ទំព័រដើម
Japo- ថ្ងៃនេះ
បាតុភូតប្រជាជនជប៉ុនស្លាប់គ្មានសាច់ញាតិ ត្រូវទុកចោលនៅកន្លែងធ្វើបុណ្យ មិនបានបូជាសព

បាតុភូតប្រជាជនជប៉ុនស្លាប់គ្មានសាច់ញាតិ ត្រូវទុកចោលនៅកន្លែងធ្វើបុណ្យ មិនបានបូជាសព

ថ្ងៃចន្ទ 16/05/2022 | 15:18 ល្ងាច

មន្ត្រីអាជ្ញាធរមូលដ្ឋានទីក្រុង Nagoya ខេត្ត Aichi បានរក្សាទុកសាកសពរបស់អ្នកស្លាប់នៅកន្លែងធ្វើបុណ្យសពក្នុងរយៈពេលយូរមកហើយ ព្រោះតែមិនអាចរកឃើញសាច់ញាតិមកធ្វើពិធីបូជាសព។

ក្នុងករណីខ្លះសាកសពត្រូវបានរក្សាទុករហូតដល់ ៣ ឆ្នាំ ៤ ខែ។

យោងទៅតាមច្បាប់បញ្ចុះសពនៅជប៉ុន អភិបាលក្រុងទទួលខុសត្រូវចំពោះការបូជាសព ឬបញ្ចុះសពប្រជាជនដែលមិនអាចរកឃើញសាច់ញាតិរបស់ពួកគេ។

នៅទីក្រុង Nagoya ទំនួលខុសត្រូវនោះស្ថិតនៅលើរដ្ឋាភិបាលថ្នាក់សង្កាត់។ ក្នុងករណីធម្មតា ការបូជាសពសម្រាប់ករណីពិសេសទាំងនេះត្រូវធ្វើឡើងក្នុងរយៈពេល ៦ ខែ។

ទោះជាយ៉ាងណា បើតាមទិន្នន័យត្រួតពិនិត្យដែលមានរយៈពេលជាង ៣ ឆ្នាំ ធ្វើឡើងដោយអាជ្ញាធរទីក្រុង Nagoya បង្ហាញថា ៥ ក្នុងចំណោម ១៦ សង្កាត់ មិនអាចបញ្ចប់ការបូជាសពអ្នកស្រុក ១៣ នាក់គិតត្រឹមខែធ្នូ ឆ្នាំ ២០២១ ខណៈពេលបញ្ចប់ការត្រួតពិនិត្យ។

នៅទីបំផុតទាំងអស់ ១៣ សាកសពត្រូវបានបូជារួចរាល់ ប៉ុន្តែនីតិវិធីបូជាសពសម្រាប់សាកសព ៦ ក្នុងចំណោមនោះមិនបានធ្វើយ៉ាងហោចណាស់មួយឆ្នាំ។ ចំពោះករណីដែលនៅសល់ ការស្វែងរកសាច់ញាតិរបស់ពួកគេក៏ត្រូវបានបញ្ឈប់ផងដែរ។ មន្ត្រី ៧ នាក់ដែលទទួលបន្ទុកបូជាសពត្រូវបានថ្កោលទោសចំពោះការយឺតយ៉ាវ។

តំណាងអាជ្ញាធរទីក្រុង Nagoya បាននិយាយថា៖ “មន្ត្រីទាំងនេះមមាញឹកនឹងការងារការិយាល័យផ្សេងទៀត ឬបញ្ហាសំខាន់ជាងនេះ” ។

ប្រភពព័ត៌មានពីបុគ្គលិកក្រុមហ៊ុនបញ្ចុះសពនៅទីក្រុង Nagoya បាននិយាយថា ពួកគេធ្លាប់រក្សាទុកសាកសពជិត ៣ ឆ្នាំ។ “ជារឿងមិនធម្មតាទេដែលសាកសពត្រូវបានរក្សាទុកក្នុងរយៈពេលប្រហែល ២ ឆ្នាំ” ។

ប្រជាជនជប៉ុនជាច្រើននាក់ស្លាប់ក្នុងភាពឯកោ

យោងទៅតាមមន្ត្រីទីក្រុង Nagoya មនុស្សកាន់តែច្រើនស្លាប់ម្នាក់ឯង គ្មានសាច់ញាតិធ្វើបុណ្យសព ក្នុងបរិបទចំនួនប្រជាជនចំណាស់នៅក្នុងប្រទេសជប៉ុនកើន។

ក្នុងឆ្នាំសារពើពន្ធ ២០២០ សាកសពរបស់អ្នកស្រុកចំនួន ២៤៣ នាក់ក្នុងទីក្រុង Nagoya ត្រូវបានរក្សាទុកក្នុងរយៈពេលយូរ ព្រោះគ្មានសាច់ញាតិមកធ្វើបុរណ្យសព។

អាជ្ញាធរសង្កាត់បានទទួលខុសត្រូវលើការបូជាសពចំនួន ១៦០ សាកសព ចំនួននេះកើនឡើងទ្វេដងបើធៀបនឹង ៨៤ ករណីក្នុងសារពើពន្ធឆ្នាំ ២០១៦ ។

