិតតែប្រជាជនគិតថាខ្លួនមិនកាន់សាសនា ប៉ុន្តែតាមពិត ប្រជាជនជប៉ុនក៏មានសាសនារួមមួយដែរ។ បន្ទាប់​មក​ខ្ញុំ​នឹងពន្យល់បន្តិចអំពី​ស៊ីនតូ ជាជាងចាត់ទុកសុីនតូជាសាសនា ជនជាតិជប៉ុនភាគច្រើនគិតថា​ស៊ីនតូជា​សីល​ធម៌ ក្បួនច្បាប់ ដែលត្រូវបានបណ្តុះក្នុងចិត្តប្រជាជនជប៉ុនគ្រប់រូប។ ពួកគេកើត ធំដឹងក្តី និងទទួលបាន​ការចិញ្ចឹម​​​បី​បាច់ក្រោម​ជំនឿ​​ស៊ីនតូ។ សាសនា​ស៊ីនតូក្នុងផ្នត់គំនិតមនុស្សគ្រប់រូប សូម្បីតែពួកគេក៏មិនដឹងខ្លួនដែរ។

ប្រសិនបើវត្តជា​តំណាង​ពុទ្ធសាសនា ព្រះវិហារ​ជា​តំណាង​គ្រិស្តសាសនា ចំណែកប្រាសាទជា​តំណាង​របស់​ស៊ីនតូ។ ប៉ុន្តែគ្មាន​នរណា​នៅ​ក្នុង​ប្រទេស​ជប៉ុន​ចាត់​ទុក​សុីនតូ​ជាសាសនានោះទេ។

ព្រះ​គម្ពីរ​កត់​ត្រា​បញ្ញត្តិ​នៃ​គ្រិស្ត​សាសនា ពុទ្ធ​សាសនាមាន​គម្ពីរ​ពុទ្ធសាសនា ចំណែកឥស្លាម​មាន​គម្ពីរ​កូរ៉ាន។ ប្រភេទគម្ពីរ​ទាំង​នេះ​កត់ត្រាផ្នត់គំនិតជីវិត បង្រៀនពីរបៀបរស់នៅ ។ល។ ប៉ុន្តែចំណុចនេះមិនមានក្នុងសុីនតូឡើយ។

ម្យ៉ាងវិញទៀត ពុទ្ធសាសនាថ្វាយបង្គំព្រះពុទ្ធ គ្រិស្តសាសនាថ្វាយបង្គំព្រះ ទោះបីជាមិនមានរូបភាពជាក់លាក់តែអ្នក​កាន់​សាសនា​ឥស្លាម​គោរពព្រះ​​អល់​ឡោះ ។

ចុះចំណែកសុីនតូ? សុីនតូមិនគោរពបូជាបុគ្គលណាមួយឡើយ។ ទោះបីជានៅទីសក្ការៈ Shintai មិនមែនជាមនុស្សជាក់លាក់ ប៉ុន្តែជាកញ្ចក់ ឬដាវ។ ក្រៅពីនេះ Shintai ត្រូវ​បាន​រក្សា​ទុក​នៅ​កន្លែងដែលមិនមែនគ្រប់គ្នាអាចមើលឃើញបានឡើយ។

លក្ខណៈពិសេសមួយទៀតរបស់សុីនតូគឺថាគ្មានស្ថាបនិកទេ។ គ្មាននរណាម្នាក់ដឹងថានរណាជាអ្នកបង្កើតសុីនតូ គ្មាន​​បទគម្ពីរកត់ត្រាបង្រៀនទេ ហើយ​ក៏​មិន​មាន​អ្វី​បង្ខិត​បង្ខំដែរ។

ដោយសារចំណុចនេះ ប្រជាជនជប៉ុនមិនចាត់ទុកសុីនតូជា​សាសនា​ឡើយ។

សុីនតូជឿថាមានវត្តមានទេវតា ទោះ​ជា​យ៉ាង​ណា ទេវតា​មិន​មែន​មាន​តែ​មួយ​អង្គ​នោះ​ទេ ប៉ុន្តែ​មាន​នៅ​គ្រប់​ទីកន្លែង។ ភ្នំមានទេវតាភ្នំ សមុទ្រមានទេវតាសមុទ្រ សូម្បីតែអាហារបរិភោគប្រចាំថ្ងៃក៏មានទេវតាផងដែរ។ ប្រជា​ជន​ជប៉ុន​មានប្រយោគមួយឃ្លាសរសេរថា 八百万の神 (Yaoyorozu no kami) ន័យចំមានន័យថា ៨ លានទេវតា ប៉ុន្តែ​ចំនួន ៨ លាននេះគ្រាន់តែជានិមិត្តសញ្ញាប៉ុណ្ណោះ អត្ថន័យពិតគឺ “រាប់មិនអស់” ។

