ជីវិតព្រះនាង Cinderella សង្កាត់ Shinsaibashi ស្លៀក​រ៉ូប​ឆើត​ឆាយ ផាត់​មុខ​ស្រស់ស្អាតទាំងវ័យ ៧៣ ឆ្នាំ

លោកស្រី Akiko Matsumoto ចំណាយពេល ៤ ម៉ោងក្នុងមួយថ្ងៃដើម្បីផាត់មុខ ស្លៀករ៉ូបពណ៌ផ្កា​ឈូក និង​ពាក់​គ្រឿង​តុបតែងលម្អសក់។

ការរៀបចំទាំងអស់ខាងលើដោយសារតែការងាររបស់លោកស្រីនៅ Bridal Saloon Rouage ដែលជាហាងជួលរ៉ូបអាពាហ៍​ពិពាហ៍​នៅ​សង្កាត់ Chuo, Osaka ដើរចម្ងាយ ៥ ពីស្ថានីយ៍ Shinsaibashi ។ លោកស្រី Akiko Matsumoto បាន​ដំណើរ​ការ​អាជីវកម្ម​ហាង​តាំងពីឆ្នាំ ១៩៨៧ ។ លោកស្រី Matsumoto ណែនាំខ្លួនថា “ព្រះនាង Cinderella មក​ពី Shinsaibashi” សំដៅទៅលើតំបន់កម្សាន្តដ៏ល្បីរបស់ Osaka ។

ទន្ទឹមនឹងនេះ គាត់ក៏​បាន​ដាក់​ឈ្មោះ​ស្ទីល​តុបតែង​ខ្លួនថា “Age-age happy” ជាស្ទីលតុបតែងខ្លួនដែលធ្វើឲ្យ​មនុស្ស​​រំភើប និងស្ងប់ស្ងាត់។

ការរស់នៅមុនពេលតុបតែងតាមបែប “Age-age happy” 

បន្ទាប់ពីបានបញ្ចប់មហាវិទ្យាល័យនៅខេត្ត Yamaguchi លោកស្រី Matsumoto បានចាប់ផ្តើមអាជីពជាអ្នករចនាម៉ូដ នៅពេលចូលបម្រើការងារក្នុងក្រុមហ៊ុនកាត់ដេរនៅ Osaka ។

នៅពេលនោះមិនទាន់មានអុីនធឺណេតទេ ដូច្នេះ​ប្រធាន​ក្រុមហ៊ុន​បាន​ជិះ​យន្តហោះ​ទៅ​អាមេរិក ហើយនាំយកគំរូ​អាវ​​យឺត ខោខូវប៊យចូលប្រទេសជប៉ុន។

លោកស្រីនឹក​ឃើញ​កាលគាត់ទទួលខុសត្រូវកែសម្រួលឲ្យ​សម​នឹង​ទីផ្សារ​ជប៉ុន ហើយផលិតផលទាំងនោះលក់ដាច់ខ្លាំង។ ប៉ុន្តែការងារបែបនេះធ្វើឲ្យ​គាត់មិនពេញចិត្ត លោកស្រីបាននិយាយថា “មិនមានភាពរីករាយ លុះត្រាតែអ្នក​ធ្វើ​អ្វី​ដែលខុសពីអ្នកដទៃ” ។

ព្រោះតែយល់ថាការបង្កើតផលិតផលដែលលក់ដាច់នៅលើទីផ្សារមិនពិបាក គាត់គិតចង់លក់ការរចនាម៉ូដ និងគំនិត​របស់ខ្លួនទៅឲ្យ​ក្រុមហ៊ុនគូប្រជែង។

លោកស្រី Akiko Matsumoto បានបន្ថែមថា “ការងារនេះគ្មាននរណាធ្វើនៅសម័យនោះទេ ប៉ុន្តែសម័យនេះគេហៅ​ថា​ការ​ប្រឹក្សា” ។ គាត់បានដាក់សំណើផែនការរបស់ខ្លួនទៅកាន់ប្រធានក្រុមហ៊ុន និងទទួលបានការយល់ព្រម។

លោកស្រី Akiko Matsumoto បានសម្រេចជាង ១០ កិច្ចសន្យាជាមួយក្រុមហ៊ុនផ្សេងទៀត ហើយការងារប្រឹក្សាយោបល់របស់លោកស្រីបន្តរីកចម្រើនជាលំដាប់។ ប៉ុន្តែក្រោយពេលរៀបការ និង​មាន​កូន​ គាត់បាន​លា​ឈប់​ពី​ការ​ងារ។ “តាមពិតទៅខ្ញុំចង់បន្តធ្វើការ នៅសម័យនោះភាគច្រើនគិតថា ស្ត្រីគួរតែធ្វើជាស្រ្តីមេផ្ទះបន្ទាប់ពីសម្រាលកូន” ។

