បុរសជនជាតិចិនទទួលបានទិដ្ឋាការជប៉ុនគ្មានដែនកំណត់ដំបូងគេ

ព័ត៌មានពីក្រសួងហេដ្ឋារចនាសម្ព័ន្ធបានប្រកាសថា បុរសជនជាតិចិនអាយុ ៣៥ ឆ្នាំម្នាក់បានក្លាយជាមនុស្សដំបូង​គេដែលទទួលបានសិទ្ធិស្នាក់នៅសម្រាប់ Blue-collar worker (ពលកម្មដៃជើង) ជនបរទេសស្នាក់នៅប្រទេស​ជប៉ុន​ដោយគ្មានកំណត់។

លោក Weng Fei បុគ្គលិកក្រុមហ៊ុនសំណង់នៅ​ខេត្ត Gifu ភាគ​កណ្តាល​ប្រទេស​ជប៉ុន ទទួលបានងារជាកម្មករជំនាញ​លេខ ២ តាមគោល​នយោ​បាយ​ដែលដាក់ចេញដោយជប៉ុននៅខែមេសា ឆ្នាំ ២០១៩ ដើម្បីទាក់ទាញពលករបរទេស និងដោះស្រាយបញ្ហាកង្វះកម្លាំងពលកម្មធ្ងន់ធ្ងរក្នុងប្រទេស។

ប្រព័ន្ធនេះអនុញ្ញាតឱ្យជនបរទេសដែលមានកម្រិតភាសាជប៉ុន និងជំនាញវិជ្ជាជីវៈជាក់លាក់អាចដាក់ពាក្យសុំស្នាក់នៅដែលគេហៅថាកម្មករមាន​ជំនាញ​ជាក់​លាក់​លេខ ១ ផ្តល់សិទ្ធិធ្វើការលើវិស័យចំនួន ១៤ ដូចជា សំណង់ កសិកម្ម និងគិលានុបដ្ឋាយិកា។ល។ រហូតដល់ ៥ ឆ្នាំ។

កម្មករជំនាញខាងផ្នែកសំណង់ និងការសាងសង់កប៉ាល់អាចបន្តការស្នាក់នៅដោយ​សម្រេច​បាន​ស្ថានភាពកម្មករជំនាញជាក់លាក់លេខ ២ ។ ត្រង់ចំណុចនេះអនុញ្ញាតឱ្យនាំសមាជិកគ្រួសារ និងមិនមានដែនកំណត់​ចំពោះ​ចំនួន​ទិដ្ឋាការ។

លោក Weng បានមកដល់ប្រទេសជប៉ុនលើកដំបូងក្នុងឆ្នាំ ២០១០ ក្នុងនាមជាអ្នកហាត់ការផ្នែកបច្ចេកទេសធ្វើការនៅក្រុមហ៊ុនសំណង់សព្វថ្ងៃ។ គាត់ទទួលបានងារជាកម្មករជំនាញលេខ ១ ក្នុងឆ្នាំ ២០២០។

បន្ទាប់មកគាត់ទទួលបានពិន្ទុលេខ ១ ​ក្នុង​ការ​ប្រលង​ជំនាញ​បច្ចេកទេស ប្រព័ន្ធជាតិសម្រាប់បញ្ជាក់សមត្ថភាពវិជ្ជាជីវៈ​ដែល​បង្ហាញថាលោកមានជំនាញកម្រិតខ្ពស់ ចាំបាច់សម្រាប់មុខតំណែងដែលមិនមែនជាអ្នកគ្រប់គ្រង។

Miki Sawamura អនុប្រធានសហករណ៍គម្រោងអេកូឡូស៊ី ជាសហជីពគាំទ្រកម្មករបរទេសយ៉ាងសកម្មដែលមានមូលដ្ឋាននៅទីក្រុង Gifu បាននិយាយថាសមិទ្ធផលនេះគឺជា “លទ្ធផលនៃកិច្ចខិតខំប្រឹងប្រែងរបស់និយោជកក្នុងការបង្កើតបរិយាកាសការងារប្រកបដោយផាសុកភាពសម្រាប់ជនបរទេស” ។

Sawamura បាននិយាយថា “ដើម្បីដោះស្រាយកង្វះកម្លាំងពលកម្ម ខ្ញុំសង្ឃឹមថាវិស័យសំណង់នឹងខិតខំប្រឹងប្រែង​កែ​លម្អ​ការ​ប្រព្រឹត្តិចំពោះជនបរទេស” ។

Sacchan