Hasegawa Heizou រឿងនិយាយពីអ្នកការពារសន្តិភាពមិនគោរពច្បាប់

តើអ្នកចូលចិត្តមើលភាពយន្តបែបប្រវត្តិសាស្ត្រដែរទេ? រឿងភាគប្រវត្តិសាស្ត្រលើកញ្ចក់ទូរទស្សន៍ជប៉ុនកំណត់បរិបទ​សម័យ​សាមូរ៉ៃ ជាពិសេសមនុស្សវ័យចំណាស់ចូលចិត្ត។ ពួកគាត់តែងតែផឹកតែមើលរឿង រំលឹកពីអតីតកាល។

ក្នុងចំណោមរឿងភាគប្រវត្តិសាស្ត្រល្បីឈ្មោះជាច្រើន មាន​រឿង​មួយ​ដែល​ខ្ញុំ​ចូល​ចិត្តមាន​ចំណងជើងថា Onihei Hankachou ។

ខ្សែភាពយន្តនេះត្រូវបានកែសម្រួលពីប្រលោមលោកដើមរបស់ Ikenami Shoutaro ដែលសម្តែងដោយតារាសម្តែងប្រុស Nakamura Kichiemon សរុបទៅគឺល្អមើលណាស់។

https://www.bsfuji.tv/oniheispamabiki/pub/index.html

តួអង្គឯកក្នុងខ្សែភាពយន្តនេះគឺ Hasegawa Heizou ដែលជាតួអង្គមានពិត។ កាលពីក្មេង បុគ្គលនេះបានធ្វើអំពើ​អាក្រក់ជាច្រើន។ ប៉ុន្តែនៅទីបំផុត តួអង្គ​បាន​ក្លាយ​ជា​វីរបុរសសុចរិត។ ថ្ងៃនេះខ្ញុំនឹងរៀបរាប់អំពីជីវិតរបស់បុរស​ម្នាក់​នេះ ជាបុគ្គលដែលខ្ញុំចូលចិត្តយ៉ាងខ្លាំង។

ខ្សែភាពយន្ដនេះកំណត់បរិបទនៅចុងសតវត្សទី ១៨ ដែលជាសម័យកាលបញ្ចប់របស់សាមូរ៉ៃ។ ទោះជាយ៉ាងណា នេះជា​ដំណាក់​កាល ២៦០ ឆ្នាំដែលច្របូកច្របល់បំផុតនៃសម័យកាលនេះ។

ក្នុងអំឡុងពេល ១០ ឆ្នាំជាប់ៗគ្នា គ្រោះទុរភិក្សបានសម្លាប់មនុស្ស ១,៤ លាននាក់ ទន្ទឹមនឹងនេះករណីផ្ទុះភ្នំ Asama ធ្វើអោយមនុស្សស្លាប់ ២ ម៉ឺននាក់។ មិនត្រឹម​តែប៉ុណ្ណឹង ​ភ្លើង​ឆេះ​យ៉ាង​សន្ធោសន្ធៅ​ស្ទើរតែដុតបំផ្លាញ​ក្យូតូ​ទាំង​មូល។ ដោយ​សារ​គ្រោះ​មហន្តរាយ​ជា​បន្តបន្ទាប់​តម្លៃ​អង្ករឡើង​ថ្លៃ ជីវភាព​ប្រជាជន​ជួប​ទុក្ខ​លំបាក។ ប្រជាជន​ធម្មតា​ប្រមាណ ១០០០ នាក់បះបោរវាយប្រហារក្រុមឈ្មួញ។ កសិករ​ និង​អ្នក​ក្រុងរងទុក្ខ ភាពអត់ឃ្លានធ្វើអោយពួក​គេ​ប្រកបមុខរបរទុច្ចរិត ជាពិសេសនៅតំបន់ Edo ។ នេះជាកន្លែងប្រមូលផ្តុំចោរគ្រប់ប្រភេទមកពីតំបន់ផ្សេងៗ​​គ្នា។ ដោយសារ​ស្ថានភាព​វឹកវរ​នេះ បម្រាម​​ត្រូវបាន​ដាក់ចេញ​។

