សមាជិកក្រុមស្រាវជ្រាវការិយាល័យរដ្ឋាភិបាលជប៉ុនលើកទឹកចិត្តប្រជា​ជន​ចែ​ចង់តាមបែប Manga Kabe-don

ក្នុងបទបង្ហាញកាលពីថ្ងៃទី ៧ ខែមេសាឆ្នាំ ២០២២ Jun Kobayashi សមាជិកក្រុមស្រាវជ្រាវការិយាល័យខុទ្ទកាល័យចេញផ្សាយឯកសារដែលមានឈ្មោះថា “ឯកសារស្រាវជ្រាវស្តីពីស្នេហា” វិធីចែចង់បង្កចម្រូងចម្រាសហៅថា “kabe-don” ។ Kobayashi ស្នើឱ្យរដ្ឋាភិបាលជប៉ុនបញ្ចូលវិធីសាស្រ្តនេះក្នុងកម្មវិធីអប់រំ ជួយដល់អ្នកដែលមានភាពខ្មាស់​អៀន​សារ​ភាព​ស្នេហា។

Kobayashi បញ្ជាក់​ថា​បុរស ​និង​ស្ត្រី​ដែល​មាន​បទពិសោធន៍​ច្រើន​ក្នុង​ទំនាក់ទំនង​ប្រុស​ស្រី​អាចនឹងរៀបការ ក្លាយ​ជា​អ្នក​មាន និង​មាន​សុភមង្គល​ជាង។ ដូច្នេះរដ្ឋាភិបាល និងក្រុមផ្សេងទៀតគួរតែជួយសម្រេចគោលដៅនេះ។ ទោះ​ជា​យ៉ាង​ណា សំណើ​នេះ​រងមតិជំទាស់ជាច្រើន ខណៈដែលមនុស្សមួយចំនួនយល់​ស្រប​ថា សកម្មភាព Kabe-don រ៉ូមែន​ទិក​ អ្នកខ្លះទៀតបារម្ភថាត្រូវគេយល់ច្រឡំជាការគំរាមកំហែង។

ការរិះគន់ថ្មីៗនេះមកពីតារាសម្តែង តារាម៉ូដែល Suzu Yamanouchi នាងបានចង្អុលបង្ហាញពីគុណវិបត្តិនៃសកម្មភាព Kabe-don នេះ។ 

ជាពិសេសនាងបាននិយាយថា៖

“រឿងដូចជា Kabe-don មានតែនៅក្នុង Shojo Manga ប៉ុណ្ណោះ ជាការពិតណាស់ ឃើញតារាសម្តែងប្រុសសង្ហាធ្វើសកម្មភាពនេះ​ក្នុង​ឈុត​ឆាក Live-action នឹងធ្វើឱ្យបេះដូងអ្នកទស្សនាលោតខុសចង្វាក់ ប៉ុន្តែប្រសិនបើនរណា​ម្នាក់សាកល្បងសកម្មភាព Kabe-don ក្នុងជីវិតពិត រឿងតែមួយគត់ដែលអ្នកគិតដល់គឺគួរអោយខ្លាច។ មនុស្ស​កាន់តែច្រើនឡើងយល់ច្រឡំថាស្ត្រីរីករាយនឹងអារម្មណ៍ទទួលបាន Kabe-don ពីបុរសណាម្នាក់។ នៅពេលដែល​មាន​ភាពខុសគ្នារវាងមនុស្សទាំងពីរ បើទោះបីជាម្នាក់នោះជាបុគ្គលដែលអ្នកចូលចិត្ត សកម្មភាព Kabe-don ជា​ស្ថាន​ភាព​​ដែល​គួរឱ្យខ្លាច” ។

Yamanouchi បញ្ជាក់យ៉ាងជាក់លាក់ថា Kabe-don គួរតែមានក្នុងរឿងប្រឌិតប៉ុណ្ណោះ។

ក្នុង​កិច្ច​ប្រជុំ​កាលពីថ្ងៃទី ២០ ខែមេសា គណបក្ស​ប្រជាធិបតេយ្យ​អាស្រ័យ​រដ្ឋធម្មនុញ្ញ​របស់​ជប៉ុនបានសួរទៅកាន់ការិយាល័យសមភាពយេនឌ័ររបស់ការិយាល័យខុទ្ទកាល័យអំពីបញ្ហានេះ។ តំណាង​ការិយាល័យ​បាន​លើក​ឡើង​ថា មតិ​​របស់​​សាស្ត្រាចារ្យ​មិនមែន​ជា​មតិ​ផ្លូវការ​របស់​រដ្ឋាភិបាល​ទេ។ អ្នក​តំណាង​ក៏​បាន​និយាយ​ថា “ការិយាល័យ​នឹង​យក​​ចិត្ត​​ទុក​​ដាក់​​ធ្វើ​ឱ្យ​អ្នក​រាល់​គ្នា​មាន​អារម្មណ៍​ងាយស្រួលពេល​រៀបចំ​របាយការណ៍” ។

Japo Cambodia