ចំណាយពេល ៦០ ឆ្នាំធ្វើដំណើរឆ្លងកាត់មហាសមុទ្រប៉ាស៊ីហ្វិកម្នាក់​ឯង

ថ្ងៃចុងសប្តាហ៍កាលពី ៦០ ឆ្នាំមុន សំពៅឈើរបស់ Horie បានបង្កការភ្ញាក់ផ្អើលនៅឈូងសមុទ្រ San Francisco សហរដ្ឋ​អាមេរិក។

“តើអ្នកមកពីណា?” William Fisher ដែលជានាវិកជនជាតិអាមេរិកក៏បានចេញដំណើរនាចុងសប្តាហ៍នោះដែរ បាន​ស្រែកខ្លាំង​ហៅ​អ្នក​នៅ​លើ​ទូក។ 

ជនបរទេសសង្ហាម្នាក់ឆ្លើយ “Osaka” ។

Kenichi Horie ត្រៀម​ឆ្លង​សមុទ្រ​នៅទីក្រុង Tiburon រដ្ឋ California នៅ​ថ្ងៃ​ទី ២៥ ខែ​មីនា។ រូបភាព៖ Bay Area News Group

នេះជា Kenichi Horie អាយុ ២៣ ឆ្នាំ ជានាវិកស្ម័គ្រចិត្តសញ្ជាតិជប៉ុន ដែលជាអ្នកបញ្ចប់ដំណើរចម្ងាយ ៨,៤៨១ គីឡូម៉ែត្រ ពីកំពង់ផែ Nishiomiya, Osaka ទៅកាន់ច្រកទ្វារមាស ឆ្នេរខាងលិចអាមេរិកតាមសំពៅនៅថ្ងៃទី ១២ ខែ​សីហា​ឆ្នាំ ១៩៦២ ។ នៅ​ពេល​នោះគ្មាននរណាម្នាក់ធ្លាប់ធ្វើដំណើរបែបនេះទេ។

ទូក Mermaid ដែល Horie ធ្វើដំណើរអណ្តែតលើសមុទ្ររយៈពេល ៩៤ ថ្ងៃ។ Horie ឆ្លងកាត់មហាសមុទ្រប៉ាស៊ីហ្វិកដោយគ្រាន់តែប្រើ​សិចស្តង់ (ឧបករណ៍ឆ្លុះបញ្ចាំងខាងផ្នែកផ្លូវទឹកសម្រាប់វាស់ចម្ងាយមុំរវាងវត្ថុពីរ) ដែលគាត់​រៀន​ប្រើ​អំឡុង​ពេលចូលរួមក្លឹបចែវទូកនៅវិទ្យាល័យ។

នាវិកជនជាតិជប៉ុនបានធ្វើដំណើរខណៈពេលដែលស្បៀងអាហារក្រៀមមិនទាន់មាននៅឡើយ។ គាត់រស់នៅដោយផ្អែកលើអង្ករ គ្រឿងកំប៉ុង និងត្រីដែលចាប់បាននៅសមុទ្រ។ គាត់ក៏យកទឹក ស្រា sake និងស្រា​បៀរ Asahi ៦០ ដបតាម។

Horie ផឹកសន្សំសំចៃរហូតដល់បញ្ចប់ការធ្វើដំណើរនៅសល់ស្រាបៀរប៉ុន្មានដប។ គាត់​ក៏​បានអញ្ជើញ​អ្នក​សារព័ត៌មាន​ផឹក​ពេល​​ពួក​គេ​មក​សម្ភាសន៍​នៅ​ផែ​ San Francisco ។

គ្មានប្រាក់ គ្មានលិខិតឆ្លងដែន គ្មានទិដ្ឋាការ និងកម្រិតភាសាអង់គ្លេសមានកំណត់ Horie ពេលនោះត្រូវគេចាត់ទុក​ថា​ទៅអាមេរិក​ដោយ​ខុស​ច្បាប់។ ទោះជាយ៉ាងណាការធ្វើដំណើររបស់គាត់បាននាំមកនូវបរិយាកាសថ្មីដល់ San Francisco ។

Kenichi Horie ឈរលើទូកនៅ San Francisco ថ្ងៃទី ១២ ខែសីហា ឆ្នាំ ១៩៦២ បន្ទាប់ពីបានបញ្ចប់ការធ្វើដំណើរដំបូង។ រូបភាព NPS 

អភិបាលក្រុងនៅពេលនោះគឺលោក George Christopher រៀបចំផ្តល់ទិដ្ឋាការជាកិត្តិយសចំពោះភាពក្លាហានរបស់គាត់។

នៅស្រុកកំណើត ប្រជាជនជប៉ុនក៏បានសរសើរគាត់ជាអ្នកផ្សងព្រេងដ៏ក្លាហាន នាវិកដ៏ល្បីម្នាក់នៅជប៉ុន ឬចាត់ទុកជាវីរបុរស។ ការធ្វើដំណើររបស់ Horie ប្រៀបដូចជា “កិច្ចខិតខំប្រឹងប្រែងបុគ្គល​ក្នុង​ការ​បង្កើត​សន្តិភាព​គោលនយោបាយការបរទេសក្រោយសង្គ្រាម” ។

ខ្សែភាពយន្តដែលមានចំណងជើងថា “ដំណើរឆ្លងកាត់មហាសមុទ្រប៉ាស៊ីហ្វិកម្នាក់ឯង” ចេញផ្សាយក្រោយដំណើរ​របស់ Horie រយៈ​​ពេល ១ ឆ្នាំ ដោយផ្អែកលើសៀវភៅដែលគាត់បានសរសេរ។