ទេវតាក្នុងសុីនតូមិនប្រាកដថាដូចសាសនាផ្សេងទៀតទេ គ្រាន់តែដឹងថាមានវត្តមានទេវតា។ សរុបទៅ យើង​ត្រូវ​វិនិច្ឆ័យ​សកម្មភាព​របស់​ខ្លួន ដោយមិនផ្អែកលើទេវតា។ ប៉ុន្តែប្រជាជនជប៉ុននៅតែគោរពទេវតា មិនថានៅទីណាក៏ដោយ។

ប្រជាជនជប៉ុនអោយតម្លៃធម្មជាតិ សត្វ អាហារជាដើម តែងតែបង្ហាញការគោរពចំពោះមនុស្សដែលពួកគេជជែក​ជា​មួយ។ ហើយក៏ដោយសារការគោរពទាំងនេះ ក្នុងភាសាជប៉ុនមានលក្ខណៈស្មុគស្មាញជាច្រើន ធ្វើឱ្យជនបរទេស​ពិបាកប្រើភាសាប្រទេសនេះ។ 

ដោយសារទេវតានៅគ្រប់ទីកន្លែង ដូច្នេះជនជាតិជប៉ុនក៏ងាយស្រួលទទួលយក “ទេវតា” ពីសាសនាផ្សេងទៀតដូច​ជា​ព្រះយេហូវ៉ា ឬព្រះពុទ្ធ។ មិនមានភាពផ្ទុយគ្នាដូចជា គ្រិស្តសាសនា ឥស្លាម ឬហិណ្ឌូទេ។

មិនថានៅទីណាមានមនុស្សល្អ មនុស្សអាក្រក់ ប៉ុន្តែមិនមែនជារឿងចៃដន្យទេដែលប្រជាជនជប៉ុនត្រូវបានទទួលស្គាល់ជាប្រជាជាតិមានអាកប្បកិរិយាល្អ សណ្តាប់ធ្នាប់ល្អ។ មិន​មែន​ដោយ​សារ​ពួក​គេ​មាន DNA ពិសេស​នោះ​ទេ ប៉ុន្តែ​​ដោយ​​សារ​​ពួក​គេ​តែង​តែ​ប្រកាន់ខ្ជាប់គោលការណ៍សុីនតូ សូម្បីតែពួកគេក៏មិនដឹងខ្លួនដែរ។ គោលការណ៍ទាំង​​នោះ​គឺមិនរំខាន ចេះជួយ និងទទួលយកអ្នកដទៃ។

ក្នុងពិភពលោកសព្វថ្ងៃ បន្ទាប់ពីចលាចលដោយសារជំងឺរាតត្បាត សង្រ្គាមនៅតែបន្តកើតឡើង។ មនុស្ស​អាត្មានិយម​មួយ​ចំនួន​គិត​​តែ​​ប្រយោជន៍​​ខ្លួន ហើយ​​មិន​​អើ​ពើ​​នឹង​​ទុក្ខលំបាករបស់អ្នកដទៃ។

ខ្ញុំសង្ឃឹមថា មនុស្សកាន់តែច្រើនយល់ និងអនុវត្តផ្នត់គំនិតក្នុងសុីនតូ ដើម្បីធ្វើឱ្យពិភពលោកដ៏វឹកវរនេះកាន់តែមានសន្តិភាព។

យុវជនជប៉ុនសព្វថ្ងៃនេះហាក់ដូចជាកំពុងបំភ្លេចប្រពៃណី ហើយប្រហែលជាចិត្តសប្បុរសរបស់ជនជាតិជប៉ុនដែលពិភពលោកកោតសរសើរកំពុងថយចុះ ប៉ុន្តែសុីនតូនៅតែមាន ហើយនៅតែឆ្ពោះទៅកាន់ពិភពលោកដែលមានសន្តិភាព។

មនុស្សគ្រប់រូបមានសិទ្ធិដើរតាមជំនឿរបស់ពួកគេ។ អ្នកអាចស្រលាញ់ ជឿលើសុីនតូ ប៉ុន្តែនៅតែប្រកាន់ខ្ជាប់ជំនឿ និងសាសនារបស់ខ្លួន។

ដើម្បីធ្វើឱ្យពិភពលោកដ៏គួរឱ្យភ័យខ្លាចនេះក្លាយជាកន្លែងល្អជាងនេះ ហេតុអ្វីបានជាបុគ្គលម្នាក់ៗមិនខិតជិតគ្នា?

Kengo Abe

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: