តើពិតទេរោងចក្រផលិតស្រាបៀរសិប្បកម្មស្ថិតក្នុងបរិវេណវត្ត​ប្រាសាទ​ជប៉ុន?

នេះជាស្រាបៀរដ៏ពិសិដ្ឋបំផុតនៅក្នុងប្រទេសជប៉ុន។

រោងចក្រស្រាបៀរនៅទីក្រុង Oma ខេត្ត Aomori ភាគខាងជើងប្រទេសជប៉ុន។ ចំណុចដែលធ្វើ​ឱ្យ​រោងចក្រនេះលេចធ្លោដោយសារនៅក្នុងបរិវេណវត្តប្រាសាទ ហើយអ្នកដែលសាងសង់រោងចក្រ​នេះ​ក៏​ជា​ព្រះសង្ឃមួយអង្គផង​ដែរ។

ប្រាសាទមានឈ្មោះថា Baikouzan Soutokuji ជាការរួមបញ្ចូលផ្នត់គំនិតពីរដែលមើលទៅផ្ទុយស្រឡះគ្នាគឺ “ស្រាបៀរ” និង “ព្រះសង្ឃ” ។

ប្រាសាទនេះមានប្រវត្តិយូរលង់ណាស់មកហើយ តាំងពីឆ្នាំ ១៦២៥ មកម្ល៉េះ ទោះ​​ជា​យ៉ាង​ណា មើលពីខាងក្រៅមិនខុសពីប្រាសាទធម្មតាក្នុង​ប្រទេស​ជប៉ុន​នោះ​ទេ មានទីធ្លាធំទូលាយ បរិវេណផ្នូរ អាគារធំត្រូវបានតុបតែងយ៉ាងល្អប្រណិត។

យ៉ាង​ណា​មិញ ប្រាសាទនេះមានចំណុចមួយដែលវត្តដទៃមិនមាន ត្រង់ច្រកចូលមានផ្លាកសញ្ញាលក់ស្រាបៀរសិប្បកម្មដែលមានអក្សរ “Swastika – 卍” ខាងលើ ដែលគេនិយមប្រើជានិមិត្តសញ្ញាដ៏ពិសិដ្ឋដើម្បីសម្គាល់ទីកន្លែងព្រះ​ពុទ្ធសាសនានៅក្នុងប្រទេសជប៉ុនច្រើនសតវត្សមកហើយ (ប៉ុន្តែកុំច្រឡំនឹងនិមិត្តសញ្ញាណាស៊ីអាល្លឺម៉ង់)

បើចង់ដឹងថារោងចក្រផលិត និងលក់ស្រាបៀរសិប្បកម្មប្រភេទណា អ្នកគ្រាន់តែចូលទៅកាន់អគារខាងឆ្វេងទីសក្ការៈ​បូជា​ធំ។

ភ្ញៀវទេសចរណ៍អាចទិញស្រា និងស្រាបៀរនៅទីនេះដោយសេរី ថ្វីត្បិតតែពេលចូលទៅដល់មានអារម្មណ៍ស្រឡាំង​កាំង​ដូច​ការិយាល័យជាជាងហាង។

ទោះបីជាតំបន់នេះគ្មានអ្នកលក់ក្នុងពេលអ្នកធ្វើដំណើរកំសាន្ត អ្នកនៅតែអាចទិញស្រាបៀរក្នុងម៉ាសុីនលក់ដោយស្វ័យប្រវត្តិ។ ផលិតផលត្រូវបានផ្លាស់ប្តូរទៅតាមពេលវេលា ស្រានៅជួរខាងលើ ចំណែកស្រាបៀរនៅជួរពីរខាងក្រោម ទឹកផ្លែប៉ោម pilsner, lager ស្រាបៀរខ្មៅ និងប្រភេទស្រាបៀរល្វីង។

ព្រះសង្ឃ Sasaki ជាស្ថាបនិក​រោងចក្រ​ស្រា​បៀរ បាន​ចែករំលែកមូលហេតុ​ដែល​គាត់​សម្រេចចិត្ត​ធ្វើ​ភេសជ្ជៈ​មាន​ជាតិ​អាល់កុល​នៅ​ប្រាសាទ​នេះ។

“លើកដំបូងខ្ញុំផលិតស្រាបៀរកាលពី ២០ ឆ្នាំមុន មូលហេតុដោយសារ​ប្រភព​ទឹក​នៅ​តំបន់​មកពីភ្នំ Osorezan (ភ្នំពិសិដ្ឋ) ជាសារធាតុផ្សំសំខាន់​ដែល​កំណត់​រសជាតិ​ស្រាបៀរផងដែរ។ ហើយ​ខ្ញុំ​បាន​បង្កើត​គំនិត​បង្កើត​រោងចក្រ​ផលិត​ស្រាបៀរ” ។

នៅខាងក្រោយរោងចក្រមានរោងចក្រផលិតស្រាបៀរដោយស្វ័យប្រវត្តិ នេះជាកន្លែងដែលអ្នកអាចទិញស្រាបៀរក្នុងវត្តបានគ្រប់ពេលទាំងថ្ងៃ និងយប់ ប៉ុន្តែអ្នកត្រូវតែមានប័ណ្ណបើកបរ ដើម្បីបញ្ជាក់ថាអ្នកគ្រប់អាយុទទួលទានគ្រឿងស្រវឹង។

មនុស្សមិនច្រើនទេដែលស្គាល់រោងចក្រស្រាបៀរពិសេសនេះ ដោយសារយីហោនេះមិនលក់នៅលើគេហទំព័រពាណិជ្ជកម្ម​អេឡិច​ត្រូនិច ដែលជួយពង្រីក​ការ​ចែក​ចាយ។ ដូច្នេះប្រសិនបើអ្នកចង់ភ្លក់ស្រាបៀរដ៏ពិសេសដែលសូម្បីតែប្រជាជនជប៉ុនក៏មិនស្គាល់ អ្នកត្រូវធ្វើដំណើរទៅកាន់ Soutokuji ។ ហើយបន្ទាប់មកអ្នកអាចស្វែងយល់អំពីត្បូងលាក់កំបាំងចំនួន ៧ ផ្សេងទៀតនៅក្នុងតំបន់នេះ។

ព័ត៌មានប្រាសាទ

ប្រាសាទ Baikouzan Soutokuji

អាស័យដ្ឋាន៖ Aomori-ken, Shimokita-gun, Omacho, Okoppe 93

គេហទំព័រ៖ bikou.yukimizake 

Hana