ទូក “នាងមច្ឆា” របស់ Horie ក្រោយ​មក​ត្រូវ​បាន​ដាក់​តាំង​នៅ​ឧទ្យាន​ប្រវត្តិសាស្ត្រ​ជាតិ​ដែន​សមុទ្រ San Francisco ។

Morgan Smith អ្នកគ្រប់គ្រងឧទ្យានបាននិយាយថា “រឿងរបស់គាត់បានបំផុសគំនិតនាវិកអាមេរិកជាច្រើន” ។

ទោះ​ជា​យ៉ាង​ណា ដំណើរ​មួយ​មិន​អាច​បំពេញ​ចិត្ត​បុរស​ម្នាក់​នេះទេ។ ក្នុងរយៈពេល ៦០ ឆ្នាំក្រោយមក លោក Horie បន្តធ្វើដំណើរឆ្លងកាត់ប៉ាស៊ីហ្វិក។

នៅឆ្នាំ ១៩៨៩ គាត់បញ្ចប់ដំណើរ San Francisco – Nishiomiya ប្រទេសជប៉ុន ក្នុងអំឡុងពេល ១៣៧ ថ្ងៃ នៅលើទូកដែលមានប្រវែង ២,៨ ម៉ែត្រ។ នៅឆ្នាំ ១៩៩២ គាត់យកឈ្នះដំណើរ Hawaii – Okinawa ដែលមានចម្ងាយ ៤,៨១៦ គីឡូម៉ែត្រ​ដោយ​ទូកឈ្នាន់។

នៅឆ្នាំ ១៩៩៩ គាត់បន្តត្រឡប់ទៅប្រទេសជប៉ុនតាមឆ្នេរសមុទ្រភាគខាងលិចសហរដ្ឋអាមេរិកដោយទូកដែលផលិត​ពី​គ្រាប់​បែក​អាលុយមីញ៉ូម ៥២៨ ហើយបន្តត្រឡប់ទៅវិញតាមរយៈទូកកែច្នៃពីធុងស្រាវីស្គីបីឆ្នាំក្រោយមក។

Kenichi Horie ក្រឡេកមើល “នាងមច្ឆា” ដែលគាត់ប្រើពេលធ្វើដំណើរលើកដំបូងឆ្លងកាត់មហាសមុទ្រប៉ាស៊ីហ្វិក នៅឧទ្យានប្រវត្តិសាស្រ្តជាតិដែនសមុទ្រ San Francisco ។ រូបភាព San Francisco Chronicle 

Kenichi Horie ត្រូវ​បាន​បញ្ចូល​ក្នុង​សៀវភៅ​កំណត់​ត្រា​ពិភពលោក Guinness ដែលជាអ្នកឆ្លងកាត់​មហាសមុទ្រ​ប៉ាស៊ីហ្វិក​លឿន​​បំផុត​​តាម​រយៈទូកថាមពល​ព្រះអាទិត្យ។

រដ្ឋាភិបាល​ Ecuador យកឈ្មោះរបស់គាត់ដាក់អោយប្រជុំកោះ Galapagos នៅឯមហាសមុទ្រប្រទេសនេះ។

មិត្តម្នាក់របស់ Horie ឈ្មោះ Ken Dota នៅឆ្នាំ ២០១២ បាននិយាយថានាវិកជប៉ុនកំពុងសន្សំសម្រាប់ការធ្វើដំណើរបន្ទាប់។ នៅ​ពេល​នោះ Horie មានអាយុ ៧៣ ឆ្នាំ។

Ken Dota និយាយថា “ខ្ញុំគិតថា Horie កំពុងសន្សំសម្រាប់ការធ្វើដំណើរផ្សេងទៀត។ ខ្ញុំជឿថាគាត់ចង់ក្លាយជាបុរស​ចំណាស់​ជាង​គេដែលជិះទូកជុំវិញពិភពលោកម្នាក់ឯង” ។

១០ ឆ្នាំក្រោយមក នៅវេលាម៉ោង ១០ ថ្ងៃទី ២៦ ខែមីនា Horie បានក្លាយជាអ្នកដែលមានវ័យចំណាស់ជាងគេព្យា​យាម​ឆ្លង​កាត់មហាសមុទ្រប៉ាស៊ីហ្វិកតាមរយៈទូកម្នាក់ឯងចាប់ផ្តើមធ្វើដំណើរត្រឡប់ទៅប្រទេសជប៉ុនវិញនៅអាយុ ៨៣ ឆ្នាំ។

លើក​នេះ​លែង​មាន​ទូក​កែច្នៃ ឬធ្វើពីឈើទៀតហើយ លោក Horie ប្រើ “នាងមច្ឆា” ជំនាន់ទី ៣ ដែលតម្រូវតាមរូប​រាង និង​កម្ពស់ ១ ម៉ែត្រ ៥២ របស់​គាត់។

នេះជាទូកដែលមានកម្រិតល្អឥតខ្ចោះបំផុតក្នុងចំណោមទូកដែលគាត់ធ្លាប់ជិះ។ គាត់​រៀបចំ​គម្រោង​អាន​សៀវ​ភៅ ស្តាប់​​វិទ្យុ​​ពេល​​គាត់​ទំនេរ ដោយ​មិន​ចាំ​បាច់​បញ្ជា​ទូក។

“គ្មានអ្វីដែលត្រូវព្រួយបារម្ភទេ” លោក Horie ឆ្លើយតបនឹងសំណួរធ្វើដំណើរឆ្លងកាត់សមុទ្រម្នាក់ឯង។ “ប្រហែលគ្រាន់តែអាយុច្រើនប៉ុណ្ណោះ” ។

yuk