ស្ត្រីជនជាតិជប៉ុនដាក់លក់ម៉ាសដែលប្រើរួចជាប់​ក្រែម​លាបមាត់ និង​ញើស​​តាម​​អុីនធឺណេត

ស្ត្រីជនជាតិជប៉ុនមួយចំនួនកំពុងប្រកាសលក់ម៉ាសជាប់ក្រែមលាបមាត់ដែលប្រើរួចរបស់ពួកគេតាមបណ្តាញ​អុីនធឺណេត។

ស្រ្តីម្នាក់មានអាយុប្រហែល ៣០ ឆ្នាំរស់នៅក្នុងទីក្រុងតូក្យូបានចាប់ផ្តើមលក់ម៉ាសដែលប្រើរួចតាំងពីខែសីហាឆ្នាំមុន។ យោងទៅតាមព័ត៌មានពី Mainichi នាងទទួលបានការបញ្ជាទិញពីរបីបន្ទាប់ពីបើកលក់ ២៤ ម៉ោង។ ម៉ាសដែល​នាងលក់ជាប់ក្រែមលាបមាត់ និងញើស ព្រោះនាងមានចេតនាពាក់ម៉ាសពេញមួយថ្ងៃនៅកន្លែងធ្វើការ និង​កន្លែងហាត់ប្រាណ។ ស្ត្រី​រូប​នេះ​បាន​អះអាង​ក្លែងបន្លំថាមាន​អាយុ ​២០​ ឆ្នាំ​ក្នុង​ការ​ពិពណ៌នា។

ក្នុងខែដំបូង តាមរយៈកម្មវិធីទីផ្សារទំនិញជជុះ Mercari នាងលក់ម៉ាសចំនួន ៤ ក្នុងតម្លៃ ៥០០ យ៉េន ហើយឥឡូវនេះរកប្រាក់បានច្រើនដោយគ្រាន់តែលក់ម៉ាសប្រើរួច។ ក្រៅពីម៉ាស អតិថិជនមួយចំនួនសួររកទិញខោអាវក្នុង និងស្រោមជើងដែលប្រើរួច ដូច្នេះស្ត្រីរូបនេះក៏លក់ទំនិញខាងលើក្នុងតម្លៃ ១៥០០ យ៉េនចំពោះខោអាវទ្រនាប់ និងតម្លៃពី ៣០០ ទៅ ៤០០ យ៉េនចំពោះស្រោមជើង។ តាមរយៈវិធីនេះ នាងរកបានប្រហែល ២០,០០០ យ៉េន​​រហូត​​មក​ដល់​ពេល​នេះ។ គោលការណ៍​របស់​កម្មវិធី​ហាម​មិន​ឱ្យ​លក់​ទំនិញ​អនាម័យដែល​ប្រើ​រួច ដូច្នេះ​ស្ត្រី​ម្នាក់នេះ​សម្គាល់​ផលិត​ផលអាវយឺតក្នុងប្រភេទទំនិញផ្សេង។

ទោះបីជាស្ត្រីរូបនេះបាន​ទទួល​សំណើមួយចំនួនអោយបង្ហាញមុខមាត់ ប៉ុន្តែនាងមិនទាន់យល់ព្រម។

សិស្សស្រីម្នាក់ បន្ទាប់ពីត្រូវបានមិត្តភក្តិរបស់នាង “បំផុសគំនិត” ក៏បានចាប់ផ្តើមលក់ម៉ាសដែលប្រើរួចក្នុងខែកុម្ភៈ​។ អតីតប៉ូលីស និងមេធាវី Yasuo Sawai បង្ហាញការព្រួយបារម្ភនៅពេលដែលសិស្សវិទ្យាល័យចូលរួមទំនោរនេះ ដោយ​សារ​តែ​ប្អូនៗអាចប្រឈមនឹងការគំរាមកំហែង បង្ខិតបង្ខំ អំពើហិង្សា​ផ្លូវ​ភេទ បង្ខំឱ្យលក់រូបថតអាក្រាតកាយ។

សិស្សខាងលើលក់បានចំនួន ១៥ ម៉ាសក្នុងតម្លៃ ១៥០០ យ៉េន។ នាងក៏លក់រូបថតអណ្តាត និងខោអាវទ្រនាប់ដែលប្រើរួចរបស់ខ្លួន។ នាង​បាន​និយាយ​ថា នាង​មិន​ដែល​ផ្ញើ​រូបថត​អាក្រាត​កាយ ឬ​ជួប​អតិថិជន​របស់​ខ្លួនផ្ទាល់នោះទេ។

“ខ្ញុំ​មិន​ចង់​ធ្វើ​ដូច្នេះ​ទេ ប៉ុន្តែខ្ញុំមិនទាន់គ្រប់អាយុទៅធ្វើការ។ ខ្ញុំចង់បានប្រាក់ទិញ Manga ។ ខ្ញុំគ្រោងនឹងឈប់លក់ពេលចូល​វិទ្យាល័យ” ។

Sawai ក៏បានពន្យល់បន្ថែមថា លក់ម៉ាសដែលប្រើរួចអាចចាត់ជាប្រភេទ “លក់ទឹកមាត់” ដែលផ្ទុយនឹងច្បាប់។

លើស​ពី​នេះ ច្បាប់​ក៏​កំណត់​លើ​ការ​ទិញ​ខោអាវ​ទ្រនាប់ដែល​ប្រើ​រួច​ពី​បុគ្គល​អាយុ​ក្រោម​ ១៨​ ឆ្នាំ​គឺខុសច្បាប់។ ម៉ាសដែល​ប្រើ​រួចមិនរាប់បញ្ចូលក្នុងមាត្រានេះទេ ហើយមិនអាចចាត់ទុកជា “បទល្មើស” ឡើយ។

Sacchan