ជីវិតរបស់ Masako Katsura កំពូលស្រ្តីលេងប៊ីយ៉ានៅជប៉ុន

នៅទសវត្សរ៍ឆ្នាំ ១៩៥០ ស្ត្រីជនជាតិជប៉ុនម្នាក់ឈ្មោះ Masako Katsura បានធ្វើឱ្យកក្រើកពិភពប៊ីយ៉ា និងបង្កើតកេរ្តិ៍​ឈ្មោះ​ក្នុងពិភពកីឡាដែលភាគច្រើនជាបុរស។

នៅឆ្នាំ ១៩៥២ ស្តេចប៊ីយ៉ា Willie Hoppe ប្រឈមមុខនឹងគូប្រជែងដែលមិនធ្លាប់មានពីមុនមក គឺកីឡាការិនី Masako Katsura ។ នៅពេលដែលលោកយកឈ្នះជើងឯកពិភពលោកលើកដំបូង Masako Katsura មិន​ទាន់​ចាប់កំណើត​ផង។

Masako Katsura ជា​ស្ត្រី​ដំបូង​គេ​ដែល​ចូល​រួម​ការប្រកួត​​ប៊ីយ៉ា​លើឆាកអន្តរជាតិ ហើយគាត់បានក្លាយជាស្រ្តីអស្ចារ្យម្នាក់។

ទោះជាយ៉ាងណា អ្នកស្រីបានបង្កើតកេរ្តិ៍ឈ្មោះក្នុងពិភពប៊ីយ៉ាជប៉ុន ហើយបានក្លាយជាការចាប់រអារម្មណ៍នៃពិភពកីឡា។ Masako Katsura នាំយកបទពិសោធន៍ជាច្រើនដែលបានមកពីសាលប៊ីយ៉ានៅទីក្រុងតូក្យូទៅកាន់ឆាកពិភព​លោក ក្នុង​នាមជាស្ត្រីដំបូងចូលរួមក្នុងការប្រកួតប៊ីយ៉ាអន្តរជាតិ។

តើ Masako Katsura ជានរណា?

Masako Katsura អាយុ ១៤ ឆ្នាំចាប់ផ្តើមលេងប៊ីយ៉ា។ គាត់កើតនៅទីក្រុងតូក្យូក្នុងឆ្នាំ ១៩១៣ Masako Katsura ធំដឹងក្តីក្រោមការមើលថែរបស់ម្តាយ ជាពិសេសបន្ទាប់ពីឪពុករបស់គាត់ទទួលមរណភាព ម្តាយរបស់គាត់ជាអ្នកណែនាំល្បែងបុកប៊ីយ៉ា។

Masako Katsura បាន​និយាយ​ថា “ស្ថានភាព​រាងកាយរបស់ខ្ញុំខ្សោយណាស់ តែងតែមានអារម្មណ៍អស់កម្លាំង” ។ “ដូច្នេះ​​ហើយ​ម្តាយខ្ញុំចង់ឱ្យខ្ញុំលេង​ប៊ីយ៉ា ដើម្បី​ហាត់​ប្រាណ និងធ្វើឱ្យខ្ញុំរឹងមាំជាងមុន” ។

ក្នុងទសវត្សរ៍ឆ្នាំ ១៩២០ កន្លែងលេងប៊ីយ៉ាពេញនិយមខ្លាំងនៅទីក្រុងតូក្យូ។ បងថ្លៃរបស់ Masako Katsura ក៏ជាម្ចាស់ហាង ហើយបង្រៀននាងឱ្យទម្លាប់នឹងល្បែងនេះផងដែរ។ មិនយូរប៉ុន្មាននាងតែងតែចំណាយពេលទំនេរនៅ​លើ​តុ​ប៊ីយ៉ា ដោយចាប់ផ្តើមហាត់ក្នុងនាមជាអ្នកជួយ។

ខំប្រឹងហ្វឹកហាត់ជា​រៀង​រាល់​ថ្ងៃ មិន​យូរ​ប៉ុន្មាន​ Masako Katsura មានជំនាញបុកប៊ីយ៉ាពិសេស។

កាលអាយុ ១៥ ឆ្នាំ Katsura យកឈ្នះជើងឯកប៊ីយ៉ាសេរីនារីជប៉ុន។ ជំនាញរបស់នាងបានទាក់ទាញចំណាប់អារម្មណ៍​​ម្ចាស់​​ជើង​​ឯក​​ជប៉ុន Kinrey Matsuyama ។ គាត់ទទួលហ្វឹកហាត់ និងណែនាំនាងឱ្យលេងប៊ីយ៉ា carom ។

ដោយមានភាពស្មុគស្មាញ អ្នកលេងត្រូវស្ទាត់ជំនាញទើបទទួលបានពិន្ទុ ២ ខ្ទង់ក្នុងមួយលើក។ មិនយូរប៉ុន្មាន Katsura ឈានដល់កម្រិតកំពូល ដោយ​សារភាពប៉ិនប្រសប់បាន​ផ្ដួល​កីឡាករ​ល្បីៗ​ជា​ច្រើន។