Heizou Hasegawa បង្ហាញខ្លួនក្នុងបរិបទច្របូកច្របល់បែបនេះ។ នៅពេលនោះគាត់ជាអ្នកដឹកនាំ Hitsuke Tōzoku Aratamekata ដែលជាក្រុមស៊ើបអង្កេតករណីបង្កអគ្គីភ័យ ប្លន់ សម្លាប់មនុស្ស។ ម្យ៉ាងវិញទៀត ក្រុម​មាន​សកម្មភាព​ផ្ទាល់ខ្លួន មានសិទ្ធិចាត់ចែងបុគ្គលនៅនឹងកន្លែងដោយមិនចាំបាច់ចាប់ទាំងរស់។

Heizou ទទួលតួនាទីជាអ្នកដឹកនាំសរុប ៩ ឆ្នាំ ដោះស្រាយជាង ២០០ ករណី។ នេះ​ជា​សមិទ្ធផល​អស្ចារ្យ​បំផុត​ដែល​មិន​​ថា​រៀម​ច្បង ឬ​អ្នក​ស្នង​តំណែង​សុទ្ធតែមិនអាចប្រៀបបាន។

ហេតុ​នេះហើយបានជា Heizo ត្រូវបានគេហៅថា 鬼平 (Onihei) អក្សរកាត់ 鬼の平蔵 (បិសាច Heizou) ។ យ៉ាង​ណា​មិញ តើ​គាត់ជា​បិសាច​បែបណា?

Heizou កើតនៅ ១៧៤៥ ឈ្មោះវ័យកុមារភាពគឺ Testusaburou ។ ទោះបីជាគាត់កើតមកគ្មានឋានៈខ្ពស់ ប៉ុន្តែនៅ​តែ​ជាសាមូរ៉ៃ។ ឪពុករបស់ Heizou ក៏ជាអ្នកដឹកនាំក្រុម Hitsuke Tōzoku Aratamekata ដែលក្រោយមកត្រូវបានកាន់​កាប់​ដោយ​កូន​ប្រុស។

ឪពុករបស់ Heizou ទទួលមរណភាព បន្ទាប់ពីធ្វើបេសកកម្មនៅក្យូតូ ខណៈដែល Heizou អាយុ ២៨ ឆ្នាំ។ ពី​ក្យូតូ​ត្រឡប់​ទៅ​អេដូ Heizou ប្រាប់រឿងនេះដល់មន្ត្រីមកជូនដំណើរ។

សូម​អ្នក​ទាំង​អស់​គ្នា​មាន​ភាព​ម៉ឺងម៉ាត់ ខិតខំ​ធ្វើការ។

Heizou Hasegawa នឹងត្រូវបានពិភពលោក​សរសើរ​ថា​ជា​វីរបុរសលើសពីការស្មាន។

នៅពេលនោះ ខ្ញុំនឹងក្លាយទៅជាមនុស្សអស្ចារ្យ ហើយប្រសិនបើមានឱកាសនឹងត្រលប់ទៅអេដូជួបអ្នករាល់គ្នា។

មនុស្ស​ជា​ច្រើន​​គិត​ថា​អ្នក​ដែល​មិន​បាន​ធ្វើ​អ្វី​​ ហេតុ​អ្វីបានជាអាចនិយាយពាក្យសម្តីថ្លៃថ្នូបែបនេះ។ 

នៅដំណាក់កាលមួយក្នុងជីវិត Heizou មានភាពចាស់ទុំជាងមុន។ ប៉ុន្តែកាលពីក្មេង ពេលរស់នៅអេដូ គាត់ត្រូវគេចាត់ទុកដូចជា​មនុស្ស​អាក្រក់​។