ទោះ​ជា​យ៉ាង​ណា អាពាហ៍ពិពាហ៍​របស់លោកស្រីត្រូវ​បាន​បញ្ចប់​ដោយ​ការ​លែងលះ។ ក្នុងអំឡុងពេលចិញ្ចឹម​កូនតូច លោកស្រី Matsumoto ត្រូវធ្វើរហូតដល់ ៤ ការងារផ្សេងៗគ្នា រួម​ទាំង​ការ​រចនា​រ៉ូប​ចូលរួម​កម្មវិធី និងបង្រៀន​នៅ​សាលា​បច្ចេកទេស។

ការផ្លាស់ប្តូរដ៏ធំមួយបានកើតឡើងចំពោះលោកស្រី Matsumoto នៅពេលដែលគាត់រៀបចំគម្រោងពិព័រណ៍ពាណិជ្ជកម្មរ៉ូបអាពាហ៍ពិពាហ៍ក្នុងនាមជាអ្នករចនា។

សម័យកាលពពុះសេដ្ឋកិច្ចឡើងដល់កម្រិតកំពូលនៅចុងទសវត្សរ៍ឆ្នាំ ១៩៨០ ។ ដូច្នេះគូស្វាមីភរិយាសុខចិត្តចំណាយប្រាក់​ច្រើន​ដើម្បីរៀបចំពិធីមង្គលការធំ ហើយចំណាយប្រាក់ជាច្រើនលានយ៉េនលើរ៉ូបអាពាហ៍ពិពាហ៍។

ប៉ុន្តែនៅក្នុងកម្មវិធីតាំង​ពិព័រណ៍ គាត់ឮ​ស្ត្រី​សម្លឹង​មើល​រ៉ូប​និយាយថា “ស្អាតមែនតែថ្លៃពេក” ។ លោកស្រីយល់ឃើញ​ថា​នារី​​មួយ​ចំនួន​ប្រាថ្នា​ចង់​ស្លៀក​ឈុត​អាពាហ៍ពិពាហ៍ស្អាត ប៉ុន្តែ​មិន​អាច​ ព្រោះ​តម្លៃ​ខ្ពស់​ពេក។

គាត់គិតថា “ប្រសិនបើខ្ញុំអាចនាំយករ៉ូបដែលមានតម្លៃទាប នោះខ្ញុំអាចធ្វើឲ្យ​មនុស្សគ្រប់គ្នាសប្បាយចិត្ត” ។

កាលពី ៣៥ ឆ្នាំមុន លោកស្រី Matsumoto បានបង្កើត Bridal Saloon Rouage ។ គាត់ទិញ​រ៉ូប​ជា​ច្រើន ហើយធ្វើទៅ​ជា​ការ​រចនា​របស់​ខ្លួន ដោយ​បន្ថែម​ផ្កា និង​បូ។

តម្លៃ​ជួល​​រ៉ូប​អាពាហ៍ពិពាហ៍នៅហាងរបស់លោកស្រីចាប់​ពី ២ ម៉ឺនយ៉េនទៅ ៥ ម៉ឺនយ៉េន។ អ្នកស្រី Matsumoto រំលឹក​ថា “តម្លៃជួលរ៉ូបអាពាហ៍ពិពាហ៍លើទីផ្សារនៅសម័យនោះគឺ ៥០ ម៉ឺនយ៉េនទៅ ៨០ ម៉ឺនយ៉េន ដូច្នេះហាងរបស់ខ្ញុំតែង​តែ​ពេញ​ការ​បញ្ជា​ទិញ” ។

លោកស្រីជួលបុគ្គលិកដល់ទៅ ១៥ នាក់ ហើយប្រាក់ចំណូលប្រចាំឆ្នាំរបស់ក្រុមហ៊ុនជាង ១០ ម៉ឺនយ៉េន។

ចាប់ពីពេលដំណើរការអាជីវកម្មហាង Bridal Saloon Rouage លោកស្រី Matsumoto បានចាប់ផ្តើមផាត់មុខច្រើន និងស្លៀក​សម្លៀក​បំពាក់​​ឆើត​ឆាយ។