Masako Katsura ផ្លាស់ទៅសហរដ្ឋអាមេរិក

សង្គ្រាមលោកលើកទី ២ បានធ្វើឱ្យអាជីពប៊ីយ៉ារបស់ Katsura ត្រូវផ្អាក។ ក្នុងកំឡុងពេលសង្រ្គាម នាងធ្លាប់សម្តែង​បុក​ប៊ីយ៉ា​កំសាន្តសម្រាប់​កងទ័ព​ជប៉ុន។ ក្រោយសង្គ្រាម នាងបានបន្តបង្ហាញពីទេពកោសល្យនេះនៅក្នុងក្លឹបបម្រើ​យោធា​អាមេរិក។

ការសម្តែងទាំងនោះបានចាប់ផ្តើមអាជីពជាអ្នកលេងប៊ីយ៉ាអន្តរជាតិរបស់ Katsura ។ ទាហាន​អាមេរិក​ម្នាក់​បាន​សរសេរ​សំបុត្រផ្ញើឪពុករបស់គាត់ ដែល​ជា​ម្ចាស់​ជើង​ឯក​ប៊ីយ៉ា​ឈ្មោះ Welker Cochran និយាយពី Masako Katsura ។ គាត់​បាន​និយាយ​ថា “នារីម្នាក់នេះលេងពូកែជាងពុកទៅទៀត” ។ នៅពេលនោះ Katsura បានយកឈ្នះជើង​ឯក​ល្បែង​ប៊ីយ៉ា​ថ្នាក់​ជាតិ​នារី និងចាប់ផ្តើមប្រកួតប្រជែងជើងឯកថ្នាក់ជាតិបុរស។

ជីវិតរបស់ Katsura ផ្លាស់ប្តូរបន្តិចម្តងៗ នៅពេលដែលនាងបានជួប Vernon Greenleaf ដែលជាពលបាលត្រីក្នុង​ជួរ​កង​ទ័ព​អាមេរិក ជាកន្លែងដែលនាងសម្តែងទេពកោសល្យលេងប៊ីយ៉ាជារៀងរាល់យប់ បន្ទាប់មកពួកគេបាន​រៀប​ការ។

នៅឆ្នាំ ១៩៥១ Katsura និងស្វាមីបានផ្លាស់ទៅរស់នៅ California នាងមើលឃើញពិភពមួយខុសពីទីក្រុង​តូក្យូ។ នៅប្រទេសជប៉ុន ស្រ្តីបន្ទាប់ពីបញ្ចប់ការ​ងារ​រកកន្លែងលេងប៊ីយ៉ា​ ប៉ុន្តែបន្ទប់លេងប៊ីយ៉ានៅអាមេរិកជាកន្លែង​សម្រាប់​​បុរស។

Katsura សារភាពថា “នៅទីនេះខ្ញុំទើបតែបានជួបអ្នកលេងប៊ីយ៉ាស្រីម្នាក់ប៉ុណ្ណោះ នៅហាងប៊ីយ៉ាគេចាត់ទុកដូច​ជា​កន្លែងសម្រាប់បុរស។ អ្នក​ដឹង​ទេ ប្រសិន​បើ​នរណា​ម្នាក់​បើក​ហាង​ប៊ីយ៉ា​សម្រាប់​តែ​មនុស្ស​ស្រី ពិតជាល្អណាស់” ។ Masako Katsura ក្លាយជាអ្នកលេងប៊ីយ៉ាអន្តរជាតិ។

Masako Katsura ទទួលបានជោគជ័យផ្នែកប៊ីយ៉ាអាមេរិកក្នុងទស្សវត្សរ៍ឆ្នាំ ១៩៥០ បានបង្កការភ្ញាក់ផ្អើល។ ជើង​ឯក Welker Cochran ក្លាយ​ជា​អ្នកគ្រប់គ្រងរបស់ Katsura ។

លោក Welker Cochran បានប្រាប់កាសែតថា “ល្បែងនេះ​ត្រូវ​ការ​កីឡាការិនី​ម្នាក់​ដែល​មាន​ជំនាញ​គ្រប់គ្រាន់ដើម្បីប្រកួតប្រជែងជាមួយកីឡាករឆ្នើម។ ​ហើយ​ខ្ញុំ​ជឿ​ថានៅ​ទី​បំផុតរឿងនេះបានមកដល់” ។

Katsura បានក្លាយជាប្រធានបទនៅលើបណ្តាញផ្សព្វផ្សាយអាមេរិក ប៉ុន្តែ​សារព័ត៌មាន​ច្រើន​តែ​ចាប់​អារម្មណ៍​លើ​ភេទជាជាង​ជំនាញ​របស់​នាង។