ថែមទាំងត្រូវគេហៅថា Honjo no Tetsu ដែលសំដៅទៅលើមនុស្សអាក្រក់លេខ ១ នៃតំបន់ Honjo (សព្វថ្ងៃជាសង្កាត់ Sumida ទីក្រុងតូក្យូ) ។ តួអង្គនេះ​ត្រូវ​បាន​យុវវ័យ​ក្នុង​ពិភពលោក​កោតសរសើរ​ចំពោះ​ជំនាញ​ដាវ​យ៉ាងប៉ិនប្រសប់ ល្បិចកលច្រើន។ លើស​ពី​នេះគាត់ជាអ្នកមានចិត្តទូលាយ ដូច្នេះទើបអ្នកក្រោមបង្គាប់គោរព។ ជនពាលទាំង​អស់​ក្នុង​តំបន់ Honjo ចង់ក្លាយជាមនុស្សដូច Heizou ។ ថ្វីត្បិតតែល្បីខ្លាំង ប៉ុន្តែមនុស្សដូចជា Heizou អាចនិយាយ​បាន​ថា មនុស្សជាច្រើនឮឈ្មោះប្រាកដជាអស់សំណើច។

នៅខែមេសាឆ្នាំ ១៧៧៤ បុគ្គលនេះត្រូវបានចាត់តាំងឱ្យធ្វើជាសាមូរ៉ៃការពារប្រាសាទអេដូ។ សាមូរ៉ៃ ៤០០ នាក់ រួមទាំង Heizou ត្រូវ​បាន​ប្រមូល​ផ្តុំ ដើម្បីចាប់អ្នក​បះបោរ ១០០០ នាក់ គាត់ធ្វើបានយ៉ាងល្អក្នុងការប្រយុទ្ធនេះ។

ចាប់ពីពេលនោះភាពជោគជ័យរបស់ Heizou កាន់តែច្រើនឡើង។ ក្នុងខ្លួនបុគ្គលនេះអំពើអាក្រក់ត្រូវបង្ក្រាប និងអំពើអាក្រក់ចាំបាច់។ គាត់​មិន​បានប្រព្រឹត្ត​ហួសហេតុ​ឡើយ ដោយ​វិនិច្ឆ័យ​ខ្លួនឯងត្រូវធ្វើអ្វីម្យ៉ាងក្នុង​​នាម​​​ជា​​​មនុស្ស។ វិធីដោះស្រាយឧក្រិដ្ឋកម្ម​របស់បុគ្គលនេះត្រូវ​បាន​បែង​ចែក​ជា​ពីរ​ប្រភេទ។

ប្រភេទ​ចោរលួចប្រាក់មិនធ្វើបាបអ្នកដ៏ទៃ ធ្វើសកម្មភាពគ្មាននរណាម្នាក់ដឹង។ ជាការពិតណាស់ លួចជាអំពើខុសច្បាប់ ប៉ុន្តែ​ចំពោះ Heizou បានវិនិច្ឆ័យ​ថា ចោរ​បែប​នេះមិនសមនឹងត្រូវកាត់ក្បាល ឬធ្វើទារុណកម្មនោះទេ។

ចោរមួយប្រភេទទៀតកំពុងបង្កចលាចលខណៈពេលនោះ។ កាល​ពី​មុន លួចចំណាយពេលច្រើន ដំបូង​កំណត់​គោល​ដៅ បង្កើតមិត្តភាព បន្ទាប់​ពី​យកបាន​ព័ត៌មានទើបលួច។ សព្វថ្ងៃចោរ​ដូចជាធុញ​ទ្រាន់​នឹង​វិធីលួចបែប​នេះ ទើប​​ប្តូរ​​មក​​ប្លន់​​វិញ​។ ដើម្បីយករបស់អ្នកដទៃ ពួកគេធ្វើគ្រប់យ៉ាង រួមទាំងវាយ​ប្រហារ​ស្រ្តី។ ចំពោះ​ចោរប្រភេទ​នេះ Heizou មិន​​​ចុះ​​ចាញ់​​ឡើយ។

