ប៉ូលីស​ជប៉ុន​ផ្តល់​ជំនួយ​ដល់​អតីត​ Yakuza ក្នុងការបើក​គណនី​ធនាគារ

នៅប្រទេសជប៉ុន អតីត Yakuza អាច​បើក​គណនី​ធនាគារ​ ​ក្រោយ​ពេលចាកចេញពីក្រុម ៥ ឆ្នាំ។ ទោះ​ជា​យ៉ាង​ណា ក្នុងខែ​កុម្ភៈ ទីភ្នាក់ងារប៉ូលីសជាតិ NPA (National Police Agency) ចេញការណែនាំដល់នាយកដ្ឋានប៉ូលីសក្នុងតំបន់ចំពោះនីតិវិធីបើកគណនីធនាគារសម្រាប់អតីត Yakuza ។ ក្រៅពីនេះ ពួកគេក៏បានជូនដំណឹងដល់ធនាគារ​តូច ធំ​ចំពោះ​វិធាន​ការគាំទ្រដល់អ្នកដែលចាកចេញពីក្រុមសង្គមងងឹត។

ការដែលមិនអាចបើកគណនីធនាគារធ្វើឱ្យបញ្ហាចូលរួមសង្គម ចាប់ផ្តើមជីវិតថ្មីរបស់អតីត Yakuza ជួបបញ្ហា ដោយ​សារតែពួកគេពិបាកក្នុងការទទួលប្រាក់ខែតាមរយៈការផ្ទេរប្រាក់តាមអុីនធឺណេត។ វិធានការខាងលើរបស់ NPA ដើម្បីលើកទឹកចិត្ត Yakuza កាន់តែច្រើនចាកចេញពីក្រុមសង្គមងងឹត និងចូលរួមក្នុងសហគមន៍ឡើងវិញ។

មន្ត្រីប៉ូលីសជាន់ខ្ពស់ម្នាក់បាននិយាយថា “នោះជាកត្តាសំខាន់នៃ​វិធានការ​ប្រឆាំង​ក្រុមជនពាល ដោយអនុញ្ញាត​ឱ្យ​អ្នក​ដែលចាកចេញពីក្រុម Yakuza អាចបើកគណនីធនាគារផ្ទាល់ខ្លួន។ យើង​សង្ឃឹម​ថា​នឹង​ដំណើរការ​ប្រកប​ដោយ​ស្ថិរភាព” ។

កាលពីមុន សេចក្តីសម្រេចចិត្តបើកគណនីធនាគារអាស្រ័យលើស្ថាប័នហិរញ្ញវត្ថុ។ ធនាគារតែងតែប្រើប្រាស់ប្រព័ន្ធទិន្នន័យសម្ងាត់ និងព័ត៌មានផ្សេងទៀត ដើម្បីកំណត់ថាតើបុគ្គលដែលចង់បើកគណនីនោះជា Yakuza ដែរឬទេ។ លើសពីនេះ ពួកគេអាចបើកគណនីបានលុះត្រាតែបើកប្រាក់បៀវត្សរ៍ និងចាកចេញពីក្រុមបាន ៥ ឆ្នាំ។ ទន្ទឹមនឹងនេះ ធនាគារ​មួយ​ចំនួនក៏ដាក់ចេញលក្ខខណ្ឌផ្សេងទៀត។

ឧទាហរណ៍ពួកគេត្រូវបានសហគ្រាសសហករណ៍ទទួលចូលធ្វើការ ក្រុមហ៊ុនទាំងនេះយល់ព្រមជួលអតីត Yakuza ឱ្យធ្វើការដោយមានជំនួយពីប៉ូលីស ឬពី “មជ្ឈមណ្ឌលលុបបំបាត់ក្រុមឧក្រិដ្ឋកម្ម” ។ មជ្ឈមណ្ឌលបែបនេះមាននៅគ្រប់​ខេត្ត​ក្រុង​ក្នុងប្រទេសជប៉ុនដែលត្រូវបានបង្កើតឡើង​ស្រប​តាម​បទ​ប្បញ្ញត្តិ​ស្តីពីការទប់ស្កាត់ឧក្រិដ្ឋកម្ម។