ទោះជាយ៉ាងណា អ្នកលេងប៊ីយ៉ាជាច្រើនបានផ្តល់ការគោរពជាពិសេសចំពោះ Katsura ។ Willie Hoppe បាននិយាយ​​ថា “នៅបូព៌ា ពួកគេបានប្រាប់ខ្ញុំថា នាងពូកែណាស់ ប៉ុន្តែខ្ញុំមិននឹកស្មានថាអាចមើលឃើញកីឡាការិនីដ៏អស្ចារ្យ​បែប​នេះទេ។ នាងយកឈ្នះការប្រកួតអ្នកលេងដែលពូកែបំផុត” ។

Katsura ត្រូវបានទំព័រកាសែតមួយហៅថា “កំពូលស្រ្តីប៊ីយ៉ាជនជាតិជប៉ុន” ប៉ុន្តែ Katsura បាននិយាយថា នាងគ្រាន់តែចង់ឱ្យអ្នករាល់គ្នាហៅថា Katsy ប៉ុណ្ណោះ។

ការប្រកួតប្រជែងឆ្នាំ ១៩៥២ រវាង Hoppe ដែលជាម្ចាស់ជើងឯកពិភពលោក ៥១ ដង និង Katsura ដែលជាស្ត្រីជន​ជាតិ​ជប៉ុន​មាឌ​តូចម្នាក់បានបង្កការភ្ញាក់ផ្អើលនៅលើទំព័រកាសែត។

ម្ចាស់ជើងឯកប៊ីយ៉ា Willie Hoppe កាលនៅក្មេង។

ទោះបីជាមិនអាចទម្លាក់ជើងឯកពិភពលោក Hoppe ប៉ុន្តែ Katsura បានក្លាយជាស្ត្រីដំបូងចូលរួមការប្រកួត​ប៊ីយ៉ា​​អន្តរ​ជាតិ។

បន្ទាប់ពីបំបាត់គំនិតរើសអើងយេនឌ័រក្នុងពិភពប៊ីយ៉ា Masako Katsura បានក្លាយជាអ្នកតំណាងកីឡានេះ។ នៅឆ្នាំ ១៩៥៨ នាងបង្ហាញខ្លួននៅលើកម្មវិធីទូរទស្សន៍ នាងស្ទើរតែជាប់ចំណាត់ថ្នាក់លេខមួយក្នុង​ការ​ប្រកួត​អន្តរ​ជាតិ។

គ្រូបង្វឹកយូរឆ្នាំរបស់ Katsura ឈ្មោះ Welker Cochran បានសរសើរជំនាញរបស់នាងថា “Masako Katsura បើកវិស័យ​ថ្មីសម្រាប់ស្ត្រី។ វត្តមាន​របស់​នាង​បាន​ធ្វើ​ឱ្យ​កីឡា​នេះ​មាន​ភាព​ទាក់ទាញ​សម្រាប់ស្រី្ត។ នាងមានកម្លាំងរបស់បុរស” ។

ទោះជាយ៉ាងណា នៅឆ្នាំ ១៩៦១ Katsura ចូលនិវត្តន៍បន្ទាប់ពីចាញ់ម្ចាស់ជើងឯកពិភពលោក។

ពិន្ទុសម្រាប់ការប្រកួតដំបូងរបស់ Masako Katsura នៅសហរដ្ឋអាមេរិក។

“កំពូលស្រ្តីលេងប៊ីយ៉ា” បង្ហាញខ្លួនលើកចុងក្រោយនៅឆ្នាំ ១៩៧៦ នៅហាងប៊ីយ៉ានៅសាន់ហ្វ្រាន់ស៊ីស្កូ។ គាត់ចូលទៅ​លេង​ទទួល​បាន ១០០ ពិន្ទុ ក្រោយមកបាត់ខ្លួនម្តងទៀត។

នៅទសវត្សរ៍ឆ្នាំ ១៩៧០ កីឡាប៊ីយ៉ាបានផ្លាស់ប្តូរ។ នៅទសវត្សរ៍នោះអ្នកលេងមួយក្រុមបានបង្កើតសមាគមកីឡាប៊ីយ៉ា​អាជីព​ស្រ្តី។ ពួកគេបានបញ្ចូល Katsura ចូលទៅក្នុងសាលកិត្តិនាមរបស់ពួកគេ។

ចំណែក​អតីត​ជើងឯក Katsura បាន​ផ្លាស់​ទៅនៅ​ជប៉ុន ហើយទទួលមរណភាពនៅឆ្នាំ ១៩៩៥ ។

នេះជារឿងក្នុងទស្សវត្សរ៍ឆ្នាំ ១៩៥០ Masako Katsura ត្រូវគេចាត់ទុកជាកំពូលស្រ្តីលេងប៊ីយ៉ា ព្រោះតែបានបំបាត់ការ​រើស​អើង​យេនឌ័រ​ក្នុងកីឡាដែលធ្លាប់តែពេញនិយមសម្រាប់បុរស។

AD