តំណាងអាជ្ញាធរទីក្រុងបាននិយាយថា៖ “មន្ត្រីចង់ស្វែងរកសាច់ញាតិរបស់អ្នកស្លាប់មកទទួលសពឱ្យបានឆាប់តាមដែលអាចធ្វើទៅបាន ប៉ុន្តែចំនួនសាកសពថ្មីនៅតែបន្តកើនឡើង” ។

មានករណីមួយ ពួកគេត្រូវពន្យារពេលបូជាសពដែលបានកំណត់មុននោះ ព្រោះរវល់ស្វែងរកសាច់ញាតិរបស់អ្នកស្លាប់ម្នាក់ទៀត។

សាកសពដែលមិនទាន់មានសាច់ញាតិមកទទួល ត្រូវបានរក្សាទុកក្នុងបន្ទប់ទឹកកករបស់ក្រុមហ៊ុនបញ្ចុះសព ខណៈដែលមន្ត្រីមូលដ្ឋានរង់ចាំទទួលដំណឹងពីសាច់ញាតិរបស់ពួកគេ។

ជួនកាល បន្ទាប់ពីមិនទទួលបានការឆ្លើយតប ពួកគេបានផ្អាកការស្វែងរកសាច់ញាតិ។

មន្ត្រីជាន់ខ្ពស់ទីក្រុង Nagoya ម្នាក់បានសង្កត់ធ្ងន់ថា បុគ្គលិកទទួលបន្ទុកបូជាសពគ្មានចេតនាធ្វេសប្រហែសចំពោះភារកិច្ចរបស់ខ្លួនឡើយ។ “ពួកគេកំពុងព្យាយាមធ្វើការ” ហើយ “ពួកគេដឹងថាត្រូវបំពេញការងាររបស់ខ្លួន” ។

យោងទៅតាមមន្ត្រីទីក្រុង ក្រុមហ៊ុនរៀបចំបុណ្យសពទទួលថ្លៃរក្សាទុក និងបុណ្យសពតែម្តងប៉ុណ្ណោះ ដែលមានន័យថាពួកគេមិនទទួលបានប្រាក់បន្ថែម បើទោះបីជាសាកសពត្រូវបានរក្សាទុកក្នុងរយៈពេលយូរក៏ដោយ។

ការប្រគល់សពទៅអោយក្រុមហ៊ុនរៀបចំបុណ្យសព ជួយកាត់បន្ថយសម្ពាធរបស់អាជ្ញាធរសង្កាត់ក្នុងការដោះស្រាយបញ្ហាបូជាសព។ មន្ត្រីក៏បានពន្យល់បន្ថែមថា ការងារដែលទាក់ទងនឹងជំងឺកូវីដ ១៩ មានអាទិភាពជាងបូជាសព។

កន្លែងរៀបចំបុណ្យសពនៅ Nagoya បានអោយដឹងថា ពួកគេត្រូវលុបពិធីបុណ្យសពរបស់អតិថិជន បន្ទាប់ពីកន្លែងដាក់សាកសពដែលបញ្ជូនមកពីអជ្ញាធរសង្កាត់ពេញ។

ក្រុមហ៊ុនរៀបចំបុណ្យសពផ្សេងទៀតបានចែករំលែកថា ពួកគេត្រូវទុកសាកសពក្នុងមឈូសដែលពោរពេញដោយទឹកកកស្ងួត ព្រោះមិនមានកន្លែងនៅក្នុងបន្ទប់ទឹកកក។

ប៉ុន្តែក្រុមហ៊ុនទាំងនេះមិនអាចត្អូញត្អែរទៅកាន់ការិយាល័យសង្កាត់បានទេ ដោយសារពួកគេទទួលបានប្រភពចំណូលថេរពីទីនោះ។

កន្លែងរៀបចំបុណ្យសពកាលពីមុនគេចពីសំណើរបស់អាជ្ញាធរសង្កាត់។ ប៉ុន្តែសូម្បីតែក្រុមហ៊ុនធំក៏ព្រមទទួលយកសាកសពដែរ ព្រោះអតិថិជនជាច្រើនកំពុងសន្សំលើថ្លៃបុណ្យសព ដោយរៀបចំសេវាកម្មខ្នាតតូច។

មន្ត្រីជាន់ខ្ពស់ទីក្រុងបាននិយាយថា៖ “ក្រុមហ៊ុនធ្វើបុណ្យសពមិនអាចពិចារណាយ៉ាងតឹងរ៉ឹងចំពោះការិយាល័យសង្កាត់បានទេ។ មន្ត្រីសង្កាត់ត្រូវតែយល់ថាពួកគេព្រួយបារម្ភខ្លាចបាត់បង់ឱកាសអាជីវកម្ម” ។

ប្រឈមនឹងស្ថានភាពខាងលើ អាជ្ញាធរទីក្រុង Nagoya កំពុងរៀបចំឡើងវិញគោលការណ៍ណែនាំទាក់ទងនឹងពេលវេលាអតិបរមាដែលអាចទទួលយកបានចាប់ពីពេលទទួល និងបូជាសព។

មន្ត្រីក្រុងម្នាក់បាននិយាយថា៖ “ពិតជាពិបាកនិយាយថាពេលណាត្រូវបូជាសព ប៉ុន្តែយើងចង់កំណត់ពេលវេលាស្តង់ដារ” ។