គាត់ក៏ធ្លាប់ចូលរួមការ​ប្រកួត​ផាត់​មុខ​ដែល​រៀបចំ​ដោយ​ស្ថានីយ​ទូរទស្សន៍នៅ Osaka ហើយទទួលបានចំណាត់​លេខ ២ រឿងនេះធ្វើឲ្យ​អ្នកស្រីមានទំនុកចិត្ត និងកម្លាំងចិត្ត។

អ្នកស្រីបានចែករំលែក “ក្លាយជាមនុស្សម្នាក់ដែល​ទាក់ទាញ​ការ​ចាប់​អារម្មណ៍របស់អ្នកទាំងអស់គ្នាស​ជា​រឿង​ល្អ​បំផុត​សម្រាប់​អាជីវកម្ម ហើយខ្ញុំយល់ឃើញថា ការផាត់មុខក៏ធ្វើឲ្យ​​ខ្ញុំ​មានទំនុកចិត្តផងដែរ” ។

យូរៗទៅវិស័យរ៉ូបអាពាហ៍ពិពាហ៍ជប៉ុនបានផ្លាស់ប្តូរយ៉ាងខ្លាំង។ សព្វថ្ងៃកន្លែង​រៀប​អាពាហ៍​ពិពាហ៍តែងតែគិតថ្លៃគូស្វាមី​ភរិយា​ថ្មី ប្រសិនបើពួកគេយក​សម្លៀក​បំពាក់​ផ្ទាល់ខ្លួនមកស្លៀក​ក្នុង​ពិធី​មង្គលការ ដូច្នេះអាជីវកម្មរបស់អ្នកស្រីបាត់បង់អត្ថប្រយោជន៍។

ជាងនេះទៅទៀត ពិធីរៀបមង្គលការសាមញ្ញបានក្លាយជាការនិយមនៅប្រទេសជប៉ុន រហូតដល់ថ្នាក់គូស្វាមភរិយាថ្មីកាន់តែច្រើនឡើងៗសម្រេចចិត្តមិនរៀបចំពិធីមង្គលការ។

ដោយសារមូលហេតុ​នេះ ចំនួនបុគ្គលិកហាង Bridal Saloon Rouage ត្រូវ​​កាត់​បន្ថយ​មក​ត្រឹម​ ៣ នាក់​ប៉ុណ្ណោះ។ នៅ​ពេលខ្លះអ្នកស្រី Matsumoto មាន​អារម្មណ៍ស្រពិចស្រពិលចំពោះ​អនាគត ប៉ុន្តែគាត់នៅតែបន្តទៅមុខដោយមិន​ផ្លាស់​ប្តូរ​ស្ទីល​របស់ខ្លួន។

ថ្មីៗនេះ លោកស្រី Matsumoto បង្ហាញខ្លួនកាន់តែច្រើនក្នុងកម្មវិធីទូរទស្សន៍ជប៉ុន និងកាន់តែសកម្មនៅលើបណ្តាញ​សង្គម។ ចំណុចនេះជួយទាក់ទាញអតិថិជនស្រីមកកាន់ហាង Bridal Saloon Rouage កាន់តែច្រើន។

លោកស្រី Matsumoto បាននិយាយថា “ស្រ្តីគួរតែធ្វើសកម្មភាពកាន់តែច្រើន និងមានភាពក្លាហាន។ កុំចាប់អារម្មណ៍ទៅលើអ្វីដែលអ្នកដទៃនិយាយខ្លាំងពេក។ ចូរធ្វើអ្វីដែលអ្នកចូលចិត្ត និងធ្វើរឿងដ៏អស្ចារ្យ” ។ 

នេះជាដំបូន្មានដែលគាត់ផ្តល់ឱ្យស្ត្រីផ្សេងទៀត ហើយក៏ជាវេទមន្តជួយអោយអ្នកស្រី Matsumoto បន្តចំណង់ចំណូល​ចិត្ត​រ៉ូប​អាពាហ៍​ពិពាហ៍​អស់រយៈពេល ៣៥ ឆ្នាំមកហើយ។

Erika អាយុ ២៨ ឆ្នាំបានដាក់ពាក្យសុំធ្វើការនៅហាង Bridal Saloon Rouage បន្ទាប់ពីបានឃើញលោកស្រី Matsumoto នៅ​លើ​កញ្ចក់​ទូរទស្សន៍ ហើយក៏គ្រោងនឹងរៀបការនៅរដូវស្លឹកឈើជ្រុះឆ្នាំនេះដែរ។

Hana