តើ​ជីវិត​របស់​ប្រជាជនជប៉ុន​សម័យ​ដើម​មាន​លក្ខណៈ​បែប​ណា? ភូមិ Shikoku ជាសារមន្ទីរថែរក្សាប្រវត្តិ​ជីវិត​ប្រចាំថ្ងៃ​របស់​កសិករ​ជប៉ុន

តើប្រជាជនជប៉ុនកាលពីសម័យដើមរស់នៅបែបណា?

ជាពិសេសទិដ្ឋភាពតំបន់ជនបទមិនឃើញច្រើននៅលើខ្សែភាពយន្តឡើយ ដូច្នេះមនុស្សជាច្រើនប្រាកដជាយល់​ថា​ព័ត៌មាន​មិនគ្រប់គ្រាន់។ ប្រសិនបើអ្នកចង់ស្វែងយល់បន្ថែមអំពីប្រធានបទនេះ សារមន្ទីរនៅ Shikoku, Kagawa នឹង​ក្លាយ​ជាកន្លែងដ៏ល្អមួយ បង្ហាញពីជីវិតកសិករជប៉ុននៅតំបន់ជនបទកាលសម័យដើម។

នៅក្នុងភូមិនេះគ្រឿងបរិក្ខារសុទ្ធតែជារបស់ប្រើប្រាស់តាំងយូរយារណាស់មកហើយ គ្រាន់តែត្រូវបានប្រមូលផ្តុំ។ ដោយ​​ហេតុ​​នេះ អ្នកនឹងមើលឃើញទិដ្ឋភាពទូទៅនៃជីវិតនៅជនបទជប៉ុនតាំងពីបុរាណ។

មានស្ពានព្យួរមួយនាំអ្នកទៅកាន់ច្រកទ្វារភូមិ។

ស្ពាន​នេះធ្វើពី​វល្លិ ប៉ុន្តែគេប្រើខ្សែដែកនៅ​ចំ​កណ្តាលដើម្បី​ធ្វើ​ឱ្យ​ស្ពាន​រឹងមាំ និង​មាន​សុវត្ថិភាព ។ ទោះជាយ៉ាងណាស្ពានយោលមាំជាងការគិតរបស់ខ្ញុំទៅទៀត។ នៅពេលដែលដើរឆ្លងកាត់ស្ពាន នៅចំពោះមុខអ្នកបង្ហាញពីទិដ្ឋភាព​ជប៉ុន​បុរាណ។

ផ្ទះនៅតំបន់ជនបទជប៉ុនជាក់ស្តែងដំបូល​​ប្រក់​ស្បូវ និង​ជញ្ជាំង​ដី។ ជញ្ជាំង​ដី​ស្រូប​យក​សំណើម ដំបូល​​ប្រក់​ស្បូវ​ប្រើ​សម្រាប់ការពារទឹកភ្លៀង និង​​ស្រូប​​សំណើម។ ផ្សែង​ដែលបណ្តាលមកពីការចម្អិនអាហារក៏ភាយចេញក្រៅ​ផង​ដែរ។

នេះជារចនាសម្ព័ន្ធក្នុងផ្ទះ។

កន្ទេលដែលអ្នកមើលឃើញក្នុងរូបភាពគឺកន្ទេល Tatami ពីដើម។ ចំណែកផ្នែកខាងមុខក្រាលដោយបន្ទះក្តារ។ ពិដាន​ខ្ពស់​គឺ​ជាដំបូល​ប្រក់​ស្បូវ ជា​មួយ​នឹង​លក្ខណៈ​ពិសេស​ហួតចំហាយទឹក ប៉ុន្តែមិនបណ្តាលឱ្យទឹកខាងក្រៅហូរចូល។

ក្រៅពីនេះ ដំបូលមានមុខងារការពារកម្តៅ និងរក្សាកម្តៅខ្ពស់ ដូច្នេះនៅរដូវក្តៅត្រជាក់ ចំណែករដូវរងាកក់ក្តៅ។

ក្នុងយុគសម័យដែលម៉ាស៊ីនត្រជាក់មិនទាន់មាន នេះជាមធ្យោបាយល្អបំផុត។

លក្ខណៈពិសេសនៃស្ថាបត្យកម្មខាងក្រោមគឺជណ្តើរថ្ម ដែលធ្លាប់ជាឆាកល្ខោន Kabuki ។

“ឆាកល្ខោន Kabuki” ​ប្រើ​ជា​មជ្ឈមណ្ឌល​សម្តែង និងកំសាន្តក្នុងភូមិ។ ខ្ញុំពិតជាចង់ដឹងថាល្ខោន Kabuki ល្បីមួយ​ណា​ដែល​ធ្លាប់​សម្តែង​នៅ​ទី​នេះ។

ក្រៅពីនេះនៅមានតំបន់មួយទៀត។

ស្ថាបត្យកម្ម​ខាង​លើធ្វើ​ពី​ថ្ម នាំមកនូវលក្ខណៈបែបអឺរ៉ុបជាជាងជប៉ុន។ នេះជាអគារសម័យ Meiji នៅពេលដែល​សម័យសាមូរ៉ៃបញ្ចប់ ហើយ​ប្រទេស​ជប៉ុន​ចាប់​ផ្តើម​នាំ​ចូលស្ថាបត្យកម្មលោកខាងលិច ពីសហរដ្ឋអាមេរិក និងបណ្តា​ប្រទេស​នៅ​អឺរ៉ុប។ ស្ថាបត្យកម្មដែលអ្នកកំពុងមើលឃើញគឺជាលំនៅដ្ឋានរបស់អ្នកការពារបង្គោលភ្លើងហ្វារ។

ម្យ៉ាងវិញទៀត ក្នុងភូមិនៅមានតំបន់ជាច្រើនសម្រាប់គយគន់ទេសភាព។ នេះជាប្រភពទឹកដែលទាញយកប្រយោជន៍​​ពី​ប្រភព​ទឹកធម្មជាតិ។

ប្រភពទឹក​នេះស្ថិតនៅ​ទល់មុខ​ផ្ទះ​ប្រជាជន​ ដើរតួនាទី “ព្យាបាល​អារម្មណ៍” សម្រាប់អ្នករាល់គ្នាជាមួយនឹងសម្លេងទឹក​ហូរ។

ភូមិ Shikoku ជាកន្លែងដែលអ្នកអាចគយគន់ទេសភាពបែបប្រពៃណីជប៉ុន រួមជាមួយនឹងធម្មជាតិជនបទស្ងប់ស្ងាត់ អាឡោះអាល័យ។ ប្រសិនបើអ្នកមានឱកាសទៅលេង Kagawa កុំភ្លេចមកកាន់ទីនេះ។

Kengo Abe