ដោយប្រើវិធីចាស់របស់ចោរ Heizou ជ្រៀតចូលក្រុមចោរថ្មី ចាប់ផ្តើមប្រមូលព័ត៌មាន។ ប្រសិនបើ​អ្នកទាំងនេះ​មានការ​សង្ស័យ ហើយ​មិន​ផ្តល់​ព័ត៌មាន​ Heizou នឹង​បង្ខំ​ពួកគេ​ឱ្យ​សារភាព​ដោយប្រើអំពើហិង្សាយ៉ាងព្រៃផ្សៃ។

ចំពោះពួកចោរ Heizou ដូចជាបិសាច ប៉ុន្តែដោយសារវត្តមានរបស់ Heizou ទើបចោរមួយចំនួនកែខ្លួន ឈប់​លួច​ប្លន់។ តាមពិតទៅ Heizou ជាបិសាចផង ជាវីរបុរសផង។

រឿង Heizou ត្រូវបាននិពន្ធឡើងយ៉ាងកក់ក្តៅ និងពោរពេញដោយទឹកចិត្ត ទាំងក្នុងប្រលោមលោក ក៏ដូចជារឿងភាគទូរទស្សន៍ផងដែរ។ តាមពិតទៅគាត់ក៏ជាមនុស្សម្នាក់មានភាពកក់ក្តៅ។

ទោះបីរវល់ខ្លាំងយ៉ាងណា ក៏គាត់នៅតែអត់ធ្មត់ដោះស្រាយរឿងឈ្លោះប្រកែកគ្នារវាងប្ដីប្រពន្ធក្នុងទីក្រុង។ ហើយ​ថែម​ទាំង​មក​ពិនិត្យមើលទំនាក់ទំនងរបស់ពួកគេល្អឬអត់។ គ្រួសារជាច្រើនមានភាពសុខសាន្តក៏ដោយសារវត្តមាន​របស់ Heizou ។

ជាងនេះទៅទៀត បុគ្គលនេះក៏មានការព្រួយបារម្មណ៍យ៉ាងខ្លាំងចំពោះបញ្ហាជនអនាថាផងដែរ។ Heizou គិតថាបុគ្គលទាំងនេះងាយនឹងធ្លាក់ក្នុងផ្លូវអាក្រក់ ដូច្នេះរកមធ្យោបាយផ្តល់កន្លែងស្នាក់នៅ។ ជនអនាថា ឬ​អ្នកប្រព្រឹត្ត​កំហុស​ស្រាលត្រូវបានបញ្ជូនចូលទីនោះ ផ្តល់ការបណ្តុះបណ្តាលវិជ្ជាជីវៈ ដើម្បីចូលរួមក្នុងសង្គមវិញ។

ទោះបីជាធ្លាប់ប្រព្រឹត្ត​អំពើ​អាក្រក់​ ប៉ុន្តែ Heizou មាន​ឧត្តមគតិ​សីលធម៌ផ្ទាល់ខ្លួន។ ជាបុគ្គលដែលមានអតីតកាល​មិន​ល្អ តែមិនលាក់បាំង ហើយថែមទាំងមានមោទនភាពចំពោះខ្លួនឯង។ ដោយសារ​គាត់​ធ្លាប់ប្រព្រឹត្ត​អំពើ​អាក្រក់ ទើបគាត់យល់ពីមនុស្សអាក្រក់ក្នុង​សង្គម។ ដូច្នេះប្រសិនបើឧក្រិដ្ឋជនអាចកែខ្លួន ហេតុ​អ្វី​បាន​ជា​បិទផ្លូវរបស់​ពួក​គេ។ ចំពោះ​ប្រភេទ​ឧក្រិដ្ឋជនលើសដែនកំណត់ មិនអាចលើកលែងទោសជា​ដាច់​ខាត។

តើអ្នកយល់យ៉ាងណាចំពោះវីរបុរសមួយរូបនេះ?

Kengo Abe