លោកយាយជនជាតិជប៉ុនចំណាស់​ជាងគេលើពិភពលោកបាន​ទទួល​មរណភាព​នៅ​ជន្មាយុ ១១៩ ឆ្នាំ

លោកយាយជនជាតិជប៉ុនចំណាស់​ជាងគេនៅលើពិភពលោក បានទទួលមរណភាពនៅជន្មាយុ ១១៩ ឆ្នាំ។

លោកយាយ Kane Tanaka កើតនៅថ្ងៃទី ២ ខែមករា ឆ្នាំ ១៩០៣ នៅ Fukuoka ភាគនិរតីប្រទេសជប៉ុន ក្នុងឆ្នាំដដែល​នោះ បងប្អូនគ្រួសារ Wright ហោះហើរជាលើកដំបូង ហើយ Marie Curie បានក្លាយជាស្ត្រីដំបូងគេដែលឈ្នះរង្វាន់​ណូបែល។

លោកយាយ Tanaka មាន​សុខភាព​ល្អ​គួរសម រហូត​មក​ដល់​ពេល​ថ្មីៗ​នេះ​យាយស្នាក់នៅមណ្ឌលថែទាំមនុស្សចាស់។ លោក​យាយ​ចូលចិត្តលេង board Game ដោះស្រាយគណិតវិទ្យា ផឹកសូដា និងហូបសូកូឡា។

កាល​នៅ​ក្មេង លោកយាយ Tanaka ធ្លាប់គ្រប់គ្រងអាជីវកម្មផ្សេងៗដូចជាម្ចាស់​ហាងមី និងហាងនំអង្ករ។ យាយ​រៀប​ការ​ជាមួយលោកតា Hideo Tanaka ក្នុងឆ្នាំ ១៩២២ មានកូនចំនួន ៤ នាក់ និងទទួលកូនចិញ្ចឹមទី ៥ ម្នាក់។ លោក​យាយ Tanaka ធ្លាប់មានបំណងអង្គុយលើកៅអី​រុញ និង​ចូល​រួម​ក្នុង​ព្រឹត្តិការណ៍បញ្ជូនភ្លើងគប់កីឡាអូឡាំពិកទីក្រុង​​តូក្យូឆ្នាំ ២០២១ ប៉ុន្តែគួរអោយសោកស្តាយជំងឺរាតត្បាតមិនអនុញ្ញាតឱ្យគាត់ចេញក្រៅ។

នៅពេលដែលកំណត់ត្រា Guinness ទទួលស្គាល់គាត់ជាមនុស្សចំណាស់ជាងគេលើពិភពលោកនៅឆ្នាំ ២០១៩ ពេលទទួលបានសំណួរ តើពេលវេលាណាក្នុងជីវិតធ្វើ​ឱ្យគាត់មាន​សុភមង្គល​បំផុត? ចម្លើយរបស់គាត់គឺ “បច្ចុប្បន្ន” ។

នៅពេលនោះ គាត់បានចែករំលែកថា ទម្លាប់ប្រចាំថ្ងៃរបស់គាត់ គឺក្រោកពីគេងនៅម៉ោង ៦ ព្រឹក ពេលរសៀល គាត់ចំណាយពេលរៀនគណិតវិទ្យា និងហាត់សរសេរអក្សរផ្ចង់។ នេះបើតាមកំណត់ត្រា Guinness បានឱ្យដឹង “ល្បែង​កំសាន្តរបស់លោកយាយ Kane គឺអុក Othello ។ គាត់ជាអ្នកជំនាញខាងល្បែង board game តែងតែយកឈ្នះបុគ្គលិកនៅមណ្ឌលថែទាំមនុស្សចាស់” ។

លោកយាយបានទទួលមរណភាពនៅថ្ងៃទី ១៩ ខែមេសា។

ជប៉ុន​ជា​ប្រទេស​ដែល​មាន​ប្រជាជន​ចំណាស់​ជាង​គេ​លើ​ពិភពលោក។ យោងទៅតាមទិន្នន័យរបស់ធនាគារពិភព​លោក ប្រទេស​នេះមានប្រហែល ២៨% អ្នកដែលមានអាយុជាង ៦៥ ឆ្នាំ។

ស្រ្តីចំណាស់ជាងគេដែលធ្លាប់ត្រូវបានកំណត់ត្រា Guinness ទទួលស្គាល់គឺ Jeanne Louise Calment ជនជាតិបារាំង បាន​ទទួល​មរណ​ភាព​នៅជន្មាយុ ១២២ ឆ្នាំ ក្នុងឆ្នាំ ១៩៩៧ ។

Sacchan