ការស្ទង់មតិស្ថានភាពសិស្សដែលមានអារម្មណ៍ត្រូវបៀតបៀនផ្លូវភេទ​ក្នុង​ចំណោម ៩៧ ករណីនៅជប៉ុន

ការស្ទង់មតិដោយក្រុមប្រឹក្សាអប់រំខេត្ត Shizuoka បានប្រកាសនាពេលថ្មីៗនេះបង្ហាញថាករណីសិស្សចំនួន ៩៧ នាក់ មាន​អារម្មណ៍ថាពួកគេត្រូវ​បៀត​បៀន​ផ្លូវភេទតាមបណ្តាសាលារៀននៅខេត្ត Shizuoka ក្នុងឆ្នាំ ២០២១ ។

ការស្ទង់មតិនេះត្រូវបានធ្វើឡើងចាប់ពីខែវិច្ឆិកា ឆ្នាំ ២០២១ ដល់ខែមីនា ឆ្នាំ ២០២២ បានសួរសិស្សចំនួន ១៥៦,៣០៦ នាក់ ចាប់​ពីថ្នាក់ទី ៥ បឋមសិក្សា ដល់វិទ្យាល័យឆ្នាំទី ៣ រួមទាំងសិស្សដែលចូលរៀនសាលាអប់រំពិសេស។

សាលារៀនតំបន់ទីក្រុងថ្នាក់ជាតិមិនរាប់បញ្ចូលក្នុងការស្ទង់មតិឡើយ។

សិស្សត្រូវបានផ្គត់ផ្គង់ព័ត៌មានចំពោះអាកប្បកិរិយា​ប្រភេទ​ណា​ចាត់ទុកថាបៀតបៀន​ផ្លូវ​ភេទ មុន​ពេល​ឆ្លើយ​សំណួរ​​នៅ​​ផ្ទះ និង​កន្លែង​ផ្សេង​ទៀត។ មតិកែលម្អដោយអ្នកគ្រប់គ្រងថ្នាក់ខ្ពស់ដូចជានាយកសាលាប្រមូលបាន ដោយ​មិន​រាប់បញ្ចូលគ្រូបន្ទុកថ្នាក់របស់សិស្ស។

លទ្ធផលដែលទទួលបានបង្ហាញថាសិស្សប្រហែល ៩៧ ករណីយល់ថាខ្លួនត្រូវគ្រូបៀតបៀនផ្លូវភេទ ក្នុងនោះ ៤៦ ករណីកើតឡើងនៅអនុវិទ្យាល័យ ចំនួន ២៧ ករណីនៅសាលាបឋមសិក្សា ចំនួន ២១ នៅវិទ្យាល័យ និងចំនួន ៣ ករណីនៅស្ថាប័នអប់រំពិសេស។

បែងចែកតាមប្រភេទទង្វើបៀតបៀននៃ ៩៧ ករណីខាងលើ មាន ៥៥ ករណីប៉ះពាល់រាងកាយដោយមិនចាំបាច់ និង ១២ ករណីមានភាពស្និទ្ធស្នាលដោយមិនចាំបាច់ ប្រហែល ៧០% ករណីត្រូវបៀតបៀនផ្លូវភេទដោយការសម្លឹងមើល​សិស្សដោយគ្មានហេតុផលពិសេស។

ជាក់ស្តែង សិស្សជាច្រើនបានឆ្លើយតបថា “គ្រូបង្រៀនម្នាក់អង្អែលក្បាលពេលសរសើរខ្ញុំ” “គ្រូបង្រៀនម្នាក់បាន​ប៉ះ​ដៃ​ពេល​ណែនាំនៅក្លឹប” “គ្រូបង្រៀនម្នាក់ដាក់​ដៃ​លើ​ស្មា​ខ្ញុំ​ប្រហែល ៤០ វិនាទីពេលប្អូនៗឈរតម្រង់ជួរក្នុងបន្ទប់ហាត់​ប្រាណ” និង “ខ្ញុំមានអារម្មណ៍ត្រូវគ្រូម្នាក់សម្លឹង​មើល​ដើម​ទ្រូងពេលប្អូនជំរាបសួរគាត់” ។

ក្រៅពីនេះ ចំពោះអាកប្បកិរិយាខុសឆ្គងរបស់គ្រូទាក់ទងនឹងលក្ខណៈរាងកាយ ផ្លូវភេទ ឬផិតក្បត់ ប្អូនខ្លះឆ្លើយថា “គ្រូម្នាក់បាននិយាយខ្លាំងៗទម្ងន់របស់ខ្ញុំ ដើម្បីអោយសិស្សជាច្រើនទៀតស្តាប់ឮនៅពេលយើងពិនិត្យសុខភាព” “ខ្ញុំ​ឃើញ​គ្រូ​ម្នាក់​ប្រាប់មិត្តម្នាក់ទៀតថា មិត្តម្នាក់នោះធាត់ រឿងនឹងធ្វើអោយមិត្តម្នាក់នោះពិបាកចិត្ត” “គ្រូម្នាក់បន្ថែមពាក្យ chan ដើម្បី​បង្ហាញ​ការ​ស្រលាញ់​ចំពោះ​ឈ្មោះ​សិស្ស​មួយ​ចំនួន” ឬ “ខ្ញុំមានអារម្មណ៍មិនល្អនៅពេលដែលគ្រូម្នាក់ប្រាប់ខ្ញុំថាកុំយំព្រោះប្អូនជាបុរស” ។

មន្ត្រី​ម្នាក់មក​ពី​ក្រុមប្រឹក្សា​អប់រំ​ខេត្ត Shizuoka បាននិយាយថា “ក្នុងចំណោមការឆ្លើយតបរបស់ប្អូនៗ មិនមានករណី​ណាដែលគ្រូបង្រៀនត្រូវពិន័យចំពោះការបៀតបៀនផ្លូវភេទនោះទេ។ ទោះជាយ៉ាងណា តម្លៃវិជ្ជាជីវៈ​ដែលគ្រូបង្រៀន​ម្នាក់គួរតែមានបាត់បង់ទៅហើយ” ។

ក្រុមប្រឹក្សាភិបាលមានបំណងបង្កើនសកម្មភាពឆ្ពោះទៅសាលារៀនដែលមានសិស្សឆ្លើយតបត្រូវបៀតបៀន ដើម្បីផ្តល់ការណែនាំជាបន្តបន្ទាប់ ហើយ​ពិនិត្យ​មើល​ជា​ប្រចាំ​ដើម្បី​ការពារ​កុំ​ឱ្យ​មាន​អំពើ​អាក្រក់​ទាំងនេះ​កើតឡើង​ទៀត​។

ពួកគេក៏មានគម្រោងបង្កើតបញ្ជីត្រួតពិនិត្យដោយផ្អែកលើចម្លើយរបស់សិស្ស ដើម្បីសុំឱ្យគ្រូពិនិត្យមើលអាកប្បកិរិយា​ប្រចាំថ្ងៃ​របស់​ពួក​គេ។

Hana