ដុំមាសធំជាងគេលើពិភពលោកនៅ​ជប៉ុនឡើង​ថ្លៃ ២,២ ពាន់​លាន​យ៉េន​ ជាង ៥ ដងក្នុងបរិបទវិបត្តិរវាងរុស្ស៊ី និងអ៊ុយក្រែន

វិបត្តិអ៊ុយក្រែនធ្វើឱ្យសេដ្ឋកិច្ចអស្ថិរភាព ជា​ពិសេស​បាន​ធ្វើ​ឱ្យ​តម្លៃ​ទំនិញ​ឡើង​ថ្លៃ។ មិនត្រឹម​តែប៉ុណ្ណឹង ដុំមាសធំជាង​គេ​លើពិភពលោកឡើងថ្លៃដល់ទៅជាង ២,២ ពាន់លានយ៉េន លើសតម្លៃរបស់វាដល់ទៅប្រាំដងពេលត្រូវបានដាក់​តាំង​លើកដំបូងនៅឧទ្យានកម្សាន្តប្រទេសជប៉ុនក្នុងឆ្នាំ ២០០៥ ។

ដុំមាសទម្ងន់ ២៥០ គីឡូក្រាមត្រូវបានដាក់តាំងបង្ហាញនៅឧទ្យានកម្សាន្ត Toi Gold Mine នៅ Izu ខេត្ត Shizuoka ។ ដុំមាស​ត្រូវបានផលិតដោយក្រុមហ៊ុនមេរបស់ឧទ្យាននៅឆ្នាំ ២០០៥ ហើយកំណត់ត្រាពិភពលោក Guinness បាន​បញ្ជាក់ថាវាជាដុំមាសធំជាងគេលើពិភពលោក។

ដុំមាសត្រូវបានដាក់តាំងជាសាធារណៈនៅខែកក្កដាឆ្នាំ ២០០៥ នៅពេលនោះត្រូវបានកំណត់តម្លៃប្រហែល ៤០០ លាន​យ៉េន។

នេះ​បើ​តាម​អ្នក​ផលិត​ដុំ​មាស Tanaka Kikinzoku Kogyo បាន​ចែក​រំលែក គិត​ត្រឹម​ពេល​ថ្មី​ៗ​នេះមាស​ ១​ ក្រាម​មាន​​តម្លៃ ​៨.៩៦៩ ​យ៉េនរួម​ទាំង​ពន្ធ។

មាសត្រូវគេចាត់ទុកដូចជាដំណោះស្រាយស្តុកទុកល្អបំផុតក្នុងអំឡុងពេលមាន​វិបត្តិ។ តម្លៃមាសឡើងថ្លៃក្នុងបរិបទ​អស្ថិរភាព​ដែល​បណ្តាលមកពីជំងឺ​រាត​ត្បាត​កូវីដ ១៩ ក៏​ដូច​ជាសង្គ្រាមរវាងរុស្ស៊ី និងអ៊ុយក្រែន។

តម្លៃដុំមាសក៏ឡើងថ្លៃដោយ​សារ​ការ​ធ្លាក់​ចុះ​នៃ​ប្រាក់​យ៉េន​ជប៉ុន​ធៀប​នឹង​ប្រាក់​ដុល្លារ​អាមេរិក នេះជាសន្ទស្សន៍អន្តរ​ជាតិ​សម្រាប់ការជួញដូរលោហធាតុជា​សកល។

អណ្តូងរ៉ែមាស Toi បានបញ្ចប់ប្រតិបត្តិការរុករកក្នុងឆ្នាំ ១៩៦៥ ជាអណ្តូងរ៉ែមួយក្នុងចំណោមអណ្តូងរ៉ែដែលផលិតបានច្រើនបំផុតរបស់ជប៉ុនអំឡុងពេលនោះ។

ឧទ្យានកម្សាន្តនៅកន្លែងចាស់ណែនាំអ្នកទស្សនាអំពីប្រវត្តិអណ្តូងរ៉ែមាស ហើយផ្តល់ឱកាសឱ្យពួកគេរុករកផ្លូវរូងក្រោមដីមួយចំនួន និងវិធីសាស្រ្តជីកយករ៉ែមាសរបស់កម្មករ។

អ្នកទស្សនាអាចប៉ះដុំមាសតាមរយៈរន្ធលើប្រអប់អេក្រង់ acrylic ។ ឧទ្យានបានចាប់យកការឡើងថ្លៃក្នុងកម្មវិធីបញ្ចុះ​តម្លៃ​លើបណ្តាញសង្គម ដែលក្នុងនោះពួកគេប្រកាសថាប៉ះដុំមាសនឹងនាំសំណាងហិរញ្ញវត្ថុដល់អ្នកទស្សនា។

“យើង​មិនបានព្យាករ​ណ៍តម្លៃ​អាច​នឹង​ឡើង​ថ្លៃ​ប៉ុន្មាន​នោះ​ទេ” Ayumi Kokubu សមាជិក​គណៈគ្រប់​គ្រង​ឧទ្យាន​បាន​និយាយ​​ថា៖ “យើងចង់ឱ្យ​ពិភព​លោក​ក្លាយ​ជា​កន្លែងដែលមានស្ថិរភាពជាងមុន” ។

Japo Cambodia