គិតត្រឹមដំណាច់ឆ្នាំ ២០២០ នៅទូទាំងប្រទេសជប៉ុន សមាជិក Yakuza ផ្លូវការ និងបម្រុងមានប្រហែល ២៥,៩០០ តួលេខនេះធ្លាក់ចុះជាង ៧០% ធៀបនឹងរយៈពេលបីទសវត្សរ៍មុន។ នៅពេលដែលច្បាប់ប្រឆាំងឧក្រិដ្ឋកម្មចូលជាធរមាន ប៉ូលីស និងមជ្ឈមណ្ឌលលុបបំបាត់ឧក្រិដ្ឋកម្មជួយដល់ Yakuza ប្រមាណ ១៧,៥០០ នាក់ចាក​ចេញ​ពី​ក្រុមសង្គមងងឹត ចាប់ពីឆ្នាំ ១៩៩២ ដល់ឆ្នាំ ២០២០ ។ ប៉ូលីស និងភាគីផ្សេងទៀតបានជួយដល់អតីតសមាជិកក្រុមចំនួន ១,១៧៦ នាក់ឱ្យទទួលបានការងារធ្វើ។ ក្រុមមន្ត្រីបាននិយាយថា អាជីវកម្មប្រហែល ១,៥០០ សហការ។

ចលនាវិជ្ជមាន

លោក Noboru Hirosue អាយុ ៥១ ឆ្នាំ ជាអ្នកជំនាញខាងឧក្រិដ្ឋកម្មនៅមជ្ឈមណ្ឌលស្រាវជ្រាវឧក្រិដ្ឋកម្មនៃសាកលវិទ្យាល័យ Ryukoku គាំទ្រយ៉ាងខ្លាំងចំពោះដំណោះស្រាយបើកគណនីធនាគារសម្រាប់អតីត Yakuza និយាយថា “នេះ​ជា​ជំហាន​សំខាន់ ដើម្បីគាំទ្រដល់ដំណើរការ​ចូល​រួម​សហគមន៍​ឡើងវិញ” ។

លោកបានបន្ថែមថា “អ្នកដែលចាកចេញពី Yakuza នឹងមានទស្សនវិស័យកាន់តែប្រសើរឡើងក្នុងការចូលរួមសង្គម នៅពេលដែលពួកគេទទួលបានការអនុញ្ញាតបើកគណនីធនាគារផ្ទាល់ខ្លួន” ។

លោក​បាន​និយាយ​ថា អ្នកដែលត្រូវបដិសេធបើកគណនី​ធនាគារ​ប្រឈម​នឹង​ការ​រឹត​បន្តឹង​ជា​ច្រើន​លើ​ការ​ទទួល​​​ប្រាក់​​​ឈ្នួល ជួល​ផ្ទះ និងចុះ​ឈ្មោះ​សម្រាប់​សេវា​ទូរស័ព្ទ។

រូបភាព https://www.asahi.com/ajw/articles/14580003

ប្រសិនបើអតីត Yakuza ពន្យល់ប្រាប់និយោជកថា ពួកគេជាអតីត Yakuza ដូច្នេះពួកគេមិនអាចបើកគណនីធនាគារ​បាន​ទេ អាជីវកម្មអាចនឹងសម្រេច​ចិត្តមិនជួលពួកគេ។

លោក Hirosue វិភាគ ពេលខ្លះក្រុមសង្គមងងឹតប្រើមូលហេតុ​ខាងលើដើម្បីអូសទាញសមាជិកដែលចង់ចាកចេញ​ពី​ក្រុម។ នៅពេលជួបបញ្ហាចូលរួមក្នុងសង្គមឡើងវិញ ពួកគេអាចត្រឡប់ទៅរកក្រុមសង្គមងងឹត ហើយប្រើល្បិចបោកប្រាស់ដើម្បីចិញ្ចឹមជីវិត។

លោក Hirosue បាននិយាយថា “មិនងាយទេដែលអតីត Yakuza អាចស្វែងរកការងារភ្លាមៗ បន្ទាប់ពីចាកចេញ​ពី​ក្រុម​ក្នុង​តំបន់​ដែល​មានអាជីវកម្មតិចសហការជាមួយប៉ូលីស ហើយចំណុចនេះនឹងកាត់បន្ថយឳកាសបើកគណនី​ធនាគារ​របស់​ពួកគេ។ សំខាន់ត្រូវធានា​ថា​អាជីវកម្ម​កាន់​តែ​ច្រើន​ចូលរួម​សហប្រតិបត្តិការ” ។

Japo